DIPESALEME 82 - Sesotho 1909/1961 (SO)（SSO61-SO）

Modimo o tla ahlola baahlodi ba ditjhaba.Pesaleme ya Asafe.

1Modimo o kene phuthehong ya medimo, o ahlola mahareng a medimo.

2Le tla ahlola ka bokgopo ho isa kae, le emele ba bolotsana ho isa kae? (Sela.)

3Ahlolelang ba banyenyane le dikgutsana; le lokisetse mohlomohi le ya lesitsi;

4lokollang ba madimabe le bahloki, le ba utle matsohong a ba bolotsana.

5Ha ba na hlalefo, leha e le kutlwisiso; ba tsamaya lefifing; metheo kaofela ya lefatshe e a kgwehla.

6Ke itse: Le medimo, mme bohle le bara ba Mookamedi ya phahameng.

7Leha ho le jwalo, le tla shwa jwaloka batho, le we jwaloka marena afe le afe.

8Oho Modimo, tsoha, o ahlole lefatshe, hobane ditjhaba kaofela e tla ba lefa la hao.