1Die Here is kwaad vir die stad Babel. Hy het vir Jesaja gewys wat met Babel sal gebeur. Jesaja was die seun van Amos. Die Here het gesê:
2“Julle moet 'n vlag in die lug hou,
julle moet dit doen op 'n berg
waar daar nie bome is nie.
Julle moet hard skree
en die vyande roep,
julle moet met die hand vir hulle wys om te kom
deur die mooi poorte van die stad Babel.
3Ek, die Here, het self die soldate gekies
om vir My te werk,
Ek het hulle geroep om oorlog te maak,
want Ek is kwaad vir Babel.
Hierdie soldate weet Ek is sterk,
en hulle is bly.”
4Luister, die soldate raas op die berge,
daar is baie soldate.
Hulle kom uit baie lande,
en hulle is bymekaar,
'n mens kan hoor hulle kom.
Die Here wat oor alles regeer,
het soldate geroep om oorlog te maak.
5Die Here is kwaad,
daarom bring Hy soldate uit 'n ver land
om sy werk te doen.
Hulle sal die hele land Babel verwoes.
6Julle moet huil,
want die dag van die Here is naby.
Die Almagtige God kom
om alles te verwoes.
7Al die mense sal baie bang word.
Hulle hande sal pap hang
en hulle harte sal bang word en bewe.
8Hulle sal pyne kry en skrik,
hulle sal krom buig soos 'n vrou wat 'n baba kry.
Hulle sal kyk na mekaar,
en hulle gesigte sal brand van die pyn.
9Kyk, die dag van die Here sal kom.
Die Here sal nie jammer wees
vir die mense van Babel nie.
Hy is kwaad en Hy sal die land Babel verwoes,
Hy sal die mense van Babel doodmaak,
hulle is sondaars.
10Ja, die sterre in die lug sal nie skyn nie,
die son sal opkom maar die son sal donker wees,
die maan sal nie lig gee nie.
11Die Here sê:
“Ek sal die slegte mense in die wêreld straf,
die mense wat verkeerd doen,
Ek sal die parmantige en hoogmoedige mense laat sterf,
Ek sal die hoogmoedige en wrede mense hard laat val.
12Die mense wat oorbly, sal baie min wees,
hulle sal minder wees as die goud van die land Ofir.
13“Ek, die Here wat oor alles regeer,
is baie kwaad.
Die dag sal kom wanneer Ek
die mense van Babel sal straf.
Dan sal Ek die hemel skud,
en die aarde sal bewe.
Ek sal die aarde uit sy plek skud.
14Al die mense van ander lande
sal vlug na hulle eie volke toe en na hulle lande.
Dit sal wees soos wanneer iemand 'n wildsbok skrikmaak,
of soos wanneer die skape weghardloop
wanneer niemand hulle oppas nie.
15Die vyande sal elke mens gryp wat hulle kry
en hulle sal hom doodmaak.
16Die mense van Babel sal sien
hoe die vyande hulle babas doodslaan,
hulle goed uit hulle huise vat
en hulle vroue verkrag.
17Ek sal die Mediërs stuur om Babel aan te val.
Die Mediërs wil nie silwer of goud hê nie,
hulle wil oorlog maak.
18Hulle sal met hulle pyl en boë
die jong soldate van Babel doodskiet,
en hulle sal nie jammer wees
vir babas en kinders nie.”
19Babel is die mooiste stad in die wêreld,
en sy mense is trots op die stad,
maar God sal die stad verwoes
soos Hy die stede Sodom en Gomorra verwoes het.
20Daar sal nooit weer mense in Babel woon nie.
Nie een Arabier sal sy tent daar opslaan nie,
en skaapwagters sal nie hulle skape
daar laat rus nie.
21 Woestyn-diere sal in Babel lê,
uile sal oral in die huise sit,
volstruise sal daar rondloop,
en veldgode sal daar dans.
22Hiënas en jakkalse sal huil in die mooi huise
waar die mense van Babel feesgevier het.
Die tyd is naby wanneer die Here Babel sal straf.
Die stad se dae is verby,
die vyande sal dit verwoes.
Who We AreWhat We EelieveWhat We Do
2025 by iamachristian.org,Inc All rights reserved.
