1Ag abayag, pinagalangan nen Ari Asuero so sakey a lakin manngaran na Haman ya anak nen Hamedata a Bugayo, diad panamegley na impangitagey tod kipapasen to. Nagmaliw si Haman a kumadwan sankatageyan ya opisyal na impirio.
2Ingganggan na ari ed saray opisyal a manlilingkur ed sikato a galangen day Haman diad panamegley na ituek dad sikato. Ginawa da yan amin likud ed kinen Mardokeo ya ag to labay so ontuek ed kinen Haman.
3Tinepet ed sikato na saray arum ya opisyal a manlilingkur ed ari no akin et ag to oonuren so ganggan na ari.
4Agew-agew dan tatanggoyuren ya ontoluk, balet ag to ra dengelen. Impaliwawa to, “Sakey ak a Judio, kanyan ag ko nayariay ontuek ed kinen Haman.” Kanyan indalem dad kinen Haman no panoy ag itotoluk nen Mardokeo ed ganggan na ari.
5Mapalaloy pasnuk nen Haman nen akabatan ton ag ontutuek ed sikato si Mardokeo,
6kanyan implano ton pateyen so balang Judio ed intiron Impirio na Persia.
7Diad kumalabinduan taon na panooley nen Ari Asuero, ingganggan nen Haman a gawaen so pampapalaranan, ta amtaen to no dinay manepeg ya agew tan bulan a pamatey ed saray Judio diad saksakey ya agew. Apili so kumalabinapat ya agew na bulan na Adar.
8Kanyan inkuanen Haman ed ari, “Walay sakey a poli na totoo a nitaytayak ed saray bansa ed intiron impiriom. Nidomad arum a totoo iray totombuken dan kaogaliyan. Sakey ni, ag da oonuren iray ganggan na impirio, kanyan ag mo pankaabigan so pamaolyan mod sikara.
9No labay na Kagalang ya Ari, mangipaakseb kay sakey a ganggan a nepeg iran pateyen. No gawaen mo ya, isipan ko a mangyan ak ed panagsinupan na kayamanan na ari na talon lasus tan pitomplo tan liman toniladan pilak.”
10Inekal na ari so singsing to ya ikakanad pantimbri ed saray opisyal a ganggan, tan inter tod kinen Haman a pantimbri ed ganggan ya isulat sumpad saray Judio.
11Imbagad sikato na ari, “Kien mo la tay kuartam, tan gawam so labay mo ed saratan a klasiy totoo.”
12Kanyan diad kumalabintalon agew na ononan bulan, tinawag nen Haman iray sikritario na ari tan indikta toy ganggan a nepeg ya ipatalus ed balang salita ed impirio tan nepeg ya ipawit ed amin da ray manoley tan saray gobirnador. Nipaakseb ed ngaran nen Ari Asuero tan nipawit ed amin da ray sanlasus tan duamplo tan piton luyag a nilaknaban day manlapud India ya anggad Sudan.
13Inyakar na saray ibabaki iyan ganggan ed balang luyag na impirio. Nilogan ed saya iray bilin a diad saksakey ya agew diad kumalabinduan bulan, say bulan na Adar, nepeg a pateyen ya amin iray Judio tan alaen iray kayaryan da.
Who We AreWhat We EelieveWhat We Do
2025 by iamachristian.org,Inc All rights reserved.
