II MARENA 4 - Sesotho 1909/1961 (SO)（SSO61-SO）

Mehlolo ya Elisha. — Ole ya mosadi wa mohlolohadi. — Mora mosadi wa Shuneme. — Lefu le ka pitseng. — Mahobe a harese. — Molepera Naamane. — Gehasi o otlwa ka lepera. — Selepe sa mohlankana wa moporofeta. — Basiria ba otlwa ka bofufu. — Thibello ya motse wa Samaria le tlala ya teng. — Twelo ya Samaria. — Tlala ya lemo tse supileng. — Ho kgutlwa ha mosadi wa Shuneme. — Hasaele o iketsa morena wa Siria.

1Yaba mosadi e mong, wa basadi ba bara ba baporofeta, o lla ho Elisha, a re: Mohlanka wa hao, monna wa ka, o timetse; o a tseba hobane mohlanka wa hao o ne a tshaba Jehova; jwale monna eo re leng molato ho yena o tlile ho nka bara ba ka ba babedi, hore a ba etse bafo.

2Elisha a re ho yena: Ke tla o etsetsang na? Ntsebise, o na le eng ka tlung na? A re: Lekgabunyane la hao ha le na letho ka tlung haese pitsa ya ole.

3A re: Eya, o adime dipitsa ho bao o ahisaneng le bona, e be dipitsa tse feela, o adime, e seng di se kae.

4O tla kena ha hao, o ikwalle ka lemati hammoho le bara ba hao, o qhatsetse dipitseng tsena tsohle, o bee tse tletseng kathoko.

5Yaba o tloha ho yena, a ikwalla ka lemati le bara ba hae; ba mo tlisetsa dipitsa, mme yena a qhatsetsa ho tsona.

6Hobane dipitsa di tlale, a re ho mora hae: Ntlisetse pitsa e nngwe hape; empa a re ho yena: Ha ho sa le pitsa. Yaba ole e a kgaotsa.

7Yaba o a tla, a tsebisa monna wa Modimo; yena a re: Reka tjhelete ka ole, o lefe molato wa hao, mme o phele le bara ba hao ka ho tla sala.

8Mohlomong, Elisha a ya le Shuneme; ha bo ho le mosadi wa mofumahadi teng, a mo phehella ho ja bohobe. Enere ha a ntse a feta le teng, o ne a fapohela ha hae ho ja bohobe.

9A re ho monna wa hae: Bona, ke a tseba hobane enwa ya fapohelang ha rona kamehla ke monna ya halalelang wa Modimo.

10A re mo etsetse kamore e nyenyane hodima lerako, re mmeele malao teng le tafole le setulo le lebone; mme enore ha a etla ha rona, o tla fapohela teng,

11Mohlomong, a tla le teng, a fapohela kamoreng, a robala teng.

12A re ho Gehasi, mohlanka wa hae: Bitsa mosadi eo wa Shuneme. A mmitsa; a tla, a ema pela hae.

13Elisha a re ho Gehasi: Mmolelle hle, o re: Bona, o re babaletse ka paballo e kgolo; o ka etsetswang? Kapa o rata ho rapellwa pela morena, leha e le pela molaodi wa makgotla na? Yena a re: Tjhe, ke dutse setjhabeng sa heso.

14Elisha a re: A ka etsetswang? Gehasi a re: Empa seo a se hlokang ke mora, hape monna wa hae o se a tsofetse.

15A re: Ako mmitse. A mmitsa, a tla, a ema monyako.

16Yaba o re ho yena: Isao, ha ho le jwale, o tla aka mora. A re: Oho, monna wa Modimo, monga ka, o se ke wa thetsa lekgabunyane la hao.

17Mosadi eo a emola, a tswala moshanyana, ka nako eo Elisha a mmoleletseng yona. Mme ngwana a hola.

18Eitse ka mohlomong, a tswela ho ntatae, ho bakotudi.

19Teng a re ho ntatae: Jo! hlooho ya ka! hlooho ya ka! Yena a re ho mohlankana e mong: Mo ise ho mmae.

20Yaba o mo pepa, a mo isa ho mmae; mmae a mo fara mangoleng a hae, ya ba ya eba motshehare; yaba o a shwa.

21Ebile mmae o nyoloha, a mo robatsa malaong a monna wa Modimo, a mo kwalla ka lemati, a tswa.

22A ntoo bitsa monna wa hae, a re: Nthomele e mong wa bahlankana le esele e nngwe, ke tle ke phallele ho monna wa Modimo, ke ntoo boya.

