1Sikato yay propisiya a nipaakar ed Babilonia.
Say deral a manlalapud makapatak-takot a pasen et onsabin singa alimbusabos ya ombebeltang ed kalawakan.
2Nipasingayew ed siak so nipaakar ed saray maruksan nagawa a nipaakar ed panagtraidor tan panagderal.
Sondalo na Elam, dogpa kayo! Sondalo na Media, looban yo ray siudad! Panganggaen la na Dios so panamairap na Babilonia.
3Lapud samay anengneng tan nadngel ko ed samay pasingayew, ataktakot ak tan nairapan ak tan singa ak biin mampapasakit.
4Nanaelaw ak tan manggiwgiw ak ed takot ko. Nampilalekan kon onsabi lay kabwasan, balet lalon baleg a takot so inter tod siak.
5Diad samay pasingayew, sakey a baleg a ponsia so akaparaan. Akaaplag lad datal so alpombra a yorunga na saray bisita. Manaakan tan maniinom ira. Kabebekta nieyag so sakey a ganggan, “Sikayo ran opisyal na saray sondalo! Iparaan yo ray samper yo!”
6Insan inkuan ed siak na Katawan, “Laka a mangipasen na guardia, tan ibagam ed sikaton ibawag toy nanenengneng to.
7No nanenengneng to ray onsasabin lalaki ya akakabayo a manoolup so kapag duara, tan saray lalakin akalogan ed asno tan kamilyo, nepeg to ran imanoen a maung.”
8Insan say guardia iyeeyag to, “Wadya ak, katawan, a mambabantay ed agew tan labi.”
9Kabebekta nitan la ray lalaki, akakabayo ra tan sanderwa ran nanoolup. Imbawag na samay guardia, “Atalo lay Babilonia! Walad dalin tan atemektemek iray amin a talintaoy diriyos a gagalangen da.”
10Totook a taga Israel, singa kayo trigon nailik-ilik, balet natan imbawag kod sikayo so maung a balitan nadngel ko ed Katawan a Makapanyarin-amin a Dios na Israel.
Say Propisiya a Nipaakar ed Edom11Sikato yay propisiya a nipaakar ed Edom.
Walay nanlapud Edom ya ontatawag ed siak, “Guardia, mabayag niy labi? Magano lay isabiy kabwasan?”
12Ebat ko, “Onkakabwasan la, balet onsabi lamet so labi. No labay mo lamet so ontepet, pawil ka dian ontepet.”
Say Propisiya a Nipaakar ed Arabia13Sikato yay propisiyan nipaakar ed Arabia.
Sikayo ran taga Dedan, a nanoolup a mankakampod kalawakan ed Arabia,
14itdan yoy danum iray totoon napgaan ya onsisingger ed sikayo. Sikayo ran taga Tema, itdan yoy nakan iray pasasayakup ed sikayo.
15Ibabatikan na saray totoo iray ispadan akaparaan a pamatey ed sikara; ibabatikan da ray panan akaparaan a pamanad sikara. Ibabatikan day kaatapan na bakal.
16Insan inkuan ed siak na Katawan, “Diad loob na duga-rugan sakey taon mangangga so inkatalonggaring na saray tribu na Kedar.
17Dagdaiset so natilak a mabilay ed saray masesebeg a pumapana na Kedar. Siak, say Katawan a Dios na Israel, so nansalita.”
Who We AreWhat We EelieveWhat We Do
2025 by iamachristian.org,Inc All rights reserved.
