2 Saray Arari 2 - Pangasinan Meaning-Based Bible(MBBPAN83)

Niakar ed Tawen si Elias

1Sinmabi lay oras na pangala na Katawan ed kinen Elias ed tawen diad panamegley na alimbusabos. Pinmikal ed Gilgal si Elias tan si Eliseo;

2nen wala rad dalan inkuanen Elias ed kinen Eliseo, “Tilak ka dia, ta ingganggan na Katawan ya onla ak ed Betel.”

Balet inmebat si Eliseo, “Sambaan ko diad inkatoor kod mabilay a Katawan tan diad sika ya ag ta ka sianan.” Kanyan linma ran dua ed Betel.

3Linmad kinen Eliseo so sakey a grupo na saray propita a manaayam diman tan kuandad sikato, “Amtam a diad sayan agew et alaen ed sika na Katawan so amom?”

“On, amtak,” ebat nen Eliseo. “Balet ag tayo la tan pantongtongan.”

4Insan inkuanen Elias ed kinen Eliseo, “Tilak ka dia natan; ingganggan na Katawan ya onla ak ed Jerico.”

Balet inmebat si Eliseo, “Sambaan ko diad inkatoor kod mabilay a Katawan tan diad sika, ya ag ta ka sianan.” Kanyan linma ran dua ed Jerico.

5Linmad kinen Eliseo so sakey a grupo na saray propita a manaayam diman tan kuandad sikato, “Amtam a diad sayan agew et alaen ed sika na Katawan so amom?”

“On, amtak,” ebat nen Eliseo. “Balet ag tayo la tan pantongtongan.”

6Insan inkuanen Elias ed kinen Eliseo, “Tilak ka dia natan; ingganggan na Katawan ya onla ak ed Ilog na Jordan.”

Balet inmebat si Eliseo, “Sambaan ko diad inkatoor kod mabilay a Katawan tan diad sika ya ag ta ka sianan.” Kanyan linma ran dua,

7tan limamplon propitay tinmombuk ed sikara ya anggad Jordan. Tinmondad gilig na ilog si Elias tan si Eliseo, balet nanalagey ed bandad arawiy daiset ira may limamplon propita.

8Inekal nen Elias so kolibemben to, nilokut to, insan impaspas tod danum; apaldua so danum, insan dinmalan iran dua nen Eliseo ed amagan dalin nen binmasil ira.

9Diad basil na ilog inkuanen Elias ed kinen Eliseo, “Ibagam no antoy labay mon gawaen kon para sika, kasakbayan a naala ak ya onlad tawen.”

Inmebat si Eliseo, “Patawiran mo ak pa na babaleg a pakayarim, pian nayarian koy onsalat ed sika.”

10“Mairap ya iter itay kerew mo,” ebat nen Elias. “Anggaman ontan, nagamuran mo no nanengneng mon nanaala ak ed arap mo; balet no ag mo ak nanengneng, ag mo nagamuran.”

11Intuloy day pantotongtong da legan dan manaakar, insan kabebekta linmeet ed sikaray karwahin apoy a bibiraen na saray kabayon apoy, tan say alimbusabos inyakar tod tawen si Elias.

12Anengneng nen Eliseo so agawa tan ineyag tod kinen Elias, “Ama, ama! Makapanyarin manangyagel na Israel!” Insan ag to la anengneng a balut si Elias.

Diad ermen nen Eliseo, pinilat ton nankadwa so kolibemben to.

13Insan to dinokdok so kolibemben a naplag a nanlapud laman nen Elias, pinmoliktar tan nanalagey ed gilig na Ilog na Jordan.

14Impaspas tod danum imay kolibemben nen Elias tan kuanto, “Kawalaan na Katawan, say Dios nen Elias?” Pinaspas to lamet so danum, et abelsay, kanyan nanakar ya anggad basil na ilog.

15Anengneng na saramay limamplon propita a nanlapud Jerico si Elias tan kuanda, “Walad kinen Eliseo so pakayari nen Elias!” Nila ran inabet, dinmakmomo rad arap to

16tan kuanda, “Limamplo kami dian mabisbiskeg a lalaki. Abuloyan mo kamin onla, ta anapen miy amom. Angangko inyakar ed arawi na ispiritu na Katawan, insan to intilak ed sakey a toktok na palandey, odino diad sakey a patar a pasen.”

“Andi, ag kayo oonla,” ebat nen Eliseo.

17Balet impasoot day kerew da ya anggad inabuloyan to ran onla. Linma ran amin a limamplo tan inanap dan taloy agew si Elias, balet ag da nalmo.

18Insan ira pinmawil ed kinen Eliseo a nanalagar ed sikarad Jerico. Inkuantod sikara, “Ag ko ta imbagad sikayon ag kayo oonla?”

Saray Milagro a Ginawa nen Eliseo

19Wala ray linmad kinen Eliseo a pigaran lalakin taga Jerico tan kuandad sikato, “Onung nanenengneng yo marakep yan siudad, balet aliwaliwa diay danum tan makapaekal na lokun da ray bibii.”

20Ingganggan tod sikara, “Mangyan kayoy daiset ya asin ed balon yaung tan awit yo diad siak.” Angawit irad sikato,

21insan linmad kawalaay sobul na siudad, imbontuk tod danum imay asin, tan kuanto, “Onyay ibabagay Katawan: ‘Gawaen kon masamit yan danum, tan ag la makapatey odino makapaekal na lokun da ray bibii.’”

22Nanlapud saman nagmaliw a masamit imay danum, onung na nagawan imbaga nen Eliseo.

23Tinmaynan ed Jerico si Eliseo, ta onlad Betel, tan diad dalan inabet na pigaran ogogaw a lalakin taga baley tan niluludlurey da. “Taynan ka dia, sikan yangyangan!” ineeyag da.

24Nilingaw to ra, minoldagatan to ra, tan insamba to rad ngaran na Katawan. Kabebekta pinmaway ed takel so duaran uso a kabatyan tan binibingkas day apataplo tan dua ed saramay ogogaw a lalaki.

25Manlapud man tinmuloy ed Palandey na Carmelo si Eliseo, insan pinmawil ed Samaria.