1Say bandad abalaten a ketegan na dalin a nipabetang ed saray kabyangan na boleg nen Jose et onggapod Jordan diad asingger ed Jerico, diad pasen a nibokig na saray sobul na Jerico, tan ontuloy ya anggad kalawakan. Manlapud Jerico sabien toy kapokdulan a pasen ya anggad Betel.
2Manlapud Betel ontuloy ed Luz, ondalan ed Atarot-adar a panaayaman na saray Arkita.
3Insan mampasagur ya anggad dalin da ray Aplatita tan ontuloy ed pasen na Abeban Bet-horon. Manlapud man ontuloy ed Gezer tan mansamput ed Dayat na Mediteraneo.
4Saray kabyangay boleg nen Jose, salanti saray tribu di Efraim tan Manases, et nipabetang yan dalin ed sikara.
Efraim5Sikato yay dalin a sakop da ray pamilya na tribu nen Efraim: say ketegan da manlapud Atarot-adar diad bandad bokig ya anggad Bet-horon,
6tan manlapud man ontalus ed dayat na Mediteraneo. Say ketegan dad baybay et say Micmetat. Manlapud bokig na Micmetat say ketegan da onliko ed Taanat-silo insan ontuloy ed bokig ya anggad Janoa.
7Manlapud Janoa mampaleksab ed Atarot tan Naara, sabien toy Jerico tan mansamput ed Jordan.
8Manlapud Tapua say ketegan mamaarap ed sagur tan ontalus ed kolus na Cana, insan mansamput ed Dayat na Mediteraneo. Sikato ya so dalin a niiter ed saray pamilya na tribu nen Efraim.
9Kayaryan da met iray baley tan saray bario a wala rad dalin a sakop na tribu nen Manases, balet niiter irad saray Efraimita.
10Ag da pinataynan iray Cananeo a manaayam ed Gezer, kanyan anggad natan saray Cananeo kaiba ran manaayam iray Efraimita, balet apasoot ira yan Cananeo a mankimey ya ariripen.
Who We AreWhat We EelieveWhat We Do
2025 by iamachristian.org,Inc All rights reserved.
