Probirbio 14 - Pangasinan Meaning-Based Bible(MBBPAN83)

1Ombibiskeg so pamilya lapud kakabatan na saray bibii, balet naderal so pamilya lapud inkakulang-kulang.

2Mambilay kan matwa, et ipapanengneng mon walay panamagalang mod Katawan; mambilay kan maoges, et ipapanengneng mon anggapoy panamagalang mod Katawan.

3Say panagpaatagey na toon makulang-kulang panlalabiren to na mapalalo; saray salita na makabat a too so mangyaagel ed sikato.

4No anggapoy bakan napandalus mo ag nakargaay kamalir mo; balet no wala napano na ilik.

5Say napampiaan a tasi ibabaga to lawas so tua, balet say ag napampiaan tilan amin so ibabaga to.

6Ag balut narumog na saray totoon mapaatagey so kakabatan, balet saray totoon walay pakaamta mainomay toy manaral.

7Arawian mo ray totoon makulang-kulang; anggapoy nibangat dad sika.

8Akin et makabat so toon masilib? Lapud amta to no antoy gawaen to. Akin et ambagel so toon makulang-kulang? Lapud nunonoten to labat a walay amta to.

9Saray totoon makulang-kulang anggapoy walad sikara so pankakasalanan da, balet saray matonung labay day napirdona.

10Say gayagam tan kairapan mo et ag nayarin inagnag mod arum a too.

11Ageba lay abung na toon maoges, balet manalalagey niy abung na toon matonung.

12Say dalan ya abaloan mon duga et nayarin mamaarap ed patey.

13Nayarin niamut na elek so ermen. No naandi lay liket, wala lawas so ermen.

14Saray totoon maoges anien day bayar na kaogsan da. Saray totoon matonung natumangan ira, lapud saray gawgawa ra.

15Say toon makulang-kulang sisiaen toy amin a bengatla; balet saray totoon walay pakatalus aasikasoen da ray kurang da.

16Saray totoon walay pakatalus maalwar ira tan nibatikan day gunigon, balet saray totoon makulang-kulang sagpasagpa rad antokaman a gawaen da.

17Saray totoon mapasnuk manggagawa ray andi-kabaliksan; saray totoon lalon makabat mansiasiansia ran mareen.

18Saray totoon anggapoy amta nagagamuran day kanepegay inkakulang-kulang da, balet say pakaamta so tumang da ray masilib.

19Saray totoon maoges nakaukolan ya onsuko ra ed saray totoon matonung, tan mampaabeba ran onkerew na tulong ed sikara.

20Say toon mairap-bilay ag labalabay na anggan say kaabay to, balet say toon mayaman dakel so kakaaro to.

21No labay moy maliket, kasian mo ray mairap-bilay; kasalanan so pambalaw ed siopaman.

22No pankaabigan so gawaen mo panmatalkan tan galangen ka na arum a totoo; no pankaogsan so gagawaen mo, nalilingo ka.

23Mankimey ka pian walay napambilay mo; no ananggaan moy salita lan salita, magmaliw a mairap so bilay mo.

24Kayamanan so tumang na saray makabat a totoo, balet nanaamtaan iray makulang-kulang, lapud inkakulang-kulang da.

25Say tasin tuay ibabaga to bilay so ilalaban to; no tila ray ibaga to pantratraidoran to ray totoo.

26Say panangigalang ed Katawan mangiiter na talek tan mangyaarawid kaatapan ed sakey a too tan pamilya to.

27Labay mon napaliisay patey? Say panangigalang ed Katawan et sobul na bilay.

28Say inkatalonggaring na sakey ya ari nileletneg ed karakel na totoon ooleyan to; no anggapo ra anggapo met la.

29No ambetel so olom makabat ka, balet no mipepetang so olom ipapanengneng mo so ontan lan inkakulang-kulang mo.

30Say mareen a kanunotan pagmamaliwen ton mabiskeg so laman, balet singa kanser so imon.

31No pairapen mo ray totoon mairap-bilay, papabaingan mo so Dios ya amalsad sikara; balet say pangasid mairap-bilay et sakey a panangigalang ed Dios.

32Saray totoon maoges dederalen na saray dilin kaogsan da; balet saray totoon matonung iyaagel ira na dilin kamaungan da.

33Kakabatan so walad balang kanunotan na toon ikakana toy olo to; saray totoon makulang-kulang anggapoy amta ran nipaakar ed kakabatan.

34Say inkatonung pagmamaliwen ton matalonggaring so sakey a bansa; say kasalanan ipepelag tod kababaingan so anggan dinan a bansa.

35Pakaliliketan na saray arari iray marunong ya opisyal da, balet dudusaen da ray totoon ag manusumpal na kanepegan da.