1Kamora matsatsi a mangata, lentswe la Jehova la tlela Elia, e le ka lemo sa boraro, la re: Eya, o itlhahise ho Akabe ke se ke tla nesa pula lefatsheng.
2Elia a ya itlhahisa ho Akabe. Mme tlala e ne e le kgolo Samaria.
3Akabe a bitsa Obadia, molebedi wa ntlo ya borena; haele Obadia, o ne a tshaba Jehova haholo.
4Esitile le mohla Jesebele a neng a bolaya baporofeta ba Jehova, Obadia o ne a nkile baporofeta ba lekgolo, a pata ba mashome a mahlano lehaheng le leng, a pata ba mashome a mahlano ba bang lehaheng le leng, a ba fepa bohobe le metsi.
5Akabe a re ho Obadia: Eya le naha didibeng tsohle tsa metsi le melatswaneng yohle; mohla ope re ka fumana jwang, re pholose dipere le diesele, esere ra timellwa ke diphoofolo tsohle.
6Ebile ba arolelana naha ho ya le yona yohle; Akabe a ya a nnotshi ka tsela e nngwe, le Obadia a ya a nnotshi ka tsela esele.
7Obadia ha a le tseleng, a bona Elia a mo kgahlanyeditse; a mo tseba, a inama ka sefahleho, a re: A ke wena Elia, monga ka, na?
8Yena a re: Ke nna; eya ho monga hao, o re: Elia ke enwa.
9Obadia a re: Ke entse sebe sefe, ha o neela mohlanka wa hao matsohong a Akabe, hore a mpolaye?
10Ka Jehova, Modimo wa hao o utlwang, ha ho setjhaba, leha e le mmuso, moo monga ka a sa kang a romela ho o batla; ha ho no ho thwe, ha o yo, o ne a antsha ba mebuso yohle le ditjhaba tsohle ka ho re, ha ba ka ba o bona.
11Jwale, o bolela, o re: Eya ho monga hao, o re: Elia ke enwa.
12Athe, etlare ke sa tloha ho wena, moya wa Jehova o tla o isa moo ke sa tsebeng; jwale ha ke eya, ke tsebisa Akabe, mme a sa o fumane, o tla mpolaya; athe nna, ke leng mohlanka wa hao, ke tshaba Jehova, esale le botjheng ba ka.
13Ana monga ka, ha o eso ho bolellwe seo ke se entseng, mohla Jesebele a neng a bolaya baporofeta ba Jehova, kamoo nkileng ka pata batho ba mashome a mahlano lehaheng le leng kateng, ho le leng ka pata ba bang ba mashome a mahlano, e le baporofeta ba lekgolo ba Jehova, ka ba fepa bohobe le metsi na?
14Mme jwale o re: Eya ho monga hao, o re: Elia ke enwa! Ruri o tla mpolaya!
15Elia a re: Ka Jehova wa makgotla ya phelang, eo ke emeng pela hae, ke fela ke tla itlhahisa ho yena kajeno.
16Ebile Obadia o ya kgahlanyetsa Akabe, a mo tsebisa; mme Akabe a tla ho kgahlanyetsa Elia.
17Akabe, ha a bona Elia, a re ho yena: Na efela ke wena, wena moferekanyi wa Iseraele na?
18Yena a re: Hase nna ke ferekanyang Iseraele, ke wena le ntlo ya ntatao, etswe le furaletse melao ya Jehova, mme o latetse Bobaale.
19Romela jwale, o mpokellele Baiseraele bohle thabeng ya Karmele, le baporofeta ba Baale ba makgolo a mane a mashome a mahlano, le baporofeta ba Ashtarothe ba makgolo a mane, ba jelang tafoleng ya Jesebele.
20Ebile Akabe o romela ho bana bohle ba Iseraele, a bokella le baporofeta thabeng ya Karmele.
21Elia a atamela pela setjhaba sohle, a re: Le tla tenyetsehela ho le hokae ka nqa tse pedi? Ha Jehova e le Modimo, mo lateleng; ha eba ke Baale, mo lateleng. Empa setjhaba ha se a ka sa mo araba letho.
22Hape, Elia a re ho setjhaba: Ke setse ke nnotshi ho baporofeta ba Jehova, athe baporofeta ba Baale ke batho ba makgolo a mane a mashome a mahlano.
23Re neeng poho tse pedi; ba ikgethele poho e nngwe, ba e pomahanye, ba e bee hodima patsi; feela, ba se ke ba hotetsa mollo. Le nna ke tla lokisa poho e nngwe, ke e bee hodima patsi, ke se ke ka hotetsa mollo.
