Deuteronomio 2 - Pangasinan Meaning-Based Bible(MBBPAN83)

1pinmoliktar itayo tan amaarap itayod kalawakan ya anggad dalan a mamaarap ed Dayat na Akaba, onung na ingganggan na Katawan. Abaybayag tayon nanakar-akar ed kapokdulan na Edom.

2“Insan imbagad siak na Katawan

3ya abayag lan tuloy so panaakar-akar tayod kapokdulan, kanyan nepeg a mamaarap itayod baybay.

4Imbaga tod siak ya ibagak ed sikayo ray onggendan a bilin: ‘Ngalngali yo la nabatak so kapokdulan a dalin na Edom, say dalin na saray kakanayon yo a saray kabyangay boleg nen Esau. Ontakot irad sikayo,

5balet ag yo igagapoy mibakal ed sikara, lapud ag ta kayo itdan na anggan sansankarangan a dalin da. Inter ko lay dalin na Edom ed saray kabyangay boleg nen Esau.

6Nayarian yoy mansaliw na kakanen tan danum ed sikara.’

7“Nunot yo no panoy impamindision na Katawan a Dios yo ed amin a ginagawa yo. Inasikayo to kayo legan yon nanaakar-akar ed sayan maawang a kalawakan. Apataploy taon ya inolup to kayo, tan ag kayon balut kinmulang ed antokaman a nakaukolan yo.

8“Kanyan intuloy tayoy kurang tayo tan tinaynan tayoy dalan a manlapud saray baley na Elat tan Ezion-geber tan mamaarap ed Dayat ya Inatey, insan linmiko tayod baybay a bokig a mamaarap ed Moab.

9Say Katawan kuantod siak, ‘Ag yo gugunigonen iray totood Moab, saray kabyangay boleg nen Lot; ag yo igagapoy mibakal ed sikara. Inter ko lad sikara so siudad na Ar, tan ag ta kayo itdan na anggan anton parti na dalin da.’”

(

10Nen saman nanayam ed Ar iray makapanyarin poli na alan a tatawagen ira na Emim. Ankakabaleg iran singa saray Anakim a sananey a poli na alan.

11Atawag met ira na Refaim a singa saray Anakim; balet saray Moabita tinawag da ra na Emim.

12Nanayam met nen saman ed Edom iray Horeo, balet pinapaway ira na saray kabyangay boleg nen Esau, dinederal day bansa ra, tan nanayam irad man a singa impamapaway na saray Israelita ed saray kalaban da diad dalin ya inter ed sikara na Katawan.)

13“Insan binaliw tayoy Ilog na Zered onung na imbagad sikatayo na Katawan.

14Talomplo tan walo tan taon ed saman so linmabas kayariy intaynan tayo manlapud Cades-barnea. Inaatey lan amin iray lalakin bumabakal ed saman a kailalakan, onung na imbaga na Katawan a pansumpalan da.

15Intuloy na Katawan a dinusa ra ya anggad naoput iran amin.

16“Kayariy impatey dan amin,

17inkuan na Katawan ed sikatayo,

18‘Diad sayan agew ondalan kayod dalin na Moab diad Ar.

19Asingger kayo lad satan ed dalin da ray Ammonita, saray kabyangay boleg nen Lot. Ag yo ra gugunigonen; ag yo igagapoy mibakal ed sikara, lapud ag ta kayon balut itdan na parti na dalin ya inter ko lad sikara.’”

(

20Sayan dalin et tatawagen met a dalin da ray Refaim, say ngaran da ray totoon nanayam diman nen saman; Zamzummim so impanawag ed sikara na saray Ammonita.

21Singa kaatagey na saray Anakim so kaatagey da. Amayamay ira tan makapanyari ran poli. Balet dineral ira na Katawan, kanyan inala na saray Ammonita so dalin da tan nanayam irad man.

22Onya met so ginawa na Katawan ed saray Edomita a kabyangan ira na boleg nen Esau a manaayam ira ed kapokdulan a dalin na Edom. Dineral to ray Horeo kanyan inala na saray Edomita so dalin da tan nanayam irad man, tan manaayam ni rad man ya anggad natan.

23Say dalin a gilig na dayat na Mediteraneo et nanayaman na saray totoon taga isla na Creta. Dineral da ray Avvim a totoon gendat a manaayam ed sayan pasen tan inala day amin a dalin da ya anggad baybay diad siudad na Gaza.)

24“Kalabas tayod dalin na Moab, say Katawan inkuantod sikatayo, ‘Natan, ituloy yoy kurang yo tan baliw yoy Ilog na Arnon. Ipasilong kod pakayari yo si Sehon ya ari da ray Amorreo a manooley ed Hesbon, tan say dalin to. Dogpaan yo, tan igapo yon panayaman so dalin to.

25Manlapud sayan agew pagmaliwen kon ontakot ed sikayo iray totood inerman a pasen. Diad pakabitla labat ed ngaran yo onggiwgiw lad takot so balang sakey a too.’

Tinalo na saray Israelita si Ari Sehon(Bil. 21:21-30)

26“Insan manlapud kalawakan na Kedemot angibaki ak na totoo ed kinen Ari Sehon na Hesbon ya impaibagak ed sikato ira yan salita a mangiter na kareenan:

27‘Padalan mo kami pad dalin mo. Tuloy-tuloy kamin ondalan tan ag kamin balut oniwas.

28Bayaran mi so antokaman a naakan tan nainom mi. Anggapoy arum a gawaen mi no ag say ondalan labat ed dalin mo,

29ombaliw ed Ilog na Jordan ya anggad pakasabi mid dalin ya iter ed sikami na Katawan a Dios mi. Saray kabyangay boleg nen Esau a manaayam ed Edom, tan saray Moabita a manaayam ed Ar et inabuloyan da kamin dinmalan ed dalin da.’

30“Balet ag itayo inabuloyan nen Ari Sehon ya ondalan ed dalin to. Impagmaliw na Katawan a Dios yo ya anawet so puso to tan mananumlang, pian taloen tayo tan naala tayoy dalin to, say dalin a panaayaman tayo ni ya anggad natan.

31“Insan say Katawan kuantod siak, ‘Nengneng mo, impalimak lad sikayo si Ari Sehon tan say dalin to; ala yoy dalin to tan panayaman yo.’

32Sinmabiy Sehon tan amin da ray totoo to tan nilabanan da itayo diad asingger ed baley na Jahaz,

33balet say Katawan a Dios tayo impatalo to rad sikatayo; pinatey tayoy Sehon, saray anak ton lalaki, tan amin da ray totoo to.

34Dinadakep tan dinederal tayo ray amin a baley da, tan pinapatey tayo ray amin a lalaki, bibii, tan saray ogogaw. Anggapoy intilak tayon mabilay ed sikara.

35Inaala tayo ray ayayep da tan saray kayamanan da ray baley da.

36Say Katawan a Dios tayo et inabuloyan to itayon anakep ed amin da ray baley a manlapud Aroer, a walad samput na patar na Arnon, tan manlapud siudad ed pegley na saman a patar ya anggad Galaad. Anggapoy siudad ya ag tayo ayarian so padir to.

37Balet ag tayo sinmingger ed dalin da ray Ammonita odino linmad saray gilig na Ilog na Jaboc odino diad saray baley ed kapokdulan a dalin odino diad saray arum a pasen a say Katawan a Dios tayo et insebel ton laen tayo.