23Yena a re: O latang ho yena kajeno? Hase kgwedi e ntjha, leha e le Sabatha. A re: Ke kgotso.

24Jwale a qhaneha esele, a re ho mohlankana wa hae: E hule, o tsamaye; o se ke wa ntiehisa ha ke kaletse, haese ha ke o bolella.

25A tloha jwalo, a fihlela monna wa Modimo thabeng ya Karmele.

26Monna wa Modimo, ha a mmona a sa le hole, a re ho Gehasi, mohlanka wa hae: Bona, mosadi wa Shuneme ke yane. Titima, o mo kgahlanyetse, o re ho yena: Hleka o sa dutse hantle, le monna wa hao o sa dutse hantle, le ngwana o sa dutse hantle na? A re: Re dutse hantle.

27Yare ha a fihla ho monna wa Modimo, thabeng, a mo tshwara ka maoto. Gehasi a mpa a mo atamela ho mo suthisa; empa monna wa Modimo a re: Mo tlohele, hobane pelo ya hae e bohloko, mme Jehova o mpatetse, ha a ka a ntsebisa.

28Yaba mosadi o re: Hleka ke ne ke kopile mora ho monga ka na? Ana ha ke a ka ka re, o se ke wa nthetsa na?

29Yaba Elisha o re ho Gehasi: Itlame letheka, o nke lere la ka ka letsoho la hao, o tsamaye; etlere ha o kgahlana le motho, o se ke wa mo dumedisa; ha motho a o dumedisa, o se ke wa mo araba; o bee lere la ka hodima sefahleho sa ngwana.

30Mma ngwana a re: Ka Jehova ya utlwang le ka moya wa hao o utlwang, nke ke ka o siya. Yaba o ema, a mo sala morao.

31Haele Gehasi, a ya pele ho bona, a bea lere hodima sefahleho sa ngwana; empa ha ho a ka ha eba lentswe, leha e le kutlo. A ba a kgutla, a kgahlanyetsa Elisha, a mo tsebisa, a re: Ngwana ha a tsoha.

32Elisha a kena ka tlung, a bona ngwana a shwele, a robaditswe malaong a hae.

33A kena, a ikwalla le yena ba babedi ka lemati, a rapela Jehova.

34A ntoo nyoloha, a paqama hodima ngwana, a bea molomo wa hae molomong wa hae, le mahlo a hae mahlong a hae, le diatla tsa hae diatleng tsa hae, a ikotlolla hodima hae, mme nama ya ngwana ya futhumala.

35A nna a tloha, a itsamaela ka tlung, a boela a nyoloha, a ikotlolla hodima hae; jwale ngwana a ethimola hasupa, mme ngwana a tutubolla mahlo a hae.

36Elisha a bitsa Gehasi, a re: Bitsa mosadi eo wa Shuneme. A mmitsa, mme ha a kena ho yena, Elisha a re: Nka mora wa hao.

37A kena a itihela maotong a hae, a inama fatshe; a ba a nka mora hae, a tswa.

38Yaba Elisha o boela Gilgale; tlala e ne e wele naheng, mme bara ba baporofeta ba tla, ba dula pela hae. A re ho mohlankana wa hae: Hlatleha ka pitsa eo e kgolo, o apehele bara ba baporofeta moroho.

39E mong a tswela naheng ho kga moroho; a fumana maraka a naheng, a kga ditholwana tsa wona, a di phutha, a tla, a di petsolela pitseng ya meroho, ba mpa ba sa di tsebe.

40Jwale, ba tsholela banna, ba re, ba je; yare ha ba eja meroho, ba howeletsa, ba re: Oho, monna wa Modimo, lefu le ka pitseng. Ba sitwa ho ja.

41Yena a re: Tlisang phofo; mme a e faha pitseng, a ntoo re: Tsholelang batho bana, ba tle ba je. Mme ho bo ho se letho le lebe ka pitseng.

42Yaba ho tla monna wa Baale-Shalisha, a tlisetsa monna wa Modimo bohobe ba dithakangwaha, e le mahobe a mashome a mabedi a harese, le diqwapi tse tala mokotleng wa hae. Elisha a re: Beela batho bana, ba tle ba je.

43Empa mohlanka wa hae a re: Nka di beela batho ba lekgolo jwang? Yena a re: Bea pela batho bana, ba tle ba je, hobane ho itswe ke Jehova: Ba tla ja, ba be ba siye.

44A bea pela bona, mme ba eja, ba ba ba siya, ka polelo ya Jehova.