1Eitse hobane lemo seo se fete, ka nako eo marena a atisang ho futuha ka yona, Joabe a tsamaisa makgotla a ntwa, mme a senya lefatshe la bana ba Ammone, a ntoo ya thibella Rabba; Davida yena a sala Jerusalema. Joabe a hlola Rabba, a o heletsa.
2Davida a rola morena wa teng moqhaka wa hae, a o fihlela o le boima ba talenta e le nngwe ya kgauta, o bile o na le mahakwe a bohlokwa le hona, mme wa rweswa Davida hloohong. Hape, a ya le kgapo e kgolo haholo ya motse.
3Haele batho ba fihletsweng teng, a ba ntshetsa ntle, mme a ba harola ka disaga le ka diege tsa tshepe le ka dilepe. Davida a etsa jwalo ka metse yohle ya bana ba Ammone; Davida le setjhaba sohle ba ntoo boela Jerusalema.
Davida o hlola Bafilesta.4Kamora tseo, ntwa ya lwana le Bafilesta Gesere; teng Sibekkai Mohusha a bolaya Sippai, e mong wa bana ba Barefaime; mme teng ba kokobetswa.
5Ya boela ya lwana le Bafilesta. Yaba Elkanane, mora Jaire, o bolaya Lahmi, ngwanabo Goliathe wa Gathe, ya neng a na le lerumo leo theko ya lona e neng e le ka ka sefate sa selohi.
6Hapehape, ntwa ya lwana Gathe. Teng, ho ne ho na le monna e molelele, eo letsoho la hae le leng le le leng le leoto le leng le le leng le neng le na le menwana e tsheletseng, e etsa mashome a mabedi a metso e mene; le yena e ne e le wa mofuta wa Barefaime.
7Eitse ha a ntse a phephetsa Iseraele, Jonathane, mora Shimea ngwanabo Davida, a mmolaya.
8Bao e ne e le ba mofuta wa Barefaime ba Gathe; ba eshwa ka matsoho a Davida le a bahlanka ba hae.
Who We AreWhat We EelieveWhat We Do
2025 by iamachristian.org,Inc All rights reserved.
