Sirac 1 - Pangasinan Meaning-Based Bible(MBBPAN83)

Say Panangidayew ed Kakabatan

1Manlalapud Katawan so amin a kakabatan,

tan anggad angga a walad sikato so Kakabatan.

2Siopay makabilang ed saray terter na oran odino saray buer ed gilig na dayat?

Siopay makabilang ed saray agew na andi-anggaan a panaon?

3Panon kaatagey so tawen? Panon kaawang so dalin?

Panon kaaralem so dayat? Panon kalaknab so Kakabatan?

Walay toon makarumog na ebat na sarayan tepet?

4Apalsa so Kakabatan kasakbayan na inkapalsa na arum a bengatla;

wala lawas so pakatalus.

6Wala lay toon angipanengneng no iner so panlalapway Kakabatan?

Walay toon makakatalus na ontan lan inkasilib na Kakabatan?

8Walay saksakey labat a makabat,

et nepeg tayoy manalalagey ya atalagnaw ed arap na trono to.

9Say Katawan a dili so amalsa ed Kakabatan;

anengneng to tan abirbir toy kakanaan to,

kanyan pinano to na Kakabatan so balang bengatlan pinalsa to.

10Agetaran so Kakabatan ya inter tod balang too,

balet imbung to so Kakabatan ed saray mangaaro ed Katawan.

11No takotan moy Katawan, nakayaryan moy galang tan dayew;

nalingbus kay liket tan gayaga.

12Liket na puso so pamagalang ed Katawan;

itdan to ka na andokey tan maliket a bilay,

13tan maung ya amiy kasumpalan mo no kaonuran na saray agew mo.

Bindisionan ka na Dios ed agew na ipatey mo.

14Say itakot ed Katawan so ononan kupbang a mamaarap ed Kakabatan.

Niiter la so Kakabatan ed saray totoon matoor anggan wala ni rad eges na ina ra.

15Abaybayag lan panaon ya akilimug ed sikatayo so Kakabatan

tan manmatalek ed Kakabatan iray kailalakan ya onsabi.

16Asigsigput a Kakabatan so itakot ed Katawan;

sigput a pepeneken to itayo na saray rigalo to

17tan papanoen to ray kaabungan tan saray kamalir tayo

na amin a pilalek na kapusoan tayo.

18Say itakot ed Katawan et rosas na Kakabatan

a mangiiter na kareenan tan abig-laman.

19Singa oran a mangipepeleg na pakatalus tan pakaamta,

tan pararakelen toy kagalangan na saray mangaawat ed sikato.

20Say itakot ed Katawan et lamut na Kakabatan;

andokey a bilay iray sanga-sanga to.Say Pamemben ed sikan-dili

22Anggapoy nibaraan ed andid katonungan a pasnuk; makapangipelag ed sika.

23Manalagar tan mananos ka, et ag mabayag onggayaga ka lapud nanalagar tan nananos ka.

24Mandeen ka ya anggad manepeg a panaon na pansalita, et napagalangan ka lapud dugan panagnunot.

Say Kakabatan tan Panangigalang ed Dios

25Say Kakabatan walay panagsinupan to na saray makabat a balikas, balet panagbalaw ed inkasanto so wala labat ed saray makasalanan.

26No labay moy magmaliw a makabat, onur mo ray ganggan na Katawan, et itdan to kay daakan a Kakabatan.

27Kakabatan so itakot ed Katawan tan sakey ya aral. Napapaliket so Katawan lapud inkatoor tan panagpaabeba.

28Magmaliw kan matoor ed panagrilihion mo; no igalang mo so Katawan gawam ed intiron pusom.

29Alwaran moy amin ya ibabagam, tan ag ka mansisimpisimpitan.

30Ag ka mapaatagey; nayarin natumba ka tan napelag kad kababaingan. Iparontal na Katawan so iyaamut mo tan paabebaen to ka ed arap na balang sakey a too ed sinagoga, lapud ag ka linmad man a sigagalang ed Katawan, no ag ingen napno na pansimpisimpitan so pusom.