Say Kakabatan nen Solomon 6 - Pangasinan Meaning-Based Bible(MBBPAN83)

Say Kanepegan na saray Manoley

1Kanyan sikayo ran arari, sikayo ran manoley ed intiron mundo, dengel kayo ed ibabagak, tan panaralan yo.

2Ooleyan yo ray amayamay a dalin tan malaslastug kayo lapud dakerakel iray totoon walad silong na pakaoley yo,

3balet say Katawan a Sankatageyan so angiter ed sikayo yan pakaoley. Salaysayen to ray ginagawa yo tan saray iplaplano yon gawaen.

4Ilalaman yoy Dios tan say panarian to diad panooley yo, et no aliwan matonung so panoley yo, no ag yo italindeg so ganggan, no ag kayo mambilay onung ed linawa na Dios,

5niiter ed sikayoy bigla tan makapasinagem a dusa. Mapeget so panintinsia ed saray walad pakaoley.

6Nayarin nakasian a napirdona iray karaklan lapud saray kaogsan da, balet mapeget a pananintinsia so arapen da ray walad pakaoley.

7Say Katawan na amin a bengatla et ag antakot ed siopaman, anggan antoy inkatalonggaring to. Say Katawan a dili so amalsa ed balang too, matalonggaring man odino andi, tan nampaparay pangaasikaso tod sikara,

8balet lalon mapeget so panintinsia tod kagagawa na saray manoley.

9Para sikayo, sikayo ran makapanyarin arari, so pangisusulat ko ra yan salita, pian naamtaan yoy manoley onung ed kakabatan tan napaliisan yo ray lingo.

10Masanto ra yan bengatla, tan no masanto so pangipasen yod saraya, nipasen kayo met a masanto. No naaralan yo ya, nayarian yon iyagel so sikayon dili ed panagsintinsiaan.

11Kanyan sirin, gawa yon kayamanan tan gayaga yo so bangat ko, et maung so pakabilin ed sikayo.

Say Kaabigan na Kakabatan

12Maliwliwawan onwawandag so kakabatan tan ag balut ombibilonget; mainomay a narumog na saray mangaaro tan manaanap ed sikato.

13Masiglat ton ipipikabat so sikaton dili ed siopaman a mampipilalek ed sikato.

14Masakbay kan ombangon ed kabwasan a mananap ed sikato, et ag ka manirap, ta narumog mon manyodyorung ed abay na puirtam.

15Say pangipasakey moy imanom ed Kakabatan et sikatoy pakagamur na ayadyarin pakatalus. No anapen moy Kakabatan, ag mabayag narumog moy kareenan na kanunotan,

16lapud anapen na Kakabatan iray manepeg ed sikato, et narumog to ka anggan iner so kawalaan mo. Mapangasi so Kakabatan tan kaibam ed balang kanunotan mo.

17Onggapo so Kakabatan no masimoon so panlabay mon manaral. Say pampilalek ed Kakabatan et pangarod sikato;

18say pangarod Kakabatan et panumpal ed saray ganggan to; say panumpal ed saray ganggan to et ag panduaruwad pambilay ya anggad angga;

19say pambilay ya anggad angga et iyasingger to ka ed Dios.

20Sayan pampilalek ed Kakabatan et iparaan to kan manoley ed sakey a nanarian.

21Kanyan sirin, sikayo ran manooley ed saray bansa, no panabli yo ray trono yo tan saray tanda na pakaoley, pagalangan yoy Kakabatan, pian makapanoley kayo ya anggad angga.

Labay nen Solomon ya Inagnag so Kakabatan to

22Ibagak ed sikayo no anto so Kakabatan, tan no panoy inkiwala to. Anggapoy iyamut ko. Tontonen koy nanlapwan to manlapud gapo tan gawaen kon nayarin amtaen na amin so nipaakar ed sikato. Ag ko ipaliis so anggan dinan a parti na katwaan.

23Ag ko iyamut so antokaman a bengatla, lapud maimon a pilalek kon mambantay na dilin pakaamtak. Anggapoy pibabali na Kakabatan ed onyan kagagawa.

24No dakel iray makabat, lalon arawid kaatapan so sankamundoan. Say makalakal ya ari napanmatalkan a mangiter ed saray totoo to na onyan bilay ya arawid kaatapan.

25Kanyan manaral kayod sayan ibangat ko, et pakagonggunaan yo.