Sirac 11 - Pangasinan Meaning-Based Bible(MBBPAN83)

1No makabat so sakey a toon mairap so bilay to, walay maung a makasengeg na pampaatagey to, tan sikatoy nanunotan a sakey a matalonggaring a too.

Saray Nengneng

2Ag mo idadayew so sakey a too lapud maung so nengneng to. Balet ag mo met leleglemewen so sakey a toon aliwliway nengneng to.

3Melmelag so bayaung no ipara ed saray mantitikyab a bengatla, balet sankasamitan ed saray kakanen so gagawaen ton dilo.

4Ag mo luludlureyen so sakey a toon maniirap tan apilat-pilat so kawes to. Manggagawa na saray makapakelaw a bengatla so Katawan ya ag nanaimano na saray katoowan.

5Dakel iray ararin manyorung ed dalin nen nansumpal so oley da, akatoon iray korona ra ed kaoloan na saray totoon ag ni ran balut nadngelan.

6Dakel iray manoley a naplag ed kababaingan. Dakel iray bantug a totoon naplag ed pakayari na arum a totoo.

Manalwar ka

7Kasakbayay pambalaw mo, mansokay ka ni tan nudnunot mo nin maung.

8Ag ka onsasalabat no walay mansasalita; dengel mo niy labay ton ibaga kasakbayan kan onebat.

9Ag ka misasangsangan ed bengatlan ag mo nepeg a pibalian. Ag ka mibabali ed saray panaabubonan na saray makasalanan.

10Anak, ag ka mibabali ed saray amayamay a bengatla. No dakerakel iray gawaen mo, panirapan mo. Ag mo nasumpal so kimey mo, tan ag mo met nayarian a taynanan.

11Singa bilang, walay sakey a toon ag balut ontotondan mankimey a singa sakey ya aripen, balet walad onur lawas.

12Balet wala mod so sakey a toon nayarin mapalaloy irap na bilay to tan aliwan mapeleng ed kimey to. Nayarin matantan, tan nayarin nakaukolan toy tulong, balet makaliliket so Katawan ed sikato tan agwaten tod kairapan to.

13No maung lamet so kipapasen to, nikelawan ya amin iray totoo.

14Manlalapud Katawan ya amin iray bengatla: aligwas tan impakalugi, kairapay bilay tan kayamanan, bilay tan patey.

15Kakabatan, pakatalus, pakaamta na Ganggan, panangaro, panaggawa na saray maung a bengatla—manlalapu ra yan amin ed Katawan.

16Manlapud gapo walad saray makasalanan so lingo tan kabilongetan, tan saray manliliket ed kaogsan niwalad anggad itakken da.

17Mansiansia iray rigalo na Katawan ed saray totoon rilihioso. Maaligwas ka lawas, no abubonan ka na Katawan.

18Nayarin onyaman so sakey a too lapud pinasyan panagkimey to tan ag to panliket, balet antoy nagunggona tod saya?

19Kuantod sikaton dili, “Natan nisaral ko lan siansia so beneg ko tan napanliketan ko lay nansagputan ko.” Balet anggapoy amta to no panon kabayag so panliket to kasakbayay ipatey to tan say pangitilak tod kayamanan to ed saray arum a totoo.

20Talindegan mo so kimey mo tan pansiansiaan mo; masikenan moy kimey mo.

21Ag ka mangiimon ed nagagawaan na saray makasalanan; basta mansiansia ka ed dilin kimey mo, tan manmatalek ka ed Katawan. Mainomay ed Katawan a bigla ton payamanen so sakey a mairap-bilay.

22Saray totoon matonung awaten da a tumang so bindision na Katawan, tan nayarin niiter a tampol itan a tumang.

23Ag ka mapaga no antoy nakaukolan mo odino antoy aligwas a nagamuran mo ed arapen a panaon.

24Balet ag mo met nununoten a walad sikay amin a nakakaukolan mo odino anggapoy antokaman a maoges a nagawad sika ed arapen a panaon.

25No maung ya amiy nagagawa, ag nununoten na saray totoo iray panaon na kairapan; tan no aliwliway nagagawa, lilingwanan day nipaakar ed aligwas.

26Mainomay ya alagaren na Katawan so agew na ipatey na sakey a too diad panumang odino panusa tod sikato.

27Diad satan a panaon akaparontal ya amiy gawgawa to tan nanengneng na amin a totoo; nayarin naandi ya amiy liket to diad satan a bekta na kairapan.

28Kanyan, ag mo iisipen a maliket so bilay na sakey a too no ag ni asabi so anggaan na bilay to, lapud ag ni atogyup ya amin iray paneknek no ag ni inatey so sakey a too.Apigeren so Pampili na saray Kakaaro

29Pilim iray totoon iimbitaan mo ed abung mo, lapud amayamay so pakapalikdoan ed sika na saray masilib a totoo.

30Say mapaatagey a too singa patit a mangayat ed sika ed kaatapan; singa sakey ya ispia a mansokay ed saray kakapoyan mo.

31Iparontal ton kamaungan so kaogsan tan mananap na kakapoyan ed saray gawan makabaliksan.

32Napaliub na sakey a talagsik so sakey a bunton na oring, tan manaalagar labat na pankanawnawan manggaway karuksaan so sakey a makasalanan.

33Alwaran mo ra tan a totoo tan saray maoges a plano ra; deralen da ka ya anggad angga.

34No isempet mot abung mo so sakey a sangkaili, gunigon labat lay iter to; nayari nin pansiblangen to ka tan say dilin pamilyam.