Jeremias 43 - Pangasinan Meaning-Based Bible(MBBPAN83)

Niakar ed Egipto si Jeremias

1Asumpal kon imbagad saray totoo ya amin iray impaibagad siak na Katawan a Dios da.

2Insan si Azarias a lakin anak nen Hosaya, si Johanan a lakin anak nen Carea, tan saray arum a mapaatagey a totoo kuandad siak, “Mantitila ka. Ag ka imbaki na Katawan a Dios mi a mangibagad sikamin ag kami manayam ed Egipto.

3Ingen sinogsogan ka nen Baruc a lakin anak nen Nerias, pian nipasilong kamid pakayari na saray taga Babilonia, et nayarin napatey da kami odino niakar da kami ed Babilonia.”

4Kanyan si Johanan, odino siopaman ed saray pangulo na saray sondalo, odino siopaman ed saray totoo et ag da labay so ontoluk ed ganggan na Katawan a mansiansia ran manayam ed dalin na Juda.

5Insan si Johanan tan amin da ra may pangulo na saray sondalo inyakar dad Egipto so balang toon atilak ed Juda, a pati amin da ray totoon pinmawil a manlapud saray bansan nikaykayatan da:

6saray lalaki, saray bibii, saray anak, tan saray bibiin anak na ari. Inala ray amin ya intilak nen Nebuzaradan a pangulo na saray sondalo na Babilonia diad panagasikaso nen Gedalias; akapila diay Baruc tan siak.

7Ag da inonur so ganggan na Katawan tan linma rad Egipto ya anggad siudad na Tafnes.

8Diad Tafnes say Katawan inkuantod siak,

9“Mangala ka na pigaran ankakabaleg a bato tan ikotkot mod dalan diad arap na lolooban na paalagey na gobirno diad sayan siudad, tan abuloyan mo ray pigaran Judio ya onnengneng ed gagawaen mo.

10Insan mo ibagad sikara a siak, say Katawan a Makapanyarin-amin a Dios na Israel, iyakar ko diay aripen kon Ari Nabucodonosor na Babilonia, insan to ipasen so trono to diad tapew na sayan inkotkot mon bato, tan ipaalageyan to na tulday ari.

11Onsabiy Nabucodonosor tan taloen toy Egipto. Saray asintinsiaan lan ompatey ed salot ompatey irad salot; saray asintinsiaan lan naalan priso naala ran priso; tan saray asintinsiaan lan ompatey ed bakal ompatey irad bakal.

12Poolan ko ray timplo na saray diriyos na Egipto tan say ari na Babilonia et poolan to ray diriyos da odino isempet to ra. Linisan na ari na Babilonia so Egipto, a singa panlinis na sakey a pastol ed kawes to diad pangekal tod saray lies na karniro, insan onsempet lan sipapalabo.

13Temeken to ray masanton bato a monuminto ed Heliopolis diad dalin na Egipto, tan poolan to ray timplo na saray diriyos na saray Egipsio.”