Joel 1 - Pangasinan Meaning-Based Bible(MBBPAN83)

1Sikato yay salita na Katawan a sinmabid kinen Joel a lakin anak nen Petuel.

Pannangis na saray Totoo lapud Kaderal na saray Tanaman

2Dengel kayo, sikayon mamatakken a totoo;

dengel kayo, sikayon amin a totood Juda.

Walay bengatlan singa onyan agawa

diad panaon yo odino diad panaon da ray lalaki yo?

3Ibaga yod saray anak yo so nipaakar ed sayan agawa;

ibaga da met ed satan ed saray anak da,

insan saratan ya anak da ibaga da met ed ontombuk a kailalakan.

4Nantotombukan a dinmadapod saray tanaman ed kaalogan iray pigaran grupoy dorun;

inooput na arum a grupo iray tanaman a kera-keray sakey a grupo.

5Bangon tan mannangis kayo, sikayon buanges;

akis kayo, sikayon mainom na alak;

aderal-deral la ray ubas a panggawaay balon alak.

6Dinogpaan na amayamay a dorun so dalin tayo;

makapanyari ra tan ag ira nabilang;

matdem a singa tarem na ngipey lion so ngipen da.

7Dinederal da ray sengeg na ubas tayo

tan nginingitngit da ray kiew tayon igos.

Ineekal dan impepelag iray obak

ya anggad ampoti-poti ray sanga.

8Akis kayon singa sakey a marikit a nanangisan toy impatey na nubio to.

9Anggapo lay trigo odino alak ya ibagat ed Timplo;

maermen iray papari lapud anggapoy nibagat da ed Katawan.

10Anggapoy tanaman ed kaalogan;

maermen so dalin lapud aderal-deral iray trigo,

amagaan iray sengeg na ubas,

tan nalnes iray kiew na oliba.

11Manermen kayo, sikayon dumaralos;

akis kayo, sikayon managasikasoy kaubasan,

lapud aderal la ray trigo, sibada,

on, aderal lan amiy tanaman ed kaalogan.

12Nalnes iray sengeg na ubas tan saray kiew ya igos;

nalnes ya amin iray kiew a mambunga, insan ira inaatey.

Naandi lay liket da ray totoo.

13Mankawes kayoy sako tan mannangis kayo,

sikayo ran paparin manlilingkur ed altar!

Laka yod Timplo tan manermen kayon sanlabi!

Anggapoy trigo odino alak a nibagat ed Dios yo.

14Iganggan yon nagawa so sakey a panayuno;

pantitipon yo ray totoo.

Pantitipon yo ray pangulo

tan amin da ray totood Juda.

Pantitipon yo ra ed Timplo

na Katawan a Dios yo tan tawag kayod sikato!

15Asingger lay agew na KATAWAN,

say agew ya iyakar na Makapanyarin-amin so deral.

Makapataktakot yan agew!

16Legan a nadederal iray tanaman mid kaalogan

mambanbantay kami labat ya anggapoy nagawaan.

Anggapo lay liket ed Timplo na Dios tayo.

17Inaatey ed kinmelang a dalin iray bokel na tanaman.

Anggapoy trigon isempen,

kanyan aderal-deral la ray kamalir.

18Manngakngak a tangaw-tangaw iray baka,

lapud anggapoy pampastolan ed sikara;

maniiirap met iray amayamay a karniro.

19Ontatawag ak ed sika, O Katawan,

lapud amagaan iray pastolan tan saray kakiewan,

singa ra apoolan.

20Oneeyey ed sika iray ayayep ed katakelan,

lapud nakatan iray kolus.