Sirac 25 - Pangasinan Meaning-Based Bible(MBBPAN83)

Saray Totoon Kanepegan day Idayew

1Walay taloran bengatlan nidomadomay pakaliliket kod sikara—saray bengatlan marakep ed Katawan tan too:

saray lalakin sanaagi a maung so panoolup da,

saray sanaabay a sankakaaro,

tan say sanasawan maliket so impankasakey da.

2Walay taloran klasiy totoo ya ag ko ra naanosan, ta mapalalon makapaingungot so kagagawa ra:

saray totoon mairap-bilay a mapaatagey,

saray mayaman a mitala,

tan saray makulang-kulang a mamasiken a mikakaloguran.

3Likud a gawaen moy anggaay nayarian mon manaral legan a malangwer ka ni, ag kan balut magmaliw a makabat no ontakken ka.

4Marakerakep a manoolup so dugan panagsintinsia, maung a simbawa, tan olon obanan.

5Manepeg a niwalad toon matakken tan gagalangen so kakabatan, pakatalus, tan dugan simbawa.

6Sankasolung na matakken a totoo so korona na dakel a salsalid bilay tan anggapoy lalon marakep a nikinon da nen say itatakot dad Katawan.

7Ibagak ed sikayo so nipaakar ed samploran klasin totoo ya ipapasen kon kapalaran so impikabat ed sikara, nagkalalo lad kumasamplo:

say toon ikikinon to ray anak to,

say toon nanengneng ton napepelag iray kalaban to,

8say lakin mapalar lapud walaan na asawan makatalus

say sanasawan marakep so impanparis da,

say toon ag balut mankakasalanan ed pansasalita to,

say toon ag nepeg a mankimey para toon daeg tod donung,

9say toon mapalar lapud walay tuan kaaro to,

say toon pakaliliketan a dengelen na saray totoo,

10tan say toon peteg a matalonggaring: say toon makabat.

Balet say sankatalonggaringan ed amin et say toon tatakotan toy Katawan.

11Anggapoy mipara ed sayan too, lapud sankamanonad amin a bengatla so itatakot ed Katawan.Bibii

13Anggapoy sugat ya aralem ni nen say asugat a puso. Anggapo ray gunigon ya ambelat ni nen saray gunigon ya iiter na bibii.

14Anggapo ray kairapan a mapalalo ni nen saray kairapan ya iiter na totoon mamobosul ed sika. Anggapoy panagbales a mapalalo ni nen say panagbales na sakey a kalaban.

15Anggapoy samal a lalon makapatey nen say samal na oleg, tan anggapoy pasnuk a lalon makapatey nen say pasnuk na bii.

16Labay ko niy manayam ed abung a kawalaay lion odino dragon nen say miamung ed maoges ya asawa.

17No mamapasnuk so asawan bii, mangoman so nengneng to ya anggad singa mamapasnuk ya uso so nengneng to.

18Say asawa to nepeg ya onlan mangan ed saray kakaabay to a diman ag to napokpokan so ompait a liknaan to.

19No iparad saray gunigon ya iiter na bibii, melmelag iray arum a gunigon. Nasagmak komun na onya ran bibii so pansusumpalan na saray makasalanan!

20Say mareen a lakin miaamung ed sakey a biin makolkol et singa masiken ya onkakalab ed mabuer a pokdul.

21Ag mon balut dederaley olom lapud ganggana na sakey a bii, tan ag mo sasagyatey sakey a bii lapud mayaman.

22No lelegpeten na asawan bii so asawa to, andi-duaruwan walay pasnuk, panagpaatagey, tan panagpabaing.

23Pabelengen tan paermenen a mapalalo na maoges ya asawan bii so asawa to, tan sugatan tod puso. Ipanengneng yod siak so sakey a lakin mabaing ya ag to makapannunot a bukor, et ipanengneng kod sikayoy sakey a biin ag to paliliketen so asawa to.

24Ginmapod bii so kasalanan, tan ompatey itayon amin lapud sikato.

25No panoy ag mo pangyabuloy ya onterter so dipositoway danum mo, ontan met so ag mo pangyabuloy ed maoges ya asawa a gawaen toy labay to.

26No ag to gawaen so ibabagam ed sikato, isian mo.