Abụ Ọma 20 - Igbo Contemporary Bible 2020

Abụ Ọma 20Abụ Ọma nke dịrị onyeisi abụ. Abụ Ọma Devid.Ekpere maka enyemaka

1Ka Onyenwe anyị zaa gị nʼụbọchị nsogbu gị;

ka aha Chineke nke Jekọb chebe gị.

2Ya sitekwa nʼebe nsọ ya zitere gị inyeaka,

ma site na Zayọn kwagide gị.

3Ya chetakwa aja niile ị chụrụ,

ma nabata aja nsure ọkụ niile ị chụrụ nye ya. Sela

4Ya mezukwara gị ihe niile nke obi gị na-achọ,

mekwaa ka atụmatụ gị niile gaa nke ọma.

5Anyị ga-eti mkpu ọṅụ maka mmeri i meriri,

buliekwa ọkọlọtọ anyị elu nʼaha Chineke anyị.

Ka Onyenwe anyị mezuo arịrịọ gị niile.

6Ugbu a, amaara m

na Onyenwe anyị na-azọpụta onye ya o tere mmanụ;

ọ na-esite nʼebe nsọ ya nʼeluigwe jiri aka nri ya,

zọpụta ma zakwaa ya.

7Ụfọdụ na-atụkwasị obi ha na ịnyịnya, ndị ọzọ nʼụgbọ agha;

ma anyị na-atụkwasị aha Onyenwe anyị, Chineke anyị, obi.

8Ha na-egbu ikpere nʼala ma daa,

ma anyị ga-ebili, kwụrụ chịm.

9O Onyenwe anyị, zọpụta eze!

Zakwaa anyị mgbe anyị kpọkuru gị!