Saray Bilang 33 - Pangasinan Meaning-Based Bible(MBBPAN83)

Say Impanbiahi na saray Israelita Manlapud Egipto ya anggad Moab

1Say onggendan ya agawa iter to ray kangaranan na saray pasen ya angiliraan na saray Israelita na kampo ra kayari ran tinaynan so Egipto diad panangipangulo di Moises tan Aaron.

2Lapud ganggan na Katawan, insulat nen Moises so ngaran na kapag pasen a nankampoan da.

3Saray totood Israel tinaynan day dalin na Egipto nen kumalabinliman agew na ononan bulan na taon, say agew kayari na ononan Paskua. Diad panangyagel na Katawan tinaynan day siudad na Rameses a sankanengneng ira na saray Egipsio

4a mangipopompon na saray pangulowan a lalakin anak da a pinapatey na Katawan. Diad impanggawa na Katawan ed saya, impanengneng ton sikatoy makapanyari nen saray diriyos ed Egipto.

5Tinaynan na saray totood Israel so Rameses tan inlira dad Sukot so kampo ra.

6Say tinmombuk a kampo ra et diad Etam a walad gilig na kalawakan.

7Manlapud man amoliktar ira tan linma rad Pihahirot a walad bokig na Baal-zefon, insan ira nankampod abay na Migdol.

8Tinaynan day Pihahirot tan binaliw day Dayat ya Ambalanga diad inyakar dad kalawakan na Sur; kayari na taloy agew ya impankurang da, nankampo ra ed Mara.

9Manlapud man linma rad Elim tan dimay nankampoan da, lapud walad may labinduan sobul tan pitomplo kiew na palmira.

10Tinaynan da so Elim tan nankampo rad abay na Dayat ya Suez.

11Say sinmoblay a nakampoan da et diad Kalawakan na Sin.

12Insan ira nankampod Dofka,

13tan kayari to ya, diad Alus.

14Insan ira nankampo ed Refidim ya anggapod may nainom dan danum.

15-37Manlapud Refidim ya anggad Palandey na Hor nankampo ra ed saray onggendan a pasen: say Kalawakan na Sinai, Kibrot-hataava, Hazerot, Ritma, Rimon-fares, Libna, Rissa, Keelata, Palandey na Sefer, Harada, Makelot, Tahat, Tare, Mitka, Hasmona, Moserot, Bene-yaakan, Hor-hagidgad, Jotbata, Abrona, Ezion-geber, say Kalawakan na Zin (a salanti say Cades), tan say Palandey na Hor, diad gilig na dalin na Edom.

38-39Lapud ganggan na Katawan, kinalab nen Aaron a pari so Palandey na Hor. Inatey diman a mantaon na sanlasus tan duamplo tan talo nen ononan agew na kumaliman bulan na kumaapataplon taon kayariy intaynan na saray Israelita manlapud Egipto.

40Say ari na Arad diad niabalaten na Canaan nadngelan to ya onsasabi ray Israelita.

41-49Manlapud Palandey na Hor ya anggad saray patar na Moab, saray Israelita nankampo ra ed saray onggendan a pasen: Zalmona, Punon, Obot, Iye-abarim a sakop na dalin na Moab, Dibon-gad, Almon-diblataim, Palandey na Abarim ya asingger ed Palandey na Nebo, tan diad saray patar na Moab diad nibaliw na Ilog na Jordan manlapud Jerico, a nanleetan na Bet-jesimot tan Patar na Acacia.

Saray Bilin Kasakbayan na Imbaliw da ray Israelita ed Ilog na Jordan

50Diad saray patar na Moab ed nibaliw na Jordan manlapud Jerico say Katawan inter tod kinen Moises

51iray onggendan a bilin a para saray totood Israel: “No ombaliw kayod Jordan diad iyakar yod dalin na Canaan,

52nepeg yon pataynanen iray amin a manaayam diman. Deral yo ray amin a bato tan mital a talintao ra tan amin a pasen a panangigalangan da.

53Kayaryanen yo so dalin tan panayaman yo, lapud iter kod sikayo.

54Apag yod saray tribu tan saray boleg so dalin diad panamegley na pampapalaranan; iter yod baleg a boleg so baleg a dalin tan diad melag a boleg so melag met a dalin.

55Balet no ag yo pataynanen iray manaayam diman, saray akeraan et mangiter irad sikayo na gunigon a singa tenek ed mata yo tan sakit ed diking yo, tan labanan da kayo.

56No ag yo ra pataynanen, deralen ta kayo, a singa ginetmak a panderal kod sikara.”