Sirac 21 - Pangasinan Meaning-Based Bible(MBBPAN83)

Kasalanan

1Anak, nankasalanan ka? Ag mo ooliten tan kerew kay pirdona lapud saray ginawam.

2Arawian mon singa oleg so kasalanan. No kapaasingger kad kasalanan, iketket tod kamarerwam iray ngipen to a singa lion, tan deralen to ka.

3Amin a gawan sumpad ganggan mangitilak na ag onabig a sugat, a singa sinigbat na duaray tarem ya ispada.

4No malastug tan mapaatagey so sakey a too, nayarin nabalang toy amin a kayaryan to.

5No mampikasi ray totoon mairap-bilay, dengelen ira na Dios tan ebatan ton tampol iray pikakasi ra.

6No ag mo labay ya akoen so panametek, mankakasalanan ka; tan no tatakotan moy Katawan omanen mon petepeteg so kagagawam.

7Nayarin bantug a manalita so sakey a too, balet no sikatoy alingo, nibiig na sakey a toon makalakal.

8Say toon ombabayes na kuartan pamaalagey toy abung to et manitipon labat na saray baton panggaway pantion to.

9Singa bunton na kusot so tipon na totoon ag mangabkabilangad Ganggan; onliub so kasumpalan da.

10Mablak tan patar so dalan a pankukurangan na saray makasalanan, balet mamapaarap ed pasen a panaayaman da ray inaatey.

Say Kakabatan tan Inkakulang-kulang

11Siopamay labay ton onuren so Ganggan nepeg ya amtaen toy kabaliksan na Ganggan. No walay peteg a takot mod Katawan, walay kakabatan mo.

12Nepeg a maotek ka, pian naaralan moy anggan anton bengatla; balet wala tay pankonkoanan labat a maotek a pakaongangetan na saray totoo.

13Say pakaamta na toon makabat et singa ilog ya ag balut nanaekatan, singa lawas managagos a kolus na maung a simbawa.

14Balet say toon a makulang-kulang singa bangan botaw so kanunotan to; nabalang a tampol so antokaman a nanaaralan to.

15No narengel na toon walay aral so bengatlan napnoy kakabatan, pataremen toy isip to tan iwanwan tod arum iran kanunotan. Balet no say makadngel et say toon maliket lad kipapasen ton anggapoy amta, ag to labay, tan lingwanan ton tampol.

16Say pandengel ed toon makulang-kulang et singa panaakar a walay ambelat a sankasakbat mo, balet makapaliket so pandengel ed ibabaga na maotek a too.

17Mampilalek ya ondengel ed toon maotek so tipon na totoo tan motekteken da ray ibabaga to.

18Diad toon anggapoy amta, say kakabatan et andi-kakanaan a singa abung ya aderal-deral. Ag to anggan balut ninunot so nipaakar ed saray bengatlan sigsiguradod sikato.

19Diad toon anggapoy kalakal, singa pusas so aral,

20-21balet diad toon makalakal, singa balituk a pulsiras. Ngalngali ag nalikas so kakaimis na toon maotek, balet manlaldak so elek na toon makulang-kulang.

22-23Say toon makulang-kulang ontakiling ed puirtay abung na sakey a too, insan onloob lan tampol, balet say toon walay salsalid bilay tan marakep so kagagawa to et manalagar ed paway na puirta lapud panamagalang to.

24Aliwliwan kagagawa so pandengel ed saray puirta tan siopamay maung so kagagawa to et ambaing a manggawad saya.

25Saray totoon malabir tongtongen da ray nipaakar ed bengatlan ag da nepeg a pibabalian, balet nununoten na saray totoon makabat so pansumpalan na ibabaga ra.

26Sasalitaen na saray makulang-kulang so antokaman ya onsasabid kanunotan da; mannunot ni kasakbayan a mansalita iray totoon makabat.

27No isasamba na toon maoges so kalaban to, isasamba toy sikaton dili.

28Dederalen na toon managtalabutob so dilin ogali to, tan kabosul na amin a kaabay to.