Job 14 - Pangasinan Meaning-Based Bible(MBBPAN83)

1“Nianak a makapoy so too;

antikey tan magunigon so bilay to.

2Ombaleg, ombuskag tan nalaylay a singa saray rosas;

naandipat a singa saray anino.

3Iimanoen moy anggan siak, O Dios,

odino sasalaysayen tan sisintinsiaan mo ak?

4Anggapoy malinis a napapaway

ed antokaman a marotak a singa say too.

5Walay nigetar a dokey na bilay na too—

nigetar lay bilang na bulan a pambilay to.

Sikay angipasen na panganggaan to et ag to nalabsanan.

6Ag mo la kari nenengnengen tan paolyan mo lan bokur;

paolyan mon panliketan toy mairap a bilay to—

no nayarian to.

7Wala niy ilalo ed sakey a kiew ya abatang;

nayari nin onsimit tan mansanga.

8Anggaman a matakken la ray lamut to,

tan aboluk lad dalin so akeraan a sengeg to,

9no nasalog-salog onsimit ni,

tan mansangan singa malangwer a tanaman.

10Balet no ompatey so too, anggaan to la;

no naoyus so linawa to, iner lad satan so kawalaan to?

11Onsabiy panaon ya ontondan onagos so ilog,

tan naekatan so anggan dayat.

12Ontan met say toon inatey ag lan balut ombangon;

ag la nabangon anggad mangangga ray katawenan;

ag lan balut naliing ed ogip to.

13Iyamut mo ak komun ed pasen a panaayaman da ray inaatey;

iyamut mo ak diman ya anggad napakepay pasnuk mo,

insan iganam so panaon a nunoten mo ak.

14No ompatey so too, nabilay ni kasi?

Balet manalagar ak na magmaung a panaon,

anggad napalabas yan panaon na gunigon.

15Insan ka ontawag et onebat ak;

manliket kad satan ed siak, siak a pinalsam.

16Diad satan imanoen moy amin a gawaen ko,

balet ag mo la anapen iray kasalanan ko.

17Pirdonaen tan lingwanan mo ray kasalanan ko;

paandien mo ray amin a kaogsan ko.

18Onsabiy panaon a nageba ray palandey,

tan nagalasogus iray ankakabaleg a bato.

19Say danum oputen to ray bato,

tan say maples ya oran iyagos to so dalin;

onya so panederal mod ilalo na too.

20Ipasilong mod pakayarim so sakey a too, insan mo paandipaten ya anggad angga;

omanen moy nengneng na lupa to, insan mo la pasiputen ed sayan bilay.

21Makagamur na kagalangan iray lalakin anak to,

balet ta ag to amta;

ag to met amta no napelag irad kababaingan.

22Nalikna to labat so sakit na dilin laman to tan say ermen na dilin kanunotan to.