Ester (Grigo) C - Pangasinan Meaning-Based Bible(MBBPAN83)

Say Pikakasi nen Mardokeo

18 Nampikasid Katawan si Mardokeo ya anunotan to ray ginagawa na Katawan ed imbeneg iran panaon:

19 “O Katawan, sika so Katawan tan Ari na amin a pinalsa, tan oonuren na amin a bengatla iray ganggan mo. No labay mon ilaban so Israel, anggapoy makapatondad sika.

20 Ginawam so tawen tan say dalin tan amin a makapakelaw ed tapew na dalin.

21 Sika so Katawan na amin, tan anggapoy makasumlang ed sika.

22 Amtam ya amiy bengatla. Amtam, Katawan, a nen ag ak ontuek ed kinen Haman a mapaatagey a too, aliwan lapud mapaatagey ak odino labay kon panisiaen iray totoo ed siak.

23-24 Ag ko labay a pagalangan so siopaman a too na alabas nen say pamagalang kod Dios. Ag ko labay so ontuek ed siopaman, no ag diad sika labat, Katawan ko; et aliwan lapud panagpaatagey ya. No makatulong ed pangilaban ed Israel, maabuloy ak ya anggan onangub ed saray dapan na sali nen Haman.

25-26 “Natan, O Katawan, Dios tan Ari, Dios nen Abraham, iyagel mo pa ray totoom; iliktar mo kami pad saray kalaban mi. Malet a getma na saray kalaban mi a pateyen da kami; manaanap iray pankanawnawa ra. Nen saman, pinili mo kami tan impagmaliw mo kamin totoom tan inyagel mo kamid dalin na Egipto. Ag mo kami pa ikakaindan natan.

27 Sikami ray pinilim a totoo, kanyan dengel mo pay pikakasik tan kasian mo kami. Pagmaliw mo pan liket so maoges a kapalaran mi, pian mambilay kamin mankanta a pangidayew ed sika. Ilaban mo kami pad patey, pian nituloy miy pangidayew ed sika.”

28 Maksil tan masimoon a nampikasi ya amin iray totood Israel, lapud anggapoy duaruwa ra ya ompatey ira.

Say Pikakasi nen Ester

29 Si Riyna Ester, diad ontan lan kagugunigon to, et inmapireng ed Katawan.

30 Inekal toy marake-rakep a kawes to tan insolung toy kawes a para ermen tan sulit. Saray ankablin pabalingit komun so ikana to, balet ininan to na dapul tan tai so olo to. Ginawa toy amin a nayarian ton gawaen a pamaaliwa na nengneng to. Say agotgot tan ag asagaysay a buek to et pinaolyan ton akaloyloy ed laman to, a lawas pararakepen to nen saman.

31 Impikasi tod Katawan a Dios na Israel, “Katawan tan Arik, sika labat so Dios. Bukbukor ko, et anggapoy arum a napirigan ko no ag say sika. Tulongan mo ak pa!

32 Asingger ko lan iposta so bilay ko.

33 Nanlapu lad intuboy kalakal ko, nanunotan ko ya imbagad siak na pamilyak no panoy impamilim ed Israel ed amin da ray bansa, tan no panoy impamilim nen saman ed saray lalaki mi a magmaliw iran totoom ya anggad angga. Sinumpal moy amin a sipan mod sikara.

34 “Balet nankasalanan kamid sika. Impalima mo kamid saray kalaban mi, lapud inggalang mi ray diriyos da.

35 Kanepegan miy impanusam, O Katawan.

36 Balet ag ni apenek iray kalaban mi ed pakanengneng dad sikamin aripen. Sinambaan dad saray diriyos da

37 ya aliwa labat a pateyen da ray totoon mangidadayew ed sika, no ag ingen deralen da met so Ganggan mo tan andi-anggaan dan ekalen so kagalangan na abung tan altar mo.

38 Labay dan idayew na intiron mundo iray andi-kakanaan a talintao da ray diriyos tan takotan ya andi-anggaan iray ompatey met ya arari.

39 “Katawan, andi-kakanaan ira yan diriyos; ag mo pa isusukoy pakayarim ed sikara odino itdan iray kalaban mi na pankanawnawan onelek lapud kapelag mi. Ingen, papoliktar mo pad sikara iray maoges a plano ra tan gawam pan sakey a panmarmaran so toon ononan angiplano na ipatey mi.

40 “Nudnunot mo kami pa, O Katawan. Dago mo kami pad sayan panaon na gunigon. Pabiskeg mo pay linawak, Ari na amin da ray diriyos tan Manoley na amin da ray pakayari ed tapew na dalin.

41 Itdan mo ak pa ray dugan salita no onla ak a miarapan ed kinen Asuero, saman a maruksan lion. Oman mo pay puso to pian sumpaen toy Haman, say kalaban mi tan patey mo pay Haman tan saray kagampi to.

42 Dago ka pan mangyagel ed sikami, O Katawan. Tulongan mo ak pa, bukbukor ko, tan anggapoy arum a naapirengan ko, no ag sika labat.

43 “Amtam ya amiy bengatla, Katawan. Amtam a kabosul koy kagalangan a nanaawat kod sarayan Hintil. Ag ko labay ya anggan nunoten so piakdul kod sarayan ag asegat a pagano.

44 Balet amtam ya anggapoy nagawaan ko. Kabosul koy korona a nepeg kon iyan ed olok no walay opisyal a silibrasion. Ag kon balut ikokorona no ag nakaukolan; makapaingungot a singa lupot ya inkana na biin aliberan.

45 Ag ko labay so mangan ed lamisaan nen Haman odino pagalangan so ari diad panamegley na iyakar kod saray ponsia to, tan ag kon balut inminom na alak a nisaklang ed saray diriyos to.

46 Nanlapu lad inkiakar ko dia, say makakaiter ed siak labat na gayaga et say pangigagalang kod sika, Katawan a Dios nen Abraham.

47 “Makapanyarin-amin a Dios, dengel mo pay pikakasi na saray totoom. Iyagel mo kami pad sarayan maoges a totoo, tan ekal mo pad siak so takot ko.”