JOBO 18 - Sesotho 1909/1961 (SO)（SSO61-SO）

Phetolo ya bobedi ya Bildade.

1Yaba Bildade wa Shua o fetola, a re:

2Le tla qeta dipolelo tseo neneng? Mamelang, re ntoo bua.

3Re etswa keng diphoofolo? Re mawatla keng mahlong a lona na?

4Wena ya ikgarolang ka bohale ba hao, na lefatshe le tla fetoha lefeella ka baka la hao, mafika a suthiswe tulong tsa wona na?

5Bona, lesedi la e mobe le tla tingwa, mollo wa leifo la hae ha o sa tla hlola o hotetswa.

6Lesedi le tla fetoha lefifi tenteng ya hae, lebone la hae le hodima hae le tla tingwa.

7Mehato ya hae e tiileng e tla honyetseha, o tla dihelwa ke mano a lohilweng ke yena;

8hobane o hata letlowa ka maoto a hae, o tsamaya hodima mamena;

9sefi se mo tshwasitse serethe; letlowa le mo tlamile;

10sefi se patilwe mobung pela hae, leraba le mo lebeletse tseleng.

11Matsoso a mo tshabisa ka nqa tsohle, a mo tshosa a mo phalletse.

12Tlala e mo fedisa matla, tshenyeho e mo tshwere lehlakoreng.

13E ja letlalo la mmele wa hae; letsibolo la lefu le ja ditho tsa hae.

14O tshwarwa setshabelong sa tente ya hae, o hulelwa ho morena wa matshabeho.

15Ha ho le a mong wa bahabo ya dulang tenteng ya hae; sebabole se tsholla jwaloka pula hodima moaho wa hae.

16Tlase, metso ya hae e a oma; hodimo, makala a hae a rengwa.

17Ha a sa hopolwa lefatsheng, lebitso la hae ha le sa bolelwa mapatlelong.

18O lelekwa leseding, a ye lefifing; o tloswa lefatsheng.

19Ha a siye mora leha e le setloholo hara setjhaba sa hae, meahong ya hae ho hlokahala mosiuwa ya tswang ho yena.

20Meloko e tlang e tla tsota tshenyeho ya hae, mme meloko wa jwale o tla tshwarwa ke ho thothomela.

21Meaho ya molotsana e jwalo feela, ho jwalo le bodulo ba ya sa tsebeng Modimo.