1Diad saman ya agew, inter nen Ari Asuero ed kinen Riyna Ester iray amin a kayaryan nen Haman a kalaban na saray Judio. Imbaga nen Ester ed ari a sankanayon ira nen Mardokeo, kanyan naimbitaen a minengneng ed ari si Mardokeo.
2Inekal na ari imay singsing ton panagtimbri (a binawi tod kinen Haman, tan inter tod kinen Mardokeo). Tinoro nen Ester si Mardokeo ya inkargado ed saray kayaryan nen Mardokeo.
3Insan akisalita lamet ed ari si Ester ya akadakmomod saliyan na ari. Kinerew tod ari a patondaen to may maoges a plano nen Haman sumpad saray Judio.
4Intoro na ari imay balituk a sitro to ed kinen Ester, kanyan inmalagey tan kuanto,
5“No labay na Kagalang ya Ari tan no abageyen mo ak, pikasik a mangipaakseb kay ganggan ya ag la ituloy ira may ganggan ya impaakseb nen Haman a pamatey ed saray amin a Judio ed intiron impirio.
6Panon kon nitepel so pakapatey ed saray totook, saray dilin kadalaan ko?”
7Insan si Ari Asuero kuantod kinen Riyna Ester, “Imbitay ko si Haman lapud maoges a plano to sumpad saray Judio, tan inter kod sika iray kayaryan to. No kulang ni tan,
8nayarin isulat moy labay mo ed saray Judio; tan nayarin isulat mo diad ngaran ko tan markaan moy timbri na ari, ta ag nayarin babawien so ganggan ya impaakseb diad ngaran na ari tan minarkaay timbri na ari.”
9Diad kumaduamplo tan talon agew na ononan bulan, say bulan na Nisan, atawag iray sikritario na ari tan nikorit iray sulat a para saray Judio, saray gobirnador, tan saray arum a manoley na amin da ray sanlasus tan duamplo tan piton luyag, manlapud India ya anggad Sudan. Nipawit ira yan sulat ed balang luyag onung ed dilin salitad man.
10Nisulat ira diad ngaran na ari tan amarkaan ira na timbri na ari. Intolur ira na saray ibabaki.
11Nipaliwawad sarayan sulat ya inabuloyan na ari iray Judio ed balang siudad na impirio a mambilay ira onung ed saray dilin ganggan da tan togyupen day sikaran dili a pangyagel dad bilay da. Naabuloyan met iran manggaway labay da ed saray kalaban da.
12Onggapoy pakayari to yan ganggan ed intiron Impirio na Persia diad kumalabintalon agew na Adar, say kumalabinduan bulan.
Who We AreWhat We EelieveWhat We Do
2025 by iamachristian.org,Inc All rights reserved.
