Probirbio 21 - Pangasinan Meaning-Based Bible(MBBPAN83)

1Mainomay ya iwanwan na Katawan so kanunotan na ari, a singa kinainomay na panangiwanwan tod agos na kolus.

2Nayarin abaloan mon maptek iray gagawaen mo, balet nunot mo a sisimbangen na Katawan iray getmam.

3Say panggawa na kaptekan tan katonungan et makapaliket ed Katawan nen say pangisaklang na saray bagat ed sikato.

4Say panagpaatagey tan say ag pangitaltalek so manooley ed saray totoon maoges; saya et kasalanan.

5Apiger moy mamplano, et nawalaan ka na daakan; no magangganat kan manggawa, et kakulangan so nagonggonam.

6Say kayamanan a nanaalam ed saol et kabebekta naandipat, balet aliwan kasakbayan na pangiwanwan tod sika ed sangabay lobuk.

7Saray totoon maoges dudusaen ira na dilin inkaruksa ra, lapud ag da labay so manggaway kaptekan.

8Pikewet so kabibilay na toon managkasalanan, balet maptek so kabibilay na toon matonung.

9Magmaung niy manayam ed atep na abung nen say miamung ed biin makolkol.

10Mampipilalek lawas a manggaway kaogsan iray totoon maoges; anggapoy panangasi rad anggan siopa.

11No nadusa so toon mapaatagey, makaaral so toon anggapoy amta. Say toon makabat makaaral ed nibabangat ed sikato.

12Say Dios a sikatoy matonung, amta to so nagagawa ed abung da ray totoon maoges, ipelag to rad kaderalan da.

13No ag mo dengelen so pikekerew da ray mairap-bilay na tulong, ag met narengel so pankerew mo na tulong.

14No walay mamapasnuk ed sika, say rigalon niiter a maamut pakepaen toy pasnuk to.

15No say inkatonung so nagagawa, maliket iray totoon matonung, balet maermen iray totoon maoges.

16Siopamay ag to ikakanay olo to manaalagar ed sikato so patey.

17Say panangarod alablabas a liket, alak, tan masamit a panangan et ag to kan balut payamanen.

18Saray totoon maoges iyaakar dad sikaran dili so kairapan ya iiter dad saray totoon matonung.

19Magmaung niy manayam ed disirto nen say miamung ed makolkol tan mariklamon asawan bii.

20Saray totoon makabat mambibilay iran daakay kayamanan, balet saray makulang-kulang masiglat dan gagastosen so kuarta a singa inkasiglat na impakala ra.

21Mambilay kan mapangasi tan maptek, et andokey so bilay mo; pagalangan ka na arum a totoo tan ag da ka saolen.

22Say makabat a pangulo na saray sondalo nalooban toy siudad ya iyaagel na saray mabiskeg a totoo, tan nigeba to ray padir a panmamatalkan da.

23No labay mon naarawiay golo alwaran moy panagsalitam.

24Ipanengneng mod siak so toon mapaatagey et ipanengneng kod sikay toon malastug, matangsit, tan anggapoy panangasi.

25Say toon mangiras ya ag to labay so mankimey et papateyen to labat so sikaton dili;

26say gagawaen to labat say pannununot to no antoy labay ton naala. Balet say toon matonung makaiter tan mangiiter a mabonluk.

27Kabosul na Katawan iray bagat na saray totoon maoges, nagkalalo la no maoges iray getma ran mangibagat.

28Ag napanisiaan so panagtasi na toon matila, balet napanisiaan so siopaman ya aralem so pannununot tod bengatla.

29Saray totoon matonung amta ran dugay gagawaen da, balet saray totoon maoges gagawaen day anggaay nayarian dan mankonkonwanan.

30Anggapoy kakanaay kakabatan, pakatalus, tan say pakaamta na too, no sumpa so Katawan ed sika.

31Nayarian mon iparaan ed bakal iray kabayo, balet say Katawan so mangiiter na pananalo.