1 Saray Awaran 23 - Pangasinan Meaning-Based Bible(MBBPAN83)

1Nen masikesiken lay David ginawa ton ari na Israel si Solomon ya anak to.

Say Kimey na Saray Levita

2Impantitipon nen Ari David iray amin a pangulo da ray Israelita tan amin iray papari tan saray Levita.

3Impabilang ton amin iray Levitan lalaki a mantaoy talomplo a mampaatagey. Talomplo tan walon libo so bilang dan amin.

4Impasen na ari iray duamplo tan apat a libo a mangipangulo na kimey ed Timplo, tan say anem a libo et impasen to ran makaoley ed pansulat na awaran tan panintinsia ed antokaman a kolkolan.

5Impasen to ray apat a libo a mangguardia, tan say apat a libo et impasen to ran mangigalang ed Dios diad pangikana ray kagawaan ed musika ya inter ton para sayan pamaakaran.

6Si David impankatlo ton grupo iray Levita, onung ed saray boleg da: Gerson, Coat, tan Merari.

7Duaray lalakin anak nen Gerson: di Ladan tan Simei.

8Taloray lalakin anak nen Ladan: di Jehiel, Zetam, tan Joel,

9tan sikaray pangulo na saray boleg a say sengeg da si Ladan. (Taloray lalakin anak nen Simei: di Zelomot, Haziel, tan Haran.)

10-11Apatiray lalakin anak nen Simei: manlapud sanka pangulowanan ya anggad sankayogtanan, sikara di Jahat, Zina, Jeus, tan Berias. Aliwan dakel iray kabyangay boleg di Jeus tan Berias, kanyan nipasen iran saksakey a boleg.

12Apatiray lalakin anak nen Coat: di Amram, Izhar, Hebron, tan Uziel.

13Si Amram so pangulowan tan sikatoy ama di Aaron tan Moises. (Si Aaron tan saray kabyangay boleg to et apili ran makaoley ya anggad angga ed saray masanton bengatla, mampool na insinso diad arapan na Katawan, manlingkur ed sikato, tan mamindision ed saray totoo diad ngaran na Katawan.

14Balet nipasen a kabyangan na saray Levita iray lalakin anak nen Moises a too na Dios.)

15Duaray lalakin anak nen Moises: di Gersom tan Eliezer.

16Si Sebuel so pangulo na saray lalakin anak nen Gersom.

17Saksakey so lakin anak nen Eliezer a si Rehabias. Balet amayamay so kabyangay boleg nen Rehabias.

18Say kumadwan lakin anak nen Coat a si Izhar et walay anak ton laki a si Zelomit, say pangulo na boleg.

19Say kumatlon lakin anak nen Coat a si Hebron et walay apatiran lalaki ya anak to: di Jerias, Amarias, Jahaziel, tan Jekameam.

20Say kumapat a lakin anak nen Coat a si Uziel et walay duaran lalakin anak to: di Mica tan Isias.

21Duaray lalakin anak nen Merari: di Mahli tan Musi. Duaray lalakin anak nen Mahli: sikara di Eleazar, tan Cis.

22Inatey si Eleazar ya anggapoy anak ton laki; bibii labat iray anak to. Akiasawa ray anak to ed saray kakapinsan da, saray anak nen Cis.

23Taloray lalakin anak nen Musi a kumadwan lakin anak nen Merari: di Mahli, Eder, tan Jeremot.

24Sikara yay kabyangay boleg nen Levi. Sansakey a nipalistay kangaranan da onung ed saray boleg tan pamilyan nanlapwan da. Balang kabyangay boleg to a mantaon na duamplo a mampaatagey et walay biang tod kimey ed Timplo na Katawan.

25Inkuanen David, “Say Katawan a Dios na Israel initdan to na kareenan iray totoo to, tan sikato et manayam ya anggad angga ed Jerusalem.

26Anggapo la natan sirin so pankaukolan ya alalsaen na saray Levita so Tuldan Ayamay Katawan tan amin da ray ikakana ed panangigalang.”

27Onung na saray kaonuran a bilin nen David, nipalistan manlingkur iray amin a Levitan makasabid taon a duamplo.

28Saray kimey da et say itulong dad saray paparin kabyangay boleg nen Aaron diad panangigalang ed dalem na Timplo, say pangasikasod saray solar tan saray kuarto na Timplo, tan say pangimanon ag narotakan iray amin a bengatlan masanto.

29Sikara met so makaoley ed saray tinapay ya imbagat ed Dios, diad arinan inkana ed saray panagbagat, diad saray maimpis a tinapay ya anggapoy libadura, diad saray bagat ya inggawan kanen, tan diad arinan inkames ed larak; sikara met so makaoley ed panagsimbang tan panagsukat na saray bagat ed Timplo.

30Nepeg day onalagey a misalamat tan mangigalang ed Katawan kapag kabwasan tan kapag labi

31tan kapag isaklang so bagat a popoolan no Agew na Panagpainawa, no Pistay Balon Bulan, tan no arum iran pista. Wala ray totontonen a mangibaga no pigaray Levitan manggawa ed sayan kimey da. Say pangigalang ed Katawan so kimey lawas na saray Levita.

32Sikaray makaoley a mangasikasod Tuldan Ayamay Katawan tan say Timplo. Sikara met so ontulong ed saray kakanayon dan papari a kabyangay boleg nen Aaron, diad panangigalang ed dalem na Timplo.