1Inkuantod kinen Balak, “Igawaan mo ak dia na pitoran altar, tan iyakaran mo ak na pitoran bakan kalakyan tan pitoran karniron kalakyan.”
2Ginawa nen Balak so nibagad sikato, insan angibagat iran dua nen Balaam na sakey a bakan kalakyan tan sakey a karniron kalakyan diad kapag altar.
3Insan inkuanen Balaam ed kinen Balak, “Manalagey ka diad abay na isasaklang mon bagat a popoolan, ta nengnengen ko no kasi abeten ak na Katawan o andi. Ibagak ed sika so antokaman ya ipaamta tod siak.” Kanyan linman bukor ed toktok na sakey a pokdul,
4et inabet diman na Dios. Inkuanen Balaam ed Dios, “Amaalagey ak na pitoran altar tan angibagat ak na sakey a bakan kalakyan tan sakey a karniron kalakyan ed kapag altar.”
5Imbaga na Katawan ed kinen Balaam no antoy salitaen to tan imbaki to la ed kinen Balak pian nasalita toy papaibaga tod sikato.
6Kanyan pinmawil si Balaam et asabian toy Balak a manalalagey ni ed abay na isasaklang ton bagat a popoolan tan kaiba to rad may amin a pangulo na Moab.
7Imbalikas nen Balaam so sayan propisiya:
“Manlapud Aram ed nibokig iran kapalandeyan
Impaawit ak nen Balak ya ari na Moab.
Inkuanto, ‘Gala, ta isalitaan mo ak,
Isamban iray Israelita.’
8Panon kon isamba so ag insamba na Dios,
Odino paogesen so ag pinaoges na Katawan?
9Manlapud tagey na kapokdulan nanengneng ko ra;
Manlapud kapokdulan nabantag ko ra.
Sakey iran bansan mambibilay a mambukbukor;
Amta ra a magmaung niy inkabindisionan da nen saray arum a bansa.
10Singa karakel na dabuk so karakel na saray Israelita.
Diad gaway karakel da ag ira nabilang.
Ompatey ak komun a sakey a matonung,
Mangangga komuy bilay ko a sakey ed saray totoo na Dios.”
11Insan si Balak kuantod kinen Balaam, “Antoy ginawam ed siak? Inawit ta ka dian mangisamba ed saray kalaban ko, balet binindisionan mo ra lalaingen.”
12Inmebat si Balaam, “Say nayarin salitaen ko labat say papaibagad siak na Katawan.”
Say Kumadwan Propisiya nen Balaam13Insa inkuanen Balak ed kinen Balaam, “Mila kad siak ed sananey a pakabantagan mo na pigara labat ya Israelita. Manlapud man isambam ira para siak.”
14Intagar tod alog na Zofim diad toktok na Palandey na Pisga. Nanggawa met diman na pitoran altar, insan angibagat na sakey a bakan kalakyan tan sakey a karniron kalakyan ed kapag altar.
15Inkuanen Balaam ed kinen Balak, “Manalagey ka diad abay na isasaklang mon bagat a popoolan ta banaen koy Dios diman.”
16Inabet na Katawan si Balaam, imbaga to no antoy salitaen to, tan imbaki to la ed kinen Balak pian nasalita toy papaibaga tod sikato.
17Kanyan pinmawil si Balaam et asabian toy Balak a manalalagey ni ed abay na isasaklang ton bagat a popoolan, tan kaiba to rad may pangulo na Moab. Tinepet nen Balak no anto so imbaga na Katawan,
18et imbalikas nen Balaam yan propisiya:
“Gala, Balak a lakin anak nen Zippor
Ta dengel moy ibagak.
19Say Dios et aliwan singa saray totoo a mantila;
Aliwan singa too a mangoman na kanunotan to.
No antoy insipan to tooren to;
No antoy imbaga to sumpalen to.
20Niganggan ak a mamindision,
Et no mamindision so Dios, ag ko nayarin babawien.
21Nanengneng kon say arapen na Israel
Et anggapoy gunigon odino kakapoyan.
Kaolup da so Katawan a Dios da;
Ibabawag da a sikatoy ari ra.
22Say Dios impaway to ra manlapud Egipto;
Singa bakad katakelan a mibabakal para sikara.
23Anggapoy panamalikdo odino panagsalamangka diad pananulong na maoges ya ispiritu
A makasumpa ed bansan Israel.
Natan saray totoo ikuanda nipaakar ed Israel.
‘Nengneng yo no antoy ginawa na Dios!’
24Say bansan Israel et singa masebeg a lion:
Ag mandeen anggad abuag to lay narel to,
Anggad nainom to lay dala na apatey to.”
25Insan si Balak kuantod kinen Balaam, “No ag mo ra labay ya isamba, ag mo met sirin ira bibindisionan!”
26Inmebat si Balaam, “Ag ko ta la imbagad sika a no antoy imbaga na Katawan et sikatoy gawaen ko?”
Say Kumatlon Propisiya nen Balaam27Inkuanen Balak, “Gala, ta onla tad arum a pasen. Ag la pigan manlapud man say Dios abuloyan to kan mangisambad sikara para siak.”
28Kanyan intagar toy Balaam ed toktok na Palandey na Peor a tantandagan toy kalawakan.
29Inkuanen Balaam ed kinen Balak, “Igawaan mo ak dia na pitoran altar tan iyakaran mo ak na pitoran bakan kalakyan tan pitoran karniron kalakyan.”
30Ginawa nen Balak so nibagad sikato, insan angibagat na sakey a bakan kalakyan tan sakey a karniron kalakyan diad kapag altar.
Who We AreWhat We EelieveWhat We Do
2025 by iamachristian.org,Inc All rights reserved.
