Saray Bilang 26 - Pangasinan Meaning-Based Bible(MBBPAN83)

Say Kumadwan Impanbilang ed saray Totood Israel

1Kayari na samay salot inkuan na Katawan ed kinen Moises tan si Eleazar a lakin anak nen Aaron,

2“Ala yo onung ed pamilya na balang sakey ed sikara, so bilang na amin da ray lalakin mantaon na duamplo a mampaatagey a nayarin mansondalo.”

3-4Inmonur ira di Moises tan Eleazar kanyan impantitipon da ray amin a lalakin mantaon na duamplo a mampaatagey. Nantitipon ira diad saray patar na Moab diad nibaliw na Ilog na Jordan manlapud Jerico.

Sikara yay Israelitan pinmaway manlapud Egipto:

5Say tribu nen Ruben (si Ruben so sankapangulowanan ya anak nen Israel): saray boleg di Hanoc, Fallu,

6Hezron, tan Carmi.

7Say bilang da ray lalaki ed sarayan boleg et apataplo tan talon libo, piton lasus tan talomplo.

8Saray kabyangay boleg nen Fallu et si Eliab

9tan saray lalakin anak to a di Nemuel, Datan, tan Abiram. (Sikara ya may Datan tan Abiram a pinili na karaklan. Sinumpa ray Moises tan Aaron tan akigampi ra ed kinen Core nen sinumlang day Katawan.

10Sinmangi so dalin tan inakmon to ra, et inatey iran kaiba nen Core tan saray mananombuk to nen dineral na apoy so duanlasus tan limamplon lalaki; sikaray sakey a pasakbay ed saray totoo.

11Balet ag inatey iray lalakin anak nen Core.)

12Say tribu nen Simeon: saray boleg di Nemuel, Jamin, Jakin,

13Zera, tan Saul.

14Say bilang da ray lalaki ed sarayan boleg et duamplo tan duan libo tan duanlasus.

15Say tribu nen Gad: saray boleg di Zefon, Hagi, Suni,

16Ozni, Eri,

17Arod, tan Areli.

18Say bilang da ray lalaki ed sarayan boleg et apataplon libo tan limanlasus.

19-21Say tribu nen Juda: saray boleg di Sela, Fares, Zera, Hezron, tan Hamul. (Saray duaran lalakin anak nen Juda a di Er tan Onan et inatey ira ed dalin na Canaan.)

22Say bilang da ray lalaki ed sarayan boleg et pitomplo tan anem a libo tan limanlasus.

23Say tribu nen Isacar: saray boleg di Tola, Pua,

24Jasub, tan Simron.

25Say bilang da ray lalaki ed sarayan boleg et anemaplo tan apat a libo tan talon lasus.

26Say tribu nen Zabulon: saray boleg di Sered, Elon, tan Jaleel.

27Say bilang da ray lalaki ed sarayan boleg et anemaplon libo tan limanlasus.

28Saray tribu nen Jose ya ama na duaran lalaki a di Manases tan Efraim.

29Say tribu nen Manases. Si Makir a lakin anak nen Manases so ama nen Galaad, tan saray onggendan a boleg a si Galaad so sengeg da:

30saray boleg di Jezer, Helek,

31Asriel, Sekem,

32Semida, tan Hefer.

33Si Zelofehad a lakin anak nen Hefer et anggapoy anak ton laki, balet wala ray bibiin anak to; Mala, Noa, Hogla, Milca, tan Tirza so kangaranan da.

34Say bilang da ray lalaki ed sarayan boleg et limamplo tan duan libo tan piton-lasus.

35Say tribu nen Efraim: saray boleg di Sutela, Beker, tan Tahan.

36Si Sutela so sengeg na boleg nen Eran.

37Say bilang da ray lalaki ed sarayan boleg et talomplo tan duan libo tan limanlasus.

Si Jose so sengeg na sarayan boleg.

38Say tribu nen Benjamin: saray boleg di Bela, Asbel, Ahiram,

39Sefufam, tan Hufam.

40Si Bela so sengeg na saray boleg di Arid tan Naaman.

41Say bilang da ray lalaki ed sarayan boleg et apataplo tan liman libo tan anem a lasus.

42Say tribu nen Dan: say boleg nen Husim,

43a say bilang da ray lalaki et anemamplo tan apat a libo tan apat a lasus.

44Say tribu nen Aser: saray boleg di Imna, Isvi, tan Beria.

45Si Beria so sengeg na saray boleg di Heber tan Malkiel.

46Si Aser et walay biin anak to a manngaran na Sera.

47Say bilang da ray lalaki ed sarayan boleg et limamplo tan talon libo tan apat a lasus.

48Say tribu nen Neftali: saray boleg di Jahzeel, Guni,

49Jezer, tan Sillem.

50Say bilang da ray lalaki ed sarayan boleg et apataplo tan liman libo tan apat a lasus.

51Say bilang na amin da ray Israelitan lalaki et anem a lasus tan sakey a libo, piton lasus tan talomplo.

52Say Katawan kuantod kinen Moises,

53“Apag-apag mo so dalin ed saray tribu onung ed kabaleg da.

54-56Apag-apag mo so dalin diad panamegley na pampapalaranan; ipabetang mod baleg a tribu so baleg ya apag tan ipabetang mod melag a tribu so melag ya apag.”

57Saray kabyangay tribu nen Levi et saray boleg di Gerson, Coat, tan Merari.

58Saray kabyangay boleg da et saray pamilya di Libni, Hebron, Mahli, Musi, tan Core. Si Coat et ama nen Amram

59ya asawa toy anak nen Levi a si Jacobed a nianak ed Egipto. Walay anak tod kinen Amram a duaran lalaki a di Aaron tan Moises tan sakey a bii a si Miriam.

60Apatiray lalakin anak nen Aaron a di Nadab, Abiu, Eleazar, tan Itamar.

61Inatey ira di Nadab tan Abiu nen angyapay irad Katawan na aliwan masanton apoy.

62Say bilang da ray lalakin Levita a mantaon na sakey bulan a mampaatagey et duamplo tan talon libo. Nibiig ed saray arum ya Israelita so angilistaan ed sikara, lapud ag ira naitdan na antokaman a kayaryan ed Israel.

63Amin da ra yan boleg et inlista di Moises tan Eleazar nen inala ray bilang na saray Israelita diad saray patar na Moab diad nibaliw na Ilog na Jordan manlapud Jerico.

64Anggapoy anggan sakey a lakin akeraan ed saramay inlista di Moises tan Aaron diad samay inmonan impanbilang da diad Kalawakan na Sinai.

65Imbaga la na Katawan ya ompatey iran amin ed kalawakan likud ed kinen Caleb a lakin anak nen Jefone tan si Josue a lakin anak nen Nun. Inatey iran amin a tua likud ed saramay duara.