Malakias 1 - Pangasinan Meaning-Based Bible(MBBPAN83)

1Sikato yay salita na Katawan ed saray totood Israel diad panamegley nen Malakias.

Say Panangaro na Katawan

ed Israel

2Say Katawan kuantod saray totoo to, “Inaro ta kayo lawas.”

Balet ebat da, “Panoy impangarom ed sikami?”

Ebat na Katawan, “Sanagi ra di Jacob tan Esau, balet inarok si Jacob tan saray kabyangay boleg to,

3tan binosul koy Esau tan saray kabyangay boleg to. Dinederal koy kapokdulan a baley nen Esau tan pinaolyan kod saray ayayep ed katakelan so dalin to.”

4No ibaga na saray kabyangay boleg nen Esau salanti saray Edomita, “Aderal-deral iray baley mi, balet pasimbaloen mi ran ipaalagey,” say Katawan onebat ed satan, “Pasimbaloen da ra labat ya ipaalagey—igebak ira lamet. Tawagen ira na saray totoo, ‘Say maoges a bansa’ tan ‘Say bansan pamapasnukan na Katawan.’”

5Nanengneng ya na saray totood Israel ed dilin mata ra, tan ikuanda, “Makapanyari so Katawan anggan diad paway na dalin na Israel!”

Nampasnukan na Katawan

iray Papari

6Say Katawan a Makapanyarin-amin kuantod saray papari, “Say anak papagalangan toy ama to, tan say aripen papagalangan toy amo to. Siak so ama yo—akin et ag yo ak pagalangan? Siak so amo yo, akin et ag yo ak itday galang? Babalawen yo ak balet tetepeten yo, ‘Panoy pamabalaw mid sika?’

7Onyay pamabalaw yod siak—mangibabagat kayoy andi-kakanaan a kakanen ed altar ko. Insan tetepeten yo, panoy ag mi impamagalang ed sika? Ibagak ed sikayo—diad ag yo pangingalngalep ed altar ko.

8Abaloan yo ya anggapoy kaogsan so pangibabagat yod siak na bulag odino mansasakit, odino piley ya ayep? Sali yo pay mangiter ed gobirnador na onman a klasiy ayep? Manliket kasid sikayo odino mangiter kasi na panangasi ed sikayo?”

9Natan sikayo ran papari, kerew yo pad Dios a kasian to itayo. Ag to ebatan so pikakasi yo, et sikayo lamlamang so natetel.

10Say Katawan a Makapanyarin-amin kuanto, “Oy la komun, ta sakey ed sikayo so mangisarad saray kaput na Timplo, pian anggapod sikayoy manelsel na andi-kakanaan ya apoy ed altar ko. Ag ak makaliliket ed sikayo; ag ko awaten iray bagat ya iyaakar yod siak.

11Igagalang ak na amin a totoo ed amin a sukong na mundo. Inerman a pasen saray totoo mamopool ira na insinso a para siak tan mangisasaklang ira na makapaliket a bagat. Igagalang da ak ya amin!

12Balet ag yo ak papagalangan nen kuanyo ya andi-kakanaan so altar ko tan isasaklang yod altar ko so ag yo labalabay a kakanen.

13Ibabaga yo, ‘Onsasawa kami lad sarayan amin!’ Insan yo ak kokobibitan. Mangibabagat kayod siak na tinakew ya ayep odino piley odino mansasakit. Abaloan yo awaten ko tan ed sikayo?

14Sakey a samba lalaingen so niiter ed masaol a mangibabagat ed siak na andi-kakanaan ya ayep, anta walay marakep ya ayep ed saray kokomponien to ya insipan ton iter ed siak! Lapud sakey ak a matalonggaring ya ari, tan tatakotan ak na saray totood amin a bansa.”