2 Samuel 7 - Pangasinan Meaning-Based Bible(MBBPAN83)

Say Balita nen Natan ed kinen David(1 Awa. 17:1-15)

1Manaayam la natan si Ari David ed palasio to, tan inyagel na Katawan ed amin da ray kalaban to.

2Insan inkuan na ari ed kinen propita Natan, “Wadya ak a manaayam ed abung a sidro, balet say Kaban na Sipanan na Dios et akasinup labat ed dalem na sakey a tulda!”

3Inmebat si Natan, “Gawam labat so antokaman a walad kanunotan mo, ta walad sika so Katawan.”

4Balet diad saman a labi inkuan na Katawan ed kinen Natan.

5“Laka, ta ibagam ed aripen kon David a kuankod sikato, ‘Aliwan sikay mamaalagey na timplon panayaman ko.

6Nanlapu lad impangipaway kod saray totood Israel ed Egipto ya anggad natan, ag ak balut nanayam ed dalem na timplo; diad dalem na tulday nanaayaman ko tan nanaakar-akar ak.

7Diad impipilak ed saray totood Israel ag kon balut tinepet ed siopaman a pinilik a panguloy Israel no akin et ag to ak impaalageyan na timplo a sidro.’

8“Kanyan ibagam ed aripen kon David a siak, say Katawan a Makapanyarin-amin, kuankod sikato, ‘Inekal ta kad panagpastol moy karniro ed kaalogan, insan ta ka ginawan manoley ed saray totook ya Israel.

9Kaiba ta ka ed anggan iner a nilam, tan tinalok iray kalaban mo diad indogpam. Gawaen ta kan matalonggaring a singa saray sankatalonggaringan a pangulod intiron mundo.

10-11Amili ak na sakey a pasen a para saray totook ya Israel tan impanayam ko rad man ya ag la ra nasigensigen. Nanlapu lad inloob dad sayan dalin, dinodogpaan ira na maruksan totoo, balet ag la ya nagawad sikara. Isipan kon iyagel ta kad saray kalaban mo, tan parakelen ko ray kabyangay boleg mo.

12No ompatey ka tan nipompon kad kawalaan da ray lalakim, gawaen kon ari so sakey ed saray anak mo tan pabiskegen koy nanarian to.

13Sikatoy mamaalagey na sakey a timplon para siak, tan pansiansiaen ko ya anggad angga so nanarian to.

14Siak so ama to tan sikatoy magmaliw ya anak ko. No manggaway maoges, dusaen kon singa panusay ama ed anak to.

15Balet ag ko ekalen so ag mangoman a panangarok ed sikato, aliwan singa ginawak ed kinen Saul.

16Nawalaan ka lawas na saray kabyangay boleg mo, tan pansiansiaen ko ya anggad angga so nanarian mo.’”

17Imbaga nen Natan ed kinen David iray amin ya impaamtay Dios ed sikato.

Say Pisasalamat nen David(1 Awa. 17:16-27)

18Si Ari David linmoob ed Tuldan Ayamay Katawan, inmirung tan nampikasi, “Aliwak a manepeg, anggan say pamilyak, et antokaman a ginagawam lad siak, Katawan a Dios.

19Balet natan, lalon dakel so gagawaen mo, Katawan a Dios; nansipan kay nipaakar ed saray kabyangay pamilyak diad arapen a panaon. Inyabuloy mon naamtaan ya na too, Katawan a Dios!

20Anto niy nayarian kon ibagad sika? Kabkabat mo ak, say aripen mo.

21Linawam tan getmam a gawaen ya; ginawam ira yan amin a bengatla pian nibangat mo ak.

22Agaylay inkatalonggaring mo, Sankatageyan a Katawan! Anggapoy miparad sika; amta mi lawas a bukbukor mo so Dios.

23Anggapoy arum a bansa diad tapew na dalin a miparad Israel. Inyagel mod inkaaripen iray Israelita tan ginawam ira a totoom. Diad panamegley na saray ankabaleg tan makapakelaw a ginagawam para sikara, kinmayat ed intiron mundo so dayew mo. Pinataynan mo ray taga arum a bansa tan saray diriyos da legan a mankukurang iray totoom, saray totoon impaway mod Egipto pian nakayaryan mo ra.

24Ginawam ya andi-anggaan a totoom so Israel tan sika, Katawan, so nagmaliw a Dios da.

25“Katawan a Dios, sumpal mo pad amin a panaon so insipan mo nipaakar ed siak tan saray kabyangay boleg ko, tan gawam pay onung na sinalitam.

26Nitanduro ka tan lawas ikuan na saray totoo, ‘Say Katawan a Makapanyarin-amin so Dios ed intiron Israel.’ Pansiansiaen moy nanarian ko,

27O Katawan a Makapanyarin-amin a Dios na Israel! Matalek kon ipikasi yad sika, ta impuyan mo yan amin ed siak ya aripen mo, tan imbagam ed siak a gawaen mon arari iray kabyangay boleg ko.

28“Katawan a Dios, sika so Dios; susumpalen mo lawas iray sipan mo, et insipan mod siak yan maung a bengatla.

29Kerewen kod sikan bindisionan mo ray kabyangay boleg ko, tan pansiansiam yan bindision ed sikara. Sika, Katawan a Dios, so angisipan ed saya; mansiansian ando lan ando ed saray kabyangay boleg mo so bindision mo.”