Esdras 8 - Pangasinan Meaning-Based Bible(MBBPAN83)

Say Totoon Pinmawil ed Jerusalem

1Sikato yay listaan da ray pangulo na saray boleg a nibantak ed Babilonia tan pinmawil ed Jerusalem a kaiba ray Esdras nen si Artajerjes so impirador:

2-14Diad boleg nen Finees, si Gersom

Diad boleg nen Itamar, si Daniel

Diad boleg nen David, si Hatus a lakin anak nen Secanias

Diad boleg nen Paros, si Zacarias a kaiba to ray sanlasus tan limamplon lalakin kabyangay boleg to (wala ray listaan na sengeg na pamilya ra)

Diad boleg nen Pacat-moab, si Elioenai a lakin anak nen Seraias a kaiba to ray duan lasus a lalaki.

Diad boleg nen Zattu, si Secanias a lakin anak nen Jahaziel a kaiba to ray talon lasus a lalaki

Diad boleg nen Adin, si Ebed a lakin anak nen Jonatan a kaiba to ray limamplon lalaki

Diad boleg nen Elam, si Jesaias a lakin anak nen Atalias a kaiba to ray pitomplon lalaki

Diad boleg nen Sefatias, si Zebadias a lakin anak nen Micael a kaiba to ray walomplon lalaki

Diad boleg nen Joab, si Obadias a lakin anak nen Jehiel a kaiba to ray duan lasus tan labinwalon lalaki

Diad boleg nen Bani, si Selomit a lakin anak nen Josifias a kaiba to ray sanlasus tan anemaplon lalaki

Diad boleg nen Bebai, si Zacarias a lakin anak nen Bebai a kaiba to ray duamplo tan walon lalaki

Diad boleg nen Azgad, si Johanan a lakin anak nen Hacatan a kaiba to ray sanlasus tan samploran lalaki

Diad boleg nen Adonikam, di Elifelet, Jeiel tan Semarias a kaiba da ray anemaplon lalaki (naonur iran pinmawil)

Diad boleg nen Bigvai, di Utai tan Zacur a kaiba da ray pitomplon lalaki

Akalmoy Esdras na saray Levitan Manlingkur ed Timplo

15Tinipon ko ya amin iray totoo diad abay na ilog ya onaagos ed baley na Ahava. Nankampo kamid man a taloy agew. Naamtaan kon wala ray papari ed grupo balet anggapo ray Levita.

16Impaawit ko ray siamira ed saray pangulo: Eliezer, Ariel, Semaya, Elnatan, Jarib, Elnatan, Natan, Zacarias, tan Mesullam. Impaawit ko met iray duaran bumabangat a di Joiarib tan Elnatan.

17Imbakik irad kinen Iddo, say pangulo na lugar na Casifia, ta ibaga rad sikato tan saray kakaiba ton kumikimey ed Timplo a mangibaki rad sikami na saray totoon manlingkur ed Dios diad Timplo.

18Lapud panangaro na Dios imbaki rad sikami si Serebias a marunong a laki tan sakey a Levitan kabyangay boleg nen Mahli; akilad sikatoy labinwalo ed saray lalakin anak tan agagi to.

19Imbaki ra met si Hasabias tan si Jesaias a kabyangan iray boleg nen Merari; akilad sikaray duamplo ed saray kakanayon da.

20Likud ed saraya, wala met ni ray duan lasus tan duamplon kumikimey ed Timplo a saray lalaki ra et impasen nen Ari David tan saray opisyal to ya ontulong ed saray Levita. Nilistan amin so kangaranan da.

Impangulo nen Esdras iray Totoo ed Panayuno tan Pampikasi

21Diad abay na Ilog na Ahava ingganggan kon manayuno kamin amin tan mampaabeba kamin amin ed arap na Dios mi. Ingganggan ko met a kerewen min iwanwan to kami ed pambiahi mi tan iyagel to kamid kaatapan, sikami, saray anak mi tan amin a kayaryan mi.

22Ambaing ak lan onkerew ed ari na saray sondalon mangyagel ed sikamid saray kalaban legan min mambiahi, lapud imbagak ed sikaton bindisionan na Dios mi so siopaman a manmatalek ed sikato tan dusaen to so siopaman ya onarawid sikato.

23Kanyan nanayuno kami tan impikasi mid Dios ya iyagel to kami, et inebatan to ray pikakasi mi.

Saray Rigalo a para Timplo

24Pinilik ed saray manonan papari ira di Serebias, Hasabias, tan samplora nid sikara.

25Insan ko sinimbang iray ikanad Timplo a pilak, balituk, tan saray ikakana ya inrigalo na impirador, saray sumisimbawa to, saray opisyal to, tan saray arum ya Israelita. Kasumpal kon sinimbang inter ko rad saray papari.

26-27Saraya so inter kod sikara:

pilak—duamplo tan liman tonilada sanlasus a pilak ya ikakana—pitomplon kilo

balituk—talon libo tan apat a lasus a kilo

duamplon balituk a yaung—pitoran kilo

duaran pinon gansan yaung—kaparay belat na saramay balituk a yaung

28Inkuankod sikara, “Masanto kayod Katawan, say Dios na saray lalaki yo, kanyan masanto met iray amin a pilak tan balituk ya ikakanad Timplo a niiter ed sikato manlapud mabolus a linawa.

29Asikaso yo ran maung anggad nasabi yoy Timplo. Diad loob da ray kuarto na papari, simbang yo rad arap da, insan yo ipalimad saray pangulo na saray papari tan saray Levita, tan diad saray pangulo da ray totood Israel a walad Jerusalem.”

30Kanyan inasikaso na saray papari tan saray Levita iray pilak, balituk, tan saray ikakana ya iyakar dad Timplo ed Jerusalem.

Say Impawil ed Jerusalem

31Tinaynan miy Ilog na Ahava nen kumalabinduan agew na ononan bulan, insan amaarap kamid Jerusalem. Kaiba mi so Dios mi tan inyagel to kamid idogpa tan panabat na saray kalaban legan min nambiahi.

32Nen akasabi kamid Jerusalem, nampainawa kami na taloran agew.

33Insan diad kumapat ya agew linma kamid Timplo, sinimbang mi ra may pilak, balituk, tan saray ikakanad Timplo. Kayari mi ran sinimbang, impalima mi rad kinen Meremot a pari a lakin anak nen Urias. Kaiba toy Eleazar a lakin anak nen Finees, tan duaran Levita a di Josabad a lakin anak nen Jesua tan Nodias a lakin anak nen Binui.

34Abilang, asimbang, nilista ran amin.

35Amin a pinmawil a nanlapud arum a bansan nibantakan da et angisaklang irad Dios na Israel na saray bagat a popoolan. Angibagat ira na labinduan bakan kalakyan para amin ya Israelita, anemaplo tan siam a karniron kalakyan, pitomplo tan piton kordiro; angibagat met ira na labinduan kanding pian napaandi ray kasalanan da. Amin da ra ya et bagat a popoolan ed Katawan.

36Inala da may kaletan ton inter ed sikara na ari, insan da inyawat ed saray gobirnador tan saray opisyal na Luyag na Sagur na Eufrates. Sarayan angyawatan da et tinmutulong ira ed saray totoo tan diad panangigalang ed Timplo.