Saray Salmo 107 - Pangasinan Meaning-Based Bible(MBBPAN83)

KUMALIMAN LIBRO(Saray Salmo 107–150)Pangidayew ed Kamaungay Dios

1“Misalamat kayod, Katawan, ta sikato et maung;

andi-anggaan so panangaro to!”

2Olit yo ra yan salita a pangidayew ed Katawan,

amin yon inlaban to.

Inyagel to kayod saray kalaban yo,

3impawil to kayon manlapud saray nandoroman bansa,

manlapud bokig tan sagur, manlapud baybay tan abalaten.

4Saray arum nanakar-akar irad anggapoy basbas a kalawakan,

tan ag da narumog so dalan a mamaarap ed sakey a siudad a panayaman da.

5Naeras-erasan tan naap-apgaan ira,

kanyan nakalan iray ilalo.

6Insan diad inkagunigon da, tinmawag irad Katawan,

et inyagel to rad paniirap da.

7Inwanwan to rad maptek a dalan

a mamaarap ed sakey a siudad a napanayaman da.

8Nepeg dan pisalamatan so Katawan, lapud ag mangoman a panangaro to,

lapud makapakelaw iran ginagawa ton para sikara!

9Pepeneken to ray nanaapgaan,

tan pepeselen to ra na maung a bengatla iray nanaerasan.

10Nambibilay iray arum ed bilonget tan ermen;

priso ran maniirap ya agolunggolungan,

11ta sinusumlang da ray salita na Dios a Makapanyarin-amin

tan impopolisay da ray simbawa to.

12Apunaw ira lapud kairapay kimey;

atumtumba ra, et anggapoy ontulong ed sikara.

13Insan diad inkagunigon da, tinmawag irad Katawan,

et inyagel to rad paniirap da.

14Impaway to ra a nanlapud kawalaan dan bilonget tan ermen,

tan pinopoltut to ray golunggolung da.

15Nepeg dan pisalamatay Katawan lapud ag mangoman a panangaro to,

lapud makapakelaw iran ginagawa ton para sikara.

16Gegebaen to ray gansan puirta,

tan popoteren to ray balatyang a balewet.

17Saray arum a totoo et makulangkulang ira;

maniirap ira lapud saray kasalanan da tan saray kaogsan da;

18ag da napaloob so antokaman a kakanen,

tan ngalngali la ra ompatey.

19Insan diad inkagunigon da, tinmawag irad Katawan,

et inyagel to rad paniirap da.

20Lapud ganggan to pinaabig to ra,

tan inlaban to rad lobuk.

21Nepeg dan pisalamatay Katawan, lapud ag mangoman a panangaro to,

lapud makapakelaw iran ginagawa ton para sikara.

22Nepeg dan pisalamatan diad panamegley na saray bagat,

tan ibawag day ginagawa to diad panamegley na saray kanta na liket.

23Saray arum nambabapor iran nambaroy ed dayat;

diad saray dayat so nanaalaan day pambilay da.

24Anengneng da no anto ray ginagaway Katawan,

saray makapakelaw a ginagawa tod dayat.

25Nangganggan, et sinmiplug so mabiskeg a dagem,

ya amadaluyon na ankakabaleg.

26Binmobontatuk iray bapor

et linmelereg irad kaaralman.

Diad onman a kaatapan, saray lalaki nakal so biskeg na linawa ra;

27mamparugso tan mandongilngil iran singa saray abuek—

nagmaliw ya anggapoy kabaliksan so dunong da.

28Insan diad inkagunigon da, tinmawag irad Katawan,

et inyagel to rad paniirap da.

29Pinatonda toy maksil a bagyo,

et dinmeen iray daluyon.

30Lapud linminak, makaliliket ira

tan inyakar to rad puirto a labay dan laen.

31Nepeg dan pisalamatay Katawan lapud ag mangoman a panangaro to,

lapud makapakelaw iran ginagawa ton para sikara.

32Nepeg dan ibawag so inkatalonggaring to diad tipon da ray totoo,

tan igalang da diad tipon da ray pangulo.

33Say Katawan sigput ton pinaekat iray ilog,

tan pinatonda ton onagos iray sobul.

34Impagmaliw ton maasin tan ag natobuan so mabonan dalin,

lapud kaogsan da ray manaayam diman.

35Ginawa ton danum iray kabueran,

tan impagmaliw ton managagos a sobul so amagan dalin.

36Impanayam to rad may totoon narasan,

tan nanggawa ray sakey a siudad a panayaman da.

37Pinasekan da ray kaalogan tan tinaneman day ubas,

et akaani ra na daakan.

38Binindisionan to ray totoo to et nanaanak iray amayamay;

ag to inabuloyan ya ondaiset iray baka ra.

39Sanen atalo tan apaabeba iray totooy Dios

lapud maruksan panamairap, gunigon, tan kaermenan,

40pinabaingan to ray mamapairap ed sikara,

tan impanakar-akar to rad kalawakan ya anggapoy basbas.

41Balet inyagel tod kairapan da iray walad pankaukolan

tan pinarakel ton singa karniro iray pamilya ra.

42Saray matonung nanenengneng da ya et magayaga ra,

balet ag makaskasel ya amin iray totoon maoges.

43Nudnunoten komun na saray makabat ira yan bengatla;

motekteken da komun so ag mangoman a panangaroy Katawan.