Isaias 50 - Pangasinan Meaning-Based Bible(MBBPAN83)

1Say Katawan kuanto,

“Abaloan yo amon pinataynan ko ray totook

a singa sakey a lakin angisian na asawa to?

Kawalaan sirin na saray kasulatan na impansian?

Abaloan yo amon inlako ta kayo ed inkadakep

a singa sakey a too ya inlako ton aripen iray anak to?

Andi, adakep kayod arawi lapud saray kasalanan yo;

apataynan kayod arawi lapud saray kaogsan a ginagawa yo.

2“Akin et ag inmebat iray totook

nen linma ak a mangilaban ed sikara?

Akin et ag ira inmebat nen tinmawag ak?

Makapoy ak ta a mangilaban ed sikara?

Diad sakey a ganggan ko napaekat koy dayat

tan magmaliw a kalawakan iray ilog,

et ompatey iray sirad man lapud kakulangay danum.

3Nayarian kon pagmaliwen ya ambilonget so tawen,

a singa walay paneermenan ton inatey.”

Say Katotoluk na Aripen na Katawan

4Imbangat na Katawan a Dios ed siak so salitaen ko,

pian napabiskeg ko so linawa na toon mapaga.

Kapag kabwasan iitdan to ak na pilalek

ya ondengel ed ibangat to.

5Say Katawan initdan to ak na pakatalus,

et ag ak linmaban ed sikato

odino inarawian ko.

6Intaryak so beneg ko ed saray nansiplat ed siak.

Ag ko ra binaat nen pinabaingan da ak,

nen binagut da ray balbas ko

tan nilulukdaan day lupak.

7Balet ag ak nasakitan na saray panamabaing da

lapud tutulongan ak na Katawan a Dios.

Pinakapal koy lupak pian nitepel ko ra.

Amtak ya ag ak napelag ed kababaingan,

8lapud asingger so Dios,

tan paneknekan ton anggapoy kasalanan ko.

Wala kasiy siopaman a makatepel a mangakusa ed siak?

No wala, onla kamin dua ed korti,

ta iparontal toy pangaakusaan tod siak.

9Say dilin Katawan a Dios so mangyaagel ed siak—

siopa sirin so makapaneknek a siak so nankasalanan?

Naandipat ya amin iray mangaakusad siak;

naandipat iran singa abel ya inoput na taboney.

10Amin yon mangigagalang ed Katawan

tan mangoonur ed saray salita na aripen to,

nayarin ambilonget a tua so dadalanen yo,

balet manmatalek kayod Katawan, ipia yod Dios so bilay yo.

11Sikayon mankokomplut a maneral ed saray arum

et naderal kayo ed saray dilin komplut yo.

Say dilin Katawan so mangyabuloy ya onyay nagawa;

makapasinagem so pansumpalan yon kairapan.