Job 22 - Pangasinan Meaning-Based Bible(MBBPAN83)

Say Kumatlon Tongtongan(22:1–27:23)

1Inmebat si Elifaz:

2“Wala tay too, anggan sikatoy sankakabatan,

a nayarin makana ed Dios?

3Manliket kasiy Dios lapud matonung ka,

odino wala kasiy nagunggona to no anggapoy pakabalawan ed panagbilay mo?

4Aliwan lapud walay takot mod Dios

so makasengeg na pamapasnuk tan panisintinsia tod sika.

5Andi, no ag ingen lapud dakerakel iray kasalanan mo,

tan lapud ag ontonday kaogsan mo.

6Pian makabayar so agim ya akautang ed sika,

inalam iray kawes to kanyan anggapoy nisolung to.

7Ag mo initdan na inomen iray naksawan,

tan ag mo initdan na nakan iray narasan.

8Inkanam so pakayarim tan kipapasen mo pian naalam so intiron dalin.

9Ag mo tinulongan iray balon bibii a sinmisingger ed sika;

tinatakewan tan pinapairap mo ray olila.

10Kanyan natan aliber ka na saray patit,

et biglan mapalaloy kataktakot mo.

11Binmilonget kanyan ag ka makanengneng,

et tabunan kay danum na delap.

12Ag ta manaayam ed sankatageyan a tawen so Dios,

tan ososdongan to ray bitewen anggaman ya atagtagey ira?

13Balet tetepeten mo, ‘Antoy amta na Dios?

Asaniban na lorem—panoy pakapansintinsia tod sikatayo?’

14Abaloan mo ya ag makanengneng so Dios, ta asaniban na makapal a lorem,

legan a manaakar ed tapew na tambobung na tawen.

15Mansiansia kan mankurang ed

dinadalan na saray totoon maoges?

16Kasakbayan na insabiy panaon da,

sinmabiy delap ya angyanur ed sikara.

17Sikara yay totoon angipolisay ed Dios

tan inisip dan anggapoy nagawaan tod sikara.

18Balet diad tuay tua say Dios so amaaligwas ed sikara—

ag ko natalusan iray kanunotan da ray totoon maoges.

19Maliket iray maung a totoo tan makakalek iray matonung

no nanengneng dan nadusa ray totoon maoges.

20Ikuanda, ‘Aderal so kayamanan da ray totoon maoges,

tan pinadapul na apoy so antokaman nin nakdaan.’

21Job, mipulangan ka la natan ed Dios

tan ag mo la ipapasen a kalaban mo;

no gawaen moy onya, bindisionan to ka.

22Awat moy bangat ya iiter to;

iyan mod pusom iray salita to.

23On, nepeg kan ompawil a sipapaabeba ed Dios,

tan ekal mo lay amin a kaogsan a nagagawad dalem na abung mo.

24Ibantak mo ray balituk mo;

tan ibasuram ed nakatan a kelas iray sankaabigan a balituk mo.

25Ipasen mo lan say Makapanyarin-amin a Dios so balituk mo

tan sankaabigan a pilak mo.

26Diad ontan manmatalek ka lawas ed Dios

tan narumog mo a sikatoy sobul na gayagam.

27No mampikasi ka, ebatan to ka,

et diad ontan sumpalen mo ray sipan mo.

28Onaligwas ka ed amin a gawaen mo,

tan onsindag so liwawa ed dalan mo.

29Paabebaen na Dios iray mapaatagey

tan iyagel to ray mapaabeba.

30Iyagel to ka no anggapoy kasalanan mo,

no say kaptekan so gawaen mo.”