Daniel 10 - Pangasinan Meaning-Based Bible(MBBPAN83)

Say Nipasingayew ed kinen Daniel diad Gilig na Ilog na Tigris

1Nen kumatlon taon na panaari nen Ciro ed Persia, sinmabid kinen Daniel a tatawagen met na Beltsasar so salita. Tua ra so salita, balet mapalalon mairap a talusan. Nipaliwawad sikato diad panamegley na sakey a pasingayew.

2Diad saman a panaon, maneermen ak a taloy simba.

3Ag ak angan na antokaman a mananam a kakanen odino antokaman a karni; ag ak inminom na dinanman ya alak, tan ag ko sinagaysay so buek ko ya anggad kalabas na taloy simba.

4Diad kumaduamplo tan apat ya agew na ononan bulan na saman a taon, manalalagey ak ed gilig na baleg ya Ilog na Tigris.

5Tinmangay ak, et anengneng koy sakey a lakin akakawes na linen tan akabalkes na pinon balituk.

6Mankidyam a singa alahas so laman to. Singa kirmat so liwaway lupa to, tan singa mandarlang ya apoy iray mata to. Mansiayap a singa pinasileng a gansa iray taklay tan bikking to, tan makmaksil a singa ungol na olup na dakerakel a totoo so bosis to.

7Bukbukor koy akanengneng na saman a pasingayew. Anggapoy antokaman ya anengneng na saray totoon kaibak, balet lapud mapalalon inkataktakot da, batik iran inmamut.

8Bukbukor koy atilak diman, a bambantayan ko man a makapakelaw a pasingayew. Anggapoy nakdaan a biskeg ko, tan naoman so nengneng na lupak, kanyan anggapoy makabirbir ed siak.

9Nen nadngel koy bosis to, nipatiblak ak ed dalin tan nakalan ak na liknaan.

10Insan walay liman angegnad siak, intagey to ray limak, tan impatalimukor to ak; manggiwgiw ak nid saman.

11Inkuan na samay anghil ed siak, “Daniel, inararo ka na Dios. Alagey ka tan dengedengel moy ibagak ed sika. Nibaki ak ed sika.” Kapangibaga to yad siak, inmalagey ak a mangigiwgiw ni.

12Insan inkuanto, “Daniel, ag ka natatakot. Dinengel na Dios so pikakasim nanlapu lad samay ononan agew na impanpaabebam, pian nawalaan kay maung a pakatalus. Ebat na pikakasim so inyakar ko dia.

13Say prinsipin anghil na nanarian na Persia et sinumlang to ak na duamplo tan sakey ya agew. Insan si Miguel a sakey ed saray manonan anghil et dinmagon tinmulong ed siak, lapud bukbukor koy atilak ed Persia.

14Linma ak dia, ta ipatalus kod sikay nagawad saray totoom diad arapen a panaon. Sikato yay pasingayew a nipaakar ed arapen a panaon.”

15Kayari to ra yan imbaga, ninmengneng ak ed dalin ya ag ak makasalita.

16Insan samay anghil, a singa tooy nengneng to, et diniwit to ray bibil ko. Inkuankod sikato, “Pakakapoyen ak a maung na sayan pasingayew. Ag ontonday panggiwgiw ko.

17Singa ak aripen ya akaalagey ed arap na amo to. Panoy pakapitongtong kod sika? Anggapo lay nakdaan a biskeg odino ingas ko.”

18Inegnaan to ak lamet, et binmiskeg ak.

19Inkuanto, “Inaro ka na Dios, kanyan ag ka natatakot no ag ingen mandeen ka tan pabiskeg moy linawam.”

Kayari ton nansalita, lalon binmiskeg ak tan inkuanko, “Ibagam ed siak so labay mon ibaga. Pinabiskeg mo ak?”

20-21Inkuanto, “Amtam so makasengeg na inyakaran kod sika? Linma ak dia, ta ipaamtak ed sika so nisulat ed Libro na Katwaan. Ompawil ak la natan, ta milaban ak ed anghil a bantay na Persia. Kayari to ya ompanengneng so anghil a bantay na Grecia. Anggapoy arum ya ontulong ed siak likud ed kinen Miguel ya anghil a bantay na Israel.