1Diad saman a taon, nen kumaliman bulan na kumapat a taon na panaari nen Sedekias, akisalitad siak ed Timplo si Ananias a lakin anak nen Azur, sakey a propitan taga Gabaon. Diad arap na saray papari tan saray totoo imbaga tod siak
2a say Katawan a Makapanyarin-amin, say Dios na Israel, et inkuanto, “Dineral koy pakayari na ari na Babilonia.
3Diad loob na duay taon ipawil kod sayan pasen iray amin a kayamanan ed Timplo ya inaala ra nen Ari Nabucodonosor tan inaawit to rad Babilonia.
4Ipawil ko met diay lakin anak nen Joakim a si Joakin ya ari na Juda. Kaiba ton ompawil iray amin a totood Juda a nibantak ed Babilonia. On, deralen koy pakayari na ari na Babilonia. Siak, say Katawan, so nansalita.”
5Insan akisalita ak ed kinen propita Ananias diad arap da ray papari tan saray arum a totoo a manalalagey ed dalem na Timplo.
6Inkuanko, “Amen! Ilaloan kon gawaen na Katawan so ontan. Ilaloan kon sumpalen na Katawan ira tan ya amin a salitam. Ipawil to komun manlapud Babilonia iray amin a kayamanan ed Timplo tan saray amin a totoon adakep ed arawin lugar.
7Balet dengel moy ibabagak ed sika tan saray totoo.
8Saray propitan nansalita nen abayag lan panaon kasakbayan na panaon ko tan panaon mo, impropisiya ray idalan na bakal, eras, tan salot ed saray amayamay a bansa tan saray makapanyarin nanarian.
9Balet say propitan mangipropisiya na kiwalay kareenan et nabirbir labat a propita ya imbakin peteg na Katawan, no ontua ray salita to.”
10Insan inala nen Ananias so pakon walad beklew ko tan pinopoter to.
11Diad arap na amin a totoo inkuanko, “Inkuan na Katawan ya onyay pamoter to ed pakon inyan nen Ari Nabucodonosor ed tenger na saray amin a bansa; gawaen to ya ed loob na duay taon.” Insan ak la tinmaynan.
12Ag abayag kayari to ya, inkuan na Katawan ed siak
13ya onla ak a mangikuan ed kinen Ananias, “Inkuan na Katawan a nayarian mon poteren so pakon kiew, balet salatan to na pakon balatyang.
14Inkuan na Katawan a Makapanyarin-amin, say Dios na Israel, ya inan toy pakon balatyang so tenger na sarayan amin a bansa, tan panlingkuran day Ari Nabucodonosor iray ayayep ed katakelan.”
15Insan inkuankod kinen Ananias, “Dengel ka, Ananias! Ag ka imbaki na Katawan, tan gagawaen mon manisiad tila ira yan totoo.
16Kanyan, ibabagay Katawan a paandipaten to ka. Ompatey kad sayan taon, ta imbagam ed saray totoo ya onlaban irad Katawan.”
17Inatey si Ananias nen kumapiton bulan ed saman a taon.
Who We AreWhat We EelieveWhat We Do
2025 by iamachristian.org,Inc All rights reserved.
