Sirac 16 - Pangasinan Meaning-Based Bible(MBBPAN83)

Say Dusa na Dios ed saray Makasalanan

1No andi-kakanaan iray anak, ag panogagepan so baleg a pamilya. Ag nikinon iray lalakin anak ya anggapoy Dios da.

2Anggan anto lay karakel na anak mo, ag mo ikikinon likud no walay takot da ed Katawan.

3Ag ka maniilalo na baleg ed arapen da odino maniilalon mambilay ira na andokey. Maung ni so sakey ya anak a gagawaen toy linawa na Katawan nen say sanlibon anak ya ag da gagawaen so linawa na Katawan. Maung ni so onla kad lobuk mo ya anggapon balut so anak mo nen say wala ray anak mon anggapoy Dios da.

4Nayarin ondakel so bilang na totoo ed sakey a siudad lapud kakabatan na sakey a too, balet naandipat ya amin iray kabyangan na sakey a tribu lapud mananumpa rad ganggan.

5Amimpigapiga lay impakanengneng ko na onya ran bengatla tan akadngel ak ni saray lalon malinew ya agawan panmarmaran.

6Ompugso so manliub a pasnuk na Katawan sumpad saray daiset a tipon da ray makasalanan odino diad sakey a bansan mananumpa.

7Ag to pinirdona ra may alan nen saman a linmabad ed sikato, saramay alan a mataletalek ed biskeg dan dili.

8Kinabosul toy panagpaatagey da ray totoon kabandaan nen Lot, tan ag to ra impaliis ed dusa.

9Ag to kinasian imay bansa a dineral to lapud saray kasalanan to;

10ontan met ed saramay anem a lasus a libon totoon mankukurang ed kalawakan a nantitipon a linmaban lapud awet na olo ra.

11Anggan bilang walay sakey a toon anawet so olo to, sakey a milagro no apaliisan toy dusa. Mapangasi so Katawan, balet nayarian to met so mampasnuk. Nayarin malaklaknab so panamirdona to odino say pasnuk to.

12No panoy kabelat na pananusa to, ontan met so kabaleg na panangasi to. Sisintinsiaan to ray totoo onung ed saray gawa ra.

13Anggapoy makasalanan a nibatik to ray tinakew to. Tumangan na Katawan so anos na saray matonung a totoo;

14Natumangan so balang toon matonung; naala na balang too so kanepegan to.

17Ag mon balut ibabaga, “Iyamutan koy Katawan. Anggapoy makanunot ed siak diman ed tagey. Panon a naimano ak diad pegley na ontan lan karakel na totoo? Dakerakel a tuloy iray pinalsa; antoy kablian ko?

18No onsabi so Katawan onggiwgiw ya amin so bengatla: say dalin tan say maawang a danum ed dalem to, say tawen tan say katawenan ed tagey to.

19Nayegyeg iray kapalandeyan, tan nayakayak iray pundasion na dalin no onnengneng ed sikara so Katawan.

20Ag ak iimanoen na Katawan. Anggapoy walad amin a totoo so gagawaen ko.

21Anggapoy makalikas no mankasalanan ak tan maamut ya aliwa ak a matoor.

22No manggawa ak na duga, anggapoy mangibaga ed Katawan na nipaakar ed gagawaen ko. Siopay malabay a manalagar ed sikato? Agaylay tantan ton manggawa ed imbaga ton gawaen to.”

23Say toon anggapoy kalakal to, makulang-kulang tan aliway inkabangat to so mannunot labat na onya.

Say Kakabatan na Dios ed Impamalsa to

24Anak, dengel ka tan asikasom so ibagak ed sika; makagamur kay pakaamta no ondengel ka.

25Itdan to kay ambelat tan tuan bilin.

26Diad gapoy gapo say Katawan ginawa toy kimey ton panagpalsa,

tan initdan toy balang bengatla na dilin pasen to.

27Inlira toy amin a bengatla diad andi-anggan ya oksuy

tan impaakseb toy ley ya ando lan andon onya.

Anggapoy anggan sakey a parti na pinalsa a naerasan;

anggapoy partin nakesawan odino ontondan mankimey.

28Ag manseseksekan iray parti,

tan ag da susumlangen so salita to.

29Nen ginaway Katawan ya amin ira ya,

ninengneng toy dalin tan pinano to na saray maung a bengatla.

30Minakmakan to na amin a klasiy pinalsa

a nepeg day ompatey tan ompawil ed dabuk.