1Bohlale bo hahile ntlo ya jona ka ditshiya tse supileng tse betlisitsweng hantle.
2Bo hlabile dikgomo tsa jona, bo tswakile veine, bo tekile le tafole ya jona.
3Bo romile makgabunyane a jona ho mema, le bona bo eme mahareng a motse, bo a tlerola, bo re:
4He! ya sethoto ke mang? a fapohele kwano!
5Le ho ba hlokang kelello bo re: Tloong, le je bohobe ba ka, le nwe le veine eo ke e tswakileng.
6Le hlobohe bothoto, mme le tla phela, le tsamaye tseleng ya hlalefo.
7Ya layang mosomi o ipatlela sekgobo, ya kgalemelang e mobe le yena o ya hlomphollwa.
8O se ke wa laya mosomi, esere mohlomong a o hloya; o laye mohlalefi, yena o tla o rata.
9Ruta ya nang le kelello, o tla eketsa ho hlalefa. O rute ya lokileng, o tla ekelletswa tsebo.
10Qalo ya bohlale ke ho tshaba Jehova; ho tseba Ya halalelang ke hlalefo.
11Hobane ke ka nna ditshiu tsa hao di tla atiswa, dilemo tsa ho phela ha hao di lelefatswe.
12Ha o hlalefile, ke wena o tla thuswa ke hlalefo ya hao; empa ha o le mosomi, ke wena o nnotshi o tla senyehelwa.
13Bowatla ke mosadi ya lerata; ha bo na pelokeletsi, ha bo na tsebo.
14Bo dula pela monyako wa ntlo ya bona monamong le diphahameng tsa motse,
15ho howeletsa ba fetang ka tsela, ba tsamayang ka ho loka; bo re:
16Ya leebelo a fapohele kwano; mme ho sethoto bo re:
17Metsi a utsuwang a monate, le bohobe bo jewang ka sephiring bo a hlabosa.
18Athe eo ha a tsebe hobane ke moo bafu ba leng teng, le hoba ba lallang le bona ba mohohlong wa nqalo ya bafu.
Who We AreWhat We EelieveWhat We Do
2025 by iamachristian.org,Inc All rights reserved.
