2 Saray Arari 25 - Pangasinan Meaning-Based Bible(MBBPAN83)

Say Inkatalo na Jerusalem(2 Awa. 36:13-21; Jer. 52:3b-11)

1Linmaban si Sedekias ed Ari Nabucodonosor na Babilonia. Kanyan diad kumaplon agew na kumaplon bulan na kumasyam a taon na panooley nen Sedekias, linmad Jerusalem si Nabucodonosor tan amin da ray sondalo to, ta dogpaan da. Nankampo rad paway na siudad, pinaliberan da na panagguardiaan,

2tan nilakob da ya anggad kumalabinsakey a taon na panooley nen Sedekias.

3Nen kumasyam ya agew na kumapat a bulan na saman lamlamang a taon, nen mapalaloy eras tan anggapo lay nakan na saray totoo,

4abongaw na saray kalaban so padir na siudad. Anggaman a nilakob na saray taga Babilonia so siudad, akabatik ed labi so ari tan amin da ray sondalo na Juda. Dinmalan irad puirtan nanleetan na duaran padir ya asingger ed tanamanan na ari. Batik iran amaarap ed Patar na Jordan.

5Balet inosilan na saray sondalon taga Babilonia si Sedekias tan adakep da diad nipatar a pasen ya asingger ed Jerico; inkaindan na amin da ray sondalo to.

6Niakar si Sedekias ed kinen Ari Nabucodonosor a walad siudad na Ribla tan diman to sinintinsiaan si Sedekias.

7Diad arap nen Sedekias so amateyan ed saray anak ton lalaki; insan impasokit nen Nabucodonosor iray mata to, impagolunggolungan to, tan impaiyakar tod Babilonia.

Say Inkaderal na Timplo(Jer. 52:12-33)

8Nen kumapiton agew na kumaliman bulan na kumalabinsiam a taon na panooley nen Nabucodonosor ed Babilonia, linmoob ed Jerusalem si Nebuzaradan a sumisimbawa na ari tan pangulo na saray sondalo na ari.

9Pinoolan toy Timplo, say palasio, tan say kaabungan na amin da ray totoon atagey so kipapasen ed Jerusalem,

10tan ginegeba na saray sondalo to iray padir na siudad.

11Insan inawit nen Nebuzaradan ed Babilonia iray totoon atilak ed siudad, saray atilak a marunong a kumikimey, tan saray akigampid saray taga Babilonia.

12Balet intilak tod Juda so pigaran totoon sankamairapay bilay tan anggapoy kayaryan, insan impankimey to rad kaubasan tan diad kaalogan.

13Minekmek na saray taga Babilonia iray gansan lusek tan saray panangipatoonan a walad dalem na Timplo. Minekmek da met so gansan dipositoway danum, insan da inawit ed Babilonia iray amin a gansa.

14Inawit da met iray pala, tan say pananginay dapul ya ikakanad panaglinis na altar, saray panagpotut na pabiloy lamparaan, saray yaung a panagsaluran na dala na saray ayayep ya ibagat, saray yaung ya ikakanad pampool na insinso, tan amin da ray arum a gansan bengatla ya ikakanad panaglingkur ed dalem na Timplo.

15Inawit da ray amin a bengatlan balituk o pilak, pati saray ankekelag ya yaung tan saray palangganan pananginan na ngalab.

16Ambelat a tuloy a simbangen iray bengatlan gansa a ginawa nen Ari Solomon a para Timplo—saray duaran lusek, saray panangipatoonan, tan say balbaleg a dipositoway danum.

17Nampara ira may duaran lusek: waloran mitro so kaatagey na balang sakey tan walay olo-olo ton gansa a sakey tan kapalduan mitro so kaatagey to. Apaliberan na gansan alaga-laga tan adikoraan na saray gansan bungay kiew a granada.

Niakar ed Babilonia iray Totood Juda(Jer. 52:24-27)

18Si Nebuzaradan, say pangulo na saray sondalon taga Babilonia et inala to met a priso ira di Seraya a Pangulon Pari, Sofonias ya onkumadwad Pangulon Pari, tan saray talora nin manonan opisyal na Timplo.

19Manlapud siudad, inawit toy pangulo nen saman na saray sondalo, limarad saray sumisimbawa na ari a wala ni rad siudad, saray sikritario na pangulo da ray sondalo a makaoley ed listaay sondalo, tan anemaplo nin manona ran totoo.

20Inyakar to ra ed ari na Babilonia a walad siudad na Ribla,

21diad dalin na Hamat. Impapairap irad man na ari, insan to ra impapatey.

Kanyan saray totood Juda et nakal irad dalin da tan niakar irad arum a bansa.

Si Gedalias a Gobirnador na Juda(Jer. 40:7-9; 41:1-3)

22Impagmaliw nen Ari Nabucodonosor na Babilonia si Gedalias a lakin anak nen Ahican tan apo nen Safan a gobirnador na dalin na Juda, tan impasen ton makaoley ed amin da ray totoon ag niakar ed Babilonia.

23Nen nadngelan ya na saray opisyal tan saray sondalon ag sinmuko, akitipon irad kinen Gedalias diad Mizpa. Sarayan opisyal et di Ismael a lakin anak nen Netanias, Johanan a lakin anak nen Karea, Seraya a lakin anak nen Tanhumet a taga baley na Netofa, tan Jaazanias a taga Maaca.

24Inkuanen Gedalias ed sikara, “Sambaan kod sikayo ya anggapoy nepeg yon takotan ed saray opisyal a taga Babilonia. Manayam kayod sayan dalin, manlingkur kayo ed ari na Babilonia, et maung ya amin so pansumpalan yo.”

25Balet diad kumapiton bulan na saman met lamlamang a taon, si Ismael a lakin anak nen Netanias tan apo nen Elisama tan kabyangan na pamilyay ari et linmad Mizpa a kaiba to ray samploran lalaki, dinogpaan day Gedalias tan pinatey da. Pinatey da met iray Israelita tan saray taga Babilonia a kakaiba nen Gedalias.

26Insan tinmaynan tan linmad Egipto iray amin ya Israelita, mayaman may mairap-bilay, pati saray opisyal na sondalo, lapud antakot irad saray taga Babilonia.

Nibolus ed Prisowan si Joakin(Jer. 52:31-34)

27Nen taon a nagmaliw ya arid Babilonia si Evilmerodac, kinasian ton impaway ed prisowan si Joakin. Agawa ya nen kumaduamplo tan piton agew na kumatalomplo tan piton taon na inkadakep nen Joakin.

28Kinasian nen Evilmerodac, tan atagtagey so inter tod sikaton kipapasen nen saray arum ya ararin niakar a priso ed Babilonia.

29Kanyan naabuloyan si Joakin a mansalat na kawes ton kawes na priso tan mirongo ed ari legan na impanbilay to.

30Naitdan ya inagew-agew na kuartan gastosen to a para sikaton dili legan ton nambilay.