Ezekiel 42 - Pangasinan Meaning-Based Bible(MBBPAN83)

Saray Duaran Paalagey ed Abay na Timplo

1Insan samay laki inyakar to ak ed patio ed paway tan intuloy to ak ed sakey a paalagey diad baybay na Timplo, ya ag arawi ed samay paalagey ed nisagur a samput na Timplo.

2Limamplo tan duan mitro so karokey tan duara tan kapalduan mitro so kaawang na sayan paalagey.

3Say sakey a dapag to akaarap ed liwang a samplora tan kapalduay mitro so kaawang to tan midasig ed samay Timplo; say sakey a dapag to akaarap ed dalan na samay patiod paway. Taloran grado yan paalagey tan say walad tagey a grado nisener ed gradon walad leksab to.

4Diad dasig na bandad baybay a dapag na sayan paalagey et walay dalan a limaran mitro so kaawang to tan limamplo tan duan mitro so karokey to, tan diad baybay so kawalaan na saray lolooban to.

5Melag iray kuartod samay sankatageyan a grado to may paalagey nen saray kuartod kumadwa tan sankaabebaan a grado, lapud nisener ira.

6Saray kuartod amin a grado et ag ira atokdul na lusek a singa saramay kuarto ed patio. Nisener iray kuartod tagey a grado.

7-8Duamplo tan anem a mitro so kakapal na padir a bandad paway na samay sankaleksaban a grado, kapaldua la ya na karokey to; wala ray kuarto ed nakdaan a duamplo tan anem a mitro. Diad samay sankatageyan a grado wala ray kuarto ed intiron karokey na paalagey.

9-10Diad leksab na sarayan kuarto ed nibokig a samput na paalagey, ya angigapwan na padir na patio, walay lolooban ya ompogtad samay patiod paway.

Diad abalaten na Timplo walay paalagey a miparparad paalagey a walad baybay, tan ag arawi ed samay paalagey ed nisagur a samput na Timplo.

11Diad arap na saray kuarto walay dalan a singa samay dalan ed nibaybay a dapag. Say kabaleg to, say inkagawa to, tan saray lolooban to et kapara na kabaleg, inkagawa, tan lolooban na samay walad baybay a paalagey.

12Walay puirta ed silong na saramay kuarto ed niabalaten a dapag na paalagey, diad bokig a samput ya angigapwan na padir.

13Samay laki kuantod siak, “Masanto ra yan paalagey. Diad loob na sarayan kuarto, kanen na saray paparin onloob ed kawalaan na Katawan iray sankasantosan a bagat. Lapud masanto ra yan kuarto, ipasen dia na saray papari iray sankasantosan a bagat: saray trigon bagat tan saray bagat a nisaklang a para kasalanan odino bagat a pambayar.

14No saray paparin walad dalem na Timplo et labay day onla ed patiod paway, nepeg ya itilak dad sarayan kuarto iray masanton kawes ya insolung da legan dan manlilingkur ed Katawan. Nepeg a mampales iray sananey a kawes kasakbayan iran ompaway ya onlad pasen a kawalaan da ray totoo.”

Say Sukat na Solar na Timplo ed Paway

15Nen asumpal na samay laki a sinukat so dalem na Timplo, impaway to ak diad nibokig a puirta, insan to sinukat so paway na Timplo.

16Inala to may panagsukat ton bislak, insan to sinukat so nibokig a dapag, et duanlasus tan anemaplo tan talon mitro so karokey to.

17-19Insan to sinukat so baybay a dapag, say abalaten a dapag, tan say sagur a dapag; nampaparan duanlasus tan anemaplo tan talon mitro so karokey dan amin.

20Kanyan kuadrado so aliber na padir tan duanlasus tan anemaplo tan talon mitro so sukat na balang dapag. Say padir so angibiig ed antokaman a masanto ed saray aliwan masanto.