Apokalupo 20 - Cook Island Maori Revised New Testament(CIMRNT)

Te au mata'iti 'okota'i tauatini

1Kua kite atura au i tēta'i 'āngela i te 'eke'anga mai mei te rangi maira, tei tōna rima te tāviri o te va'arua takerekore ē tēta'i vivi ma'ata.

2Gen 3.1Kua 'opu atura aia i te tā'ae ma'ata, te 'ōvī ta'ito, ko ia ko te Tiāporo ē Sātani. Kua tāpeka atura i aia nō te au mata'iti 'okota'i tauatini.

3Kua titiri atura i aia ki roto i te va'arua takerekore, tōpiri i te reira ē 'akatāpa'o atura, kia kore taua tā'ae ra e arataki kē 'aka'ou i te au 'iti tangata kia 'ope rava atu aua au mata'iti 'okota'i tauatini ra. I muri ake i te reira kia tuku'ia mai aia nō tēta'i mānga tuātau e tikāi.

4 Dan 7.9,22 Kua kite atura au i ēta'i au terōno ē te aronga i no'o i runga a'o, kua 'ōronga'ia te mana 'akavā kia rātou. Kua kite katoa au i te au vaerua o te aronga i tīpū'ia tō rātou mīmiti nō tō rātou 'akakite'anga i a Iēsū ē te tuatua a te Atua. Kāre 'oki rātou i 'akamori i te tā'ae mē kāre i tōna tiki, ē kāre rāi i 'āriki ana i tōna 'akairo ki runga a'o i tō rātou rae ē tō rātou rima. Kua ora 'aka'ou rātou ē kua tūtara rātou ē te Mesia 'okota'i tauatini mata'iti.

5Ko te katoanga rā o te aronga i mate ra, kāre rātou i ora 'aka'ou kia 'ope rava atu aua au mata'iti 'okota'i tauatini ra. Ko te tū'aka'ou'anga mōmua tēia.

6Ko rātou tei tū mai i tēia tū'aka'ou'anga mua, e ao tō rātou ē te tū tapu. Kāre 'oki te rua o te mate 'e mana i runga a'o i a rātou, ka riro rā rātou 'ei au ta'unga nā te Atua ē nā te Mesia, ē ka tūtara rātou ē te Mesia 'okota'i tauatini mata'iti.

Te 'akavī'anga'ia te Tiāporo

7Kia 'ope aua mata'iti 'okota'i tauatini ra, ka tuku'ia a Sātani mei roto mai i taua ngā'i tāpeka'anga ra,

8a: Ezek 7.2; b: Ezek 38.2,9,15ē ka 'aere atu aia i te arataki kē i a Goga ē i a Māgoga, koia 'oki, te au 'iti tangata o ngā rua matangi e 'ā o te ao nei i te 'akaputuputu i a rātou nō te tamaki. Mei te one ta'atai rātou i te ma'ata kia tatau'ia.

9Kua 'aere atura rātou nā te pararauare katoa o te ao nei ē kua takapini i te ngā'i pū'ākapa'anga o te aronga tapu ē te 'ōire 'akaperepere'ia. Inārā, kua topa maira te a'i mei te rangi mai ē kua pou rava atura rātou.

10Ko te Tiāporo tei arataki kē i a rātou, kua titiri'ia ki roto i te roto o te a'i ē te teio, te ngā'i 'oki tei reira katoa te puaka tā'ae ē te peroveta pikika'a. E 'akamamae'ia rātou i te pō ē te ao e tuātau 'ua atu.

Te 'akavā'anga mei runga mai i te terōno ma'ata teatea

11 Dan 7.9,10 Kua kite atura au i tēta'i terōno ma'ata teatea ē tei no'o i runga a'o ra. Kua 'oro kē te 'enua nei ē te rangi mei tōna mata, ē kāre rāua i kitea 'aka'ou'ia.

12Kite atura au i tei mate ra, ko te tangata mama'ata ē te tangata rikiriki, i te tū'anga i mua i te terōno, ē kua ma'eu'ia i'ora te au puka. Kua 'e'eu'ia i'ora tēta'i puka kē, ko te puka ia o te ora. Kua 'akavā'ia i'ora taua aronga i mate ra mei roto mai i te au mea i tātā'ia ki roto i taua au puka ra, mei tei tau ki tā rātou au 'anga'anga.

13Kua tuku maira te tai i te au tangata mate i roto i aia, ē kua tuku maira te mate ē 'Ade i te au tangata mate i roto i a rāua ra, ē kua 'akavā'ia te tangata tātakita'i mei tei tau ki tāna au 'anga'anga.

14Kua titiri'ia i'ora te mate ē 'Ade ki roto i te roto a'i. Ko tēia te rua o te mate, koia 'oki, te roto a'i.

15Mē kāre 'e tangata e kitea i te tātā'anga'ia ki roto i te puka o te ora, kua titiri'ia atura aia ki roto i te roto a'i.