Sirac 46 - Pangasinan Meaning-Based Bible(MBBPAN83)

Si Josue

1Si Josue a lakin anak nen Nun et matalonggaring a sondalo tan sikatoy tinmombuk ed saray propita kayari nen Moises. Tinokuyan toy kabaliksan na ngaran to a sikatoy matalonggaring a manangyagel na saray totoon piniliy Katawan. Tinalo to ray kalaban a dinmogpad sikara, pian naala na Israel so dalin to.

2Agaylay dakep a nengnengen nen inyatagey toy taklay to, insan to impangulo so indogpad saray siudad!

3Anggapoy makalaban ed sikato; diad saray bakal na Katawan so akilabanan to.

4Nanunotan yo no panoy impamatonda tod agew tan impagmaliw ton sanagew so duaran agew?

5Nen tataktakotan na saray kalaban to ed amin a dapag, nampikasid Katawan a Sankatageyan, et naebatan so pikakasi to na makaderal a pakayariy oran na kristal.

6Impelag na Katawan ed saray kalaban so oran na kristal, et pinapatey to rad dalan diad Bet-horon, pian nabirbir na saray bansa so ontan lan biskeg nen Josue, bangta sikatoy mibabakal a sakey a matoor a mananombuk na Katawan.

Si Caleb

7Legan a mabilay si Moises, matoor si Josue tan si Caleb a lakin anak nen Jefone. Ag ira inmabubon ed labay na amin a totoo, pinatonda da rad panririklamo ra tan ag da pisasalamat, tan impaliis da rad pankasalanan.

8Diad saray anem a lasus a libon Israelita a binmeltang ed kalawakan, sarayan dua labat so nipaliis ed patey tan naabuloyan iran onloob ed mayaman tan mataban dalin a kayaryanen da.

9Pinabiskeg na Katawan si Caleb, et nen masiken la, mabisbiskeg nin linma ed kapokdulan a bansa tan dinakep ton para sikato tan saray kabyangay boleg to.

10Diad onya nanengneng na intiron Israel ya agaylay abig na ontombuk ed kinen Katawan.

Saray Huis

11Insan wala ray huis a balang sakey ed sikara et binmantug nen panaon to, tan ag iran balut nanlingkur ed saray diriyos, tan ag dan balut inkaindan so Katawan.

12Napagalangan komuy pakanudnunotan ed sikara! Ombangon komun ed lobuk da ira yan totoon papagalangan tayo, tan nabilay ira ed saray kabyangay boleg da!

Si Samuel

13Inaro na Katawan si Samuel. Lapud sakey a propita na Katawan inletneg to so nanarian tan anoro na saray manoley ed saray totoo.

14Sinintinsiaan to so bansa onung ed Ganggan na Katawan, et inyagel na Katawan so Israel.

15Lapud matoor si Samuel, sikatoy abirbir a tuan propita. Lapud sikatoy sakey a managimano, nanmatalek ed sikato iray totoo lapud saray salita to.

16Nen tataktakoten na saray kalaban to manlapud amin a dapag, tinmawag ed Katawan tan insaklang ton sakey a bagat ed sikato so sakey a malangwer a kordiro.

17Insan kinmarul a nanlapud tawen so Katawan a katekep na makapanyarin ungol

18tan pinapatey ton amin iray kalaban a manooley ed Filistia.

19Nen ngalngali la ompatey si Samuel, sinambaan tod arap na Katawan tan say alanaan ya ari ya ag ton balut angala na kayaryan na siopaman, ya anggan sankaparis a sapatos, et anggapoy toon anumlang ed sikato.

20Anggan kayari na impatey to, impropisiya tod Ari Saul no panoy ipatey to. Manlapud lobuk nansalita a sakey a propita, a pangekal tod kaogsan na saray totoo.