24Le ntoo bitsa lebitso la modimo wa lona, le nna ke bitse lebitso la Jehova, mme modimo o tlang ho araba ka mollo a e be ke wona Modimo! Setjhaba sohle sa re: O boletse hantle.
25Jwale, Elia a re ho baporofeta ba Baale: Ikgetheleng poho e nngwe; le e lokise pele, hobane le bangata, le ntoo bitsa lebitso la modimo wa lona; feela, le se ke la hotetsa mollo.
26Ba nka poho eo ba e neilweng, ba e lokisa, ba bitsa lebitso la Baale ho qala hosasa, ho fihlela motshehare, ba ntse ba re: Oho, Baale, re utlwe! Empa ha ho a ka ha eba lentswe, leha e le karabo. Ba nna ba tlola, ba pota aletare e entsweng.
27Motshehare o moholo, Elia a ba soma, a re: Howeletsang haholo; hobane ke modimo; ekaba o imametse, kapa o ile nqa e nngwe, kapa o etile, kapa o robetse, o tshwanetse ho tsoswa.
28Ba howeletsaka, mme ka mokgwa wa bona, ba itlhabaka ka dithipa le ka marumo, madi a ba a keleketla ho bona.
29Motshehare wa mantsiboya, ba be ba ntse ba porofeta; ha e batla ho ba nako ya ho hlahisa sehlabelo, ho no ho eso ho be lentswe, ho se karabo, ho se ya ba mamelang.
30Yaba Elia o re ho setjhaba sohle: Nkatameleng! Setjhaba sohle sa mo atamela. A tsosa aletare ya Jehova e heleditsweng.
31Elia a nka majwe a leshome le metso e mmedi, ka palo ya meloko ya bara ba Jakobo, eo lentswe la Jehova le neng le tlile ho yena, la re: Lebitso la hao e tla ba Iseraele.
32Ka majwe ana, a haha aletare ka lebitso la Jehova, a tjheka moedi o potang aletare, o lekanang sebaka se ka jalwang ka peo e ditekanyo tse pedi.
33A tshekahanya patsi, a pomahanya poho, a e bea hodima patsi, a re: Tlatsang dinkgo tse nne ka metsi, le tshele sehlabelo le patsi ka wona.
34A ba a re: Phetang la bobedi. Ba boela ba etsa. A re: Phetang la boraro. Ba etsa la boraro.
35Mme metsi a pota aletare, le moedi wa tlala metsi.
36Nakong ya ho hlahisa sehlabelo, moporofeta Elia a atamela, a re: Oho, Jehova, Modimo wa Abrahama le Isaaka le Iseraele, a ho ke ho tsejwe kajeno hore ke wena Modimo wa Iseraele, le hore nna ke mohlanka wa hao, le hore ke entse ntho tseo kaofela ka taelo ya hao.
37Nkutlwe, Jehova, o nkutlwe, hore setjhaba sena se tle se tsebe hobane ke wena, Jehova, o leng Modimo, le hobane o boetse o kgutlisitse dipelo tsa bona.
38Yaba mollo wa Jehova wa theohela, o nyameletsa sehlabelo, le patsi, le majwe, le lerole, wa monya le metsi a ka moeding.
39Setjhaba sohle, ha se bona hoo, sa inama ka difahleho, sa re: Jehova ke Modimo! Jehova ke Modimo!
40Ebile Elia o re ho bona: Tshwarang baporofeta ba Baale, ho se ke ha tlola le a mong. Ba ba tshwara, mme Elia a ba theosetsa molatswaneng wa Kishone, a ba bolaela teng.
41Yaba Elia o re ho Akabe: Nyoloha, o je, o nwe, hobane ho utlwahala modumo wa pula e kgolo.
42Akabe a nyoloha ho ja le ho nwa, Elia yena a hlwella hodima Karmele; a inama fatshe, a bea sefahleho sa hae pakeng tsa mangole a hae.
43A re ho mohlanka wa hae: Ako nyolohe, o tadime ka nqa lewatleng. A nyoloha, a tadima, a re: Ha ho letho. Elia a re: Boella hasupa.
44La bosupa, a re: Ke bona lerunyana le ka ka seatla sa motho, le nyoloha lewatleng. Elia a re: Nyoloha, o re ho Akabe: Bofa, o theohe, esere mohlomong wa thibellwa ke pula.
45Ho se hokae, mahodimo a ntshofala ke maru le ke moya, ha na pula e kgolo.
46Akabe a kena koloing, a ya Jisreele. Letsoho la Jehova la eba hodima Elia: a itlama letheka, a titima pela Akabe ho ya fihla kgorong ya Jisreele.
Who We AreWhat We EelieveWhat We Do
2025 by iamachristian.org,Inc All rights reserved.
