Deuteronomio 30 - Pangasinan Meaning-Based Bible(MBBPAN83)

Saray Manepeg a Gawaen na saray Israelita pian Nabindisionan ira

1“Initdan ta kayo natan na pankanawnawan mampili ed bindision tan samba. No agawa la ra yan amin ed sikayo, tan manaayam kayo lad arum a bansa ya angikayatan ed sikayo na Katawan a Dios yo, nanunotan yo yan inter kod sikayon pampilian yo.

2No sikayo tan saray kabyangay boleg yo et ompawil kayod Katawan tan masimsimoon yo lan onuren ira yan ganggan to ya iiter kod sikayo natad sayan agew,

3say Katawan a Dios yod satan et kasian to kayo. Papawilen to kayod dalin yo manlapud saray bansan angikayatan tod sikayo, tan paaligwasen to kayo lamet.

4Anggaman a nikayat kayod sankaarawian a sokung na mundo, tiponen kayo na Katawan a Dios yo insan to kayo papawilen,

5pian nakayaryan yo lamet so dalin a nanayaman na saray lalaki yo. Lalon paaligwasen to kayo tan lalon parakelen to kayo nen saray lalaki yo nen saman.

6Say Katawan a Dios yo et itdan to kayo tan saray kabyangay boleg yo na matoluk a puso pian aroen yo ed intiron puso yo, et mansiansia kayon manayam ed saman a dalin.

7Ipelag to ra yan amin a samba ed saray kalaban yo ya amosul tan amairap ed sikayo;

8et tuloken yo lamet tan onuren yo ray amin a ganggan to ya iiter kod sikayo natad sayan agew.

9Say Katawan paaligwasen to kayo ed amin a gawaen yo; nawalaan kayo na amayamay ya anak tan amayamay ya ayayep, tan makaani kayo na daakan ed saray alog yo. No kaonungay impanliket to ya amaaligwas ed saray lalaki yo, ontan met so panliket ton mamaaligwas ed sikayo,

10balet nakaukolan ya onuren yo tan sumpalen yo ray amin a ganggan to a nisulat ed sayan libro na saray bangat to. Nakaukolan a masimsimoon so ipawil yod sikato.

11“Aliwan mairap ya onuren o talusan yan ganggan ya iiter kod sikayo natad sayan agew.

12Aliwan walad tawen. Ag yo la nepeg a tepeten, ‘Siopay onkalab ed tawen ta iyepas tod sikatayo so ganggan, pian nayarian tayon dengelen tan onuren?’

13Aliwa met a walad basil na dayat. Ag yo la nepeg a tepeten, ‘Siopay ombaliw ed dayat ta iyakar tod sikatayo so ganggan, et pian nayarian tayon dengelen tan onuren?’

14Andi, wadyad kawalaan yo so ganggan. Amta yo tan nayarian yon ibitla, kanyan natan onur yo.

15“Natad sayan agew iter kod sikayoy pankanawnawan mampili ed maung tan maoges, bilay tan patey.

16No onuren yo ray iiter kod sikayo natan a ganggan na Katawan a Dios yo, no aroen yo so Katawan, no tuloken yo, tan sumpalen yo ray amin a ganggan to, onaligwas kayo tan magmaliw kayon sakey a bansa ya amayamay iray totoo to. Say Katawan a Dios yo et bindisionan to kayo ed dalin a ngalngali yo la panayaman.

17Balet no sumlangen yo tan ag yo dengelen, tan napalingo kayon mangigalang ed saray arum a diriyos,

18naoput kayo—papasakbayan ta kayo la dia natan. Ag kayo mambilay na andokey ed dalin a ngalngali yo la panayaman diad nibaliw na Jordan.

19Iiter kod sikayo natan so pankanawnawa yon mampili ed bilay tan patey, bindisionan na Dios tan say samba na Dios, tan tatawagen koy tawen tan dalin a mantasi no antoy pilien yo. Pili yo so bilay.

20Aro yo so Katawan a Dios yo, onur yo tan mansiansia kayon matoor ed sikato, et diad ontan saray kabyangay boleg yo et mambilay ira na andokey ed dalin ya insipan ton iter ed saray lalaki yon di Abraham, Isaac, tan Jacob.”