2 Saray Awaran 7 - Pangasinan Meaning-Based Bible(MBBPAN83)

Say Impangisaklang na Timplo(1 Ar. 8:62-66)

1Nen asumpal nen Solomon so pikakasi to, pinmelag a nanlapud tawen so apoy tan pinoolan to ray bagat ya insasaklang. Insan say Timplo napno na kagalangan na Katawan.

2Ag makaloob iray papari, lapud napno na kagalangan na Katawan so Timplo.

3Nen anengneng na saray totood Israel a naplag a nanlapud tawen so apoy tan pinano na liwawa so Timplo, dinmakmomo ran anggad dalin, inggalang day Dios tan indayew da lapud kaabigan tan ag mangoman a panangaro to.

4Insan angibagat ed Katawan si Ari Solomon tan amin da ray totoo.

5Duamplo tan duan libon baka tan sanlasus tan duamplon libon karniro so insaklang nen Ari Solomon a bagat a para kareenan. Diad onya si Solomon tan amin da ray totoo insaklang da so Timplo.

6Nanalagey iray papari ed angipasenan ed sikara tan nanalagey met iray Levita a sankaarap da ra. Saray Levita indadayew day Katawan diad impantotogtog dad saray kagawaan na musika ya inter nen Ari David tan kinakanta ra may imno, “Andi-anggaan so Panangaro to!” onung na ingganggan nen David ed sikara. Pinaknul na saramay papari iray trumpita tan nanalagey iray totoo.

7Diad saman met ya agew insaklang met nen Solomon so pegley a parti na patio a walad arap na Timplo, insan angisaklang diman na saray bagat a popoolan, saray bagat a trigo, tan say taba na saray bagat a para kareenan. Dia to ra insaklang ta say gansan altar a ginawa to et melag a pangisaklangan ed sarayan bagat.

8Pitoy agew a sinilibraan nen Solomon tan amin da ray Israelita so Pista na saray Abung-abung. Dinmago ya amin iray totood Israel, manlapud Dalan na Hamat diad baybay ya anggad ketegay Egipto diad abalaten.

9Pitoy agew so impangisaklang dad altar tan pitoy agew so impansilibra ra. Nen kaonuran ya agew sinumpal day sirimonya

10tan nen ontombuk ya agew, say kumaduamplo tan talon agew na kumapiton bulan, pinasempet la nen Solomon iray totoo. Malikeliket ira lapud amin a bindision ya inter na Katawan ed saray totoo ton Israelita, si David, tan si Solomon.

Pinmayawar lamet so Dios ed kinen Solomon(1 Ar. 9:1-9)

11Asumpal nen Solomon ya impaalagey so Timplo tan say palasio; atombuk ya amin iray plano to.

12Insan diad labi pinmayawar ed sikato so Katawan tan inkuanto, “Nadngel koy pikakasim, kanyan awaten ko yan Timplo a sikatoy pasen a pangisaklangan ed siak na saray bagat.

13Kapag ag ko paoranen, odino kapag mangibaki ak na saray dorun a mangan ed saray tanaman, odino mangipadalan ak na salot ed saray totook,

14no mampikasi ra tan magbabawi rad kasalanan da, tan ibeneg da ray kaogsan a gagawaen da, dengelen ko rad satan ed tawen, pirdonaen ko ray kasalanan da, tan paaligwasen ko lamet so dalin da.

15Bantayan ko yan pasen tan sipaparaan ak ya ondengel ed amin a pikakasin iyapay dia.

16Pinilik tan pinasantok yan Timplo a sikatoy pasen a pangigalangan ed siak diad ando lan ando. Bantayan ko lawas tan iyagel kod amin a panaon.

17No matoor kan manlingkur ed siak a singa ginawa nen amam a David, no onuren mo ray ganggan ko tan sumpalen mo ray amin a bilin kod sika,

18sumpalen ko may sipan kod kinen amam a David nen imbagak ed sikato a say Israel et lawas oleyan na saray kabyangay boleg to.

19Balet no sika tan saray totoom et ag yo onuren iray ganggan tan saray bilin kod sikayo, tan mangigalang kayod arum a diriyos,

20ekalen ta kayod dalin ya inter kod sikayo, tan ikaindan ko yan pinasantok a Timplo a sikatoy pangigalangan ed siak. Balawen tan melag-melagen na saray totoo ed inerman a pasen so bansan Israel.

21“Sayan Timplo et daydayewen a tuloy natan, balet nikelawan iray amin ya ondalan dia tan tepeten da, ‘Akin et ginawa na Katawan so onya ed sayan dalin tan diad sayan Timplo?’

22Onebat iray totoo, ‘Lapud inkaindan na saray totoo so Katawan a Dios da, ya angipaway ed saray lalaki ra ed dalin na Egipto. Sinmingger irad arum a diriyos, tan sikara yay inggalang tan nanlingkuran da. Kanyan inter na Katawan yan kaogsan ed sikara.’”