Jeremias 45 - Pangasinan Meaning-Based Bible(MBBPAN83)

Say Sipan na Dios ed kinen Baruc

1Nen kumapat a taon na panaarid Juda nen Joakim a lakin anak nen Josias, insulat nen Baruc a lakin anak nen Nerias iray indiktak ed sikato. Insan imbagak

2ed kinen Baruc a say Katawan a Dios na Israel inkuanto, “Baruc,

3ibabagam, ‘Pakaskasi ak la! Say Katawan inaruman to na ermen iray gunigon ko. Makapkapoy ak lad panagdageyem, tan ag ak makapampainawa!’

4“Balet siak a Katawan, babagbagen ko so impaalagey ko tan babaguten ko so intanem ko. Gawaen ko ya ed intiron mundo.

5Aanapen moy nidoman bengatlan para sikan dili? Ag mo la itutuloy, ta deralen koy amin a katoowan; anggaman ontan, nipaliis kad patey anggan iner so laen mo. Siak, say Katawan, so nansalita.”