Rōma 4 - Cook Island Maori Revised New Testament(CIMRNT)

Ko Āberahāma te 'ākara'anga

1'E a'a tā mātou tuatua nō runga i a Āberahāma, tō mātou tupuna i te pae kōpapa ra? 'E a'a tāna i kite?

2Nāringa ē i 'akatikatika'ia a Āberahāma nō tāna 'ua'orāi au 'anga'anga anake ra, 'e tumu rāi tōna i reira kia ngākau parau aia, kāre rā i pērā i mua i te Atua.

3Gen 15.6; Gal 3.6Tē 'akapē'ea mai rā 'oki te tuatua i tātā'ia ra? “Kua 'irinaki a Āberahāma i te Atua, ē nō reira kua 'āriki te Atua i aia 'ei tangata tuatua tika.”

4Kāre te tūtaki i te tangata rave 'anga'anga e karanga'ia ē 'e mea aro'a 'ua, 'e mea 'oko rā.

5Ko te tangata rā kāre e rave i te 'anga'anga, tē 'irinaki ra i aia tei 'akatikatika mai i te tangata 'ākonokore Atua, ka 'āriki'ia mai aia 'ei tangata tuatua tika nō tōna 'irinaki'anga.

6Kua 'akakite katoa mai a Dāvida i te reira i te 'akameitaki'anga o te tangata tā te Atua i 'āriki mai 'ei tangata tuatua tika, noa atu ē kāre 'e 'anga'anga ra:

7 Sal 32.1,2 “'E ao tō rātou tō tei 'akakore'ia tā rātou au 'anga'anga kino,

ē tō tei tāpoki'ia tā rātou au 'ara.

8'E ao tō te tangata tei kore tāna 'ara i 'akama'ara'ia mai e te 'Atu.”

9Nō te aronga peritome'ia anake 'ua āina tēia 'akameitaki'anga, mē nō te aronga peritomekore'ia katoa āina? Tē karanga nei mātou ē, kua 'āriki'ia a Āberahāma 'ei tangata tuatua tika nō tōna 'irinaki'anga.

10I 'akapē'ea tēia i tupu ei? I tōna tū peritome'ia āina, mē i tōna tū peritomekore'ia āina? Kāre i tōna peritome'anga'ia, i mua ake rā i tōna peritome'anga'ia.

11Gen 17.10Kua 'āriki 'oki aia i te 'akairo o te peritome 'ei 'akapāpū'anga ē, kua 'akariro'ia aia 'ei tangata tuatua tika nō tōna 'irinaki'anga i mua ake i tōna peritome'anga'ia. I 'akapērā i riro mai ei aia 'ei metua nō te aronga 'irinaki kātoatoa, ē i 'akariro katoa'ia ai rātou 'ei aronga tuatua tika, noa atu ē kāre rātou i peritome'ia.

12Kua riro katoa a Āberahāma 'ei metua nō te aronga peritome'ia, kāre anake 'ua rā ē nō te peritome'anga, nō te mea katoa rā ē, kua āru rātou i te rua tapuae o te 'irinaki'anga o tō mātou tupuna ra ko Āberahāma i mua ake i tōna peritome'anga'ia.

Nō te 'irinaki'anga i tupu ei tei papa'u'ia maira

13 Gen 17.4-6; 22.17,18; Gal 3.29 Ko te Atua 'oki tei papa'u mai ki a Āberahāma ē tōna 'uānga ē, ka riro aia 'ei 'atu nō te ao nei. I pērā aia, kāre ē nō tō Āberahāma 'ākono'anga i te Ture, nō tōna 'āriki'anga'ia rā 'ei tangata tuatua tika nō tōna 'irinaki'anga.

14Gal 3.18Nāringa 'oki rātou i riro 'ei 'atu nō te ao nei, nō te mea kua 'ākono rātou i te Ture, kāre 'e 'āite'anga i reira o te 'irinaki'anga, ē kua riro te papa'u'anga 'ei mea pu'apingakore.

15Ko te Ture 'oki te tumu o te riri o te Atua; mē kāre rā 'e ture, kāre katoa ia 'e 'a'ati'anga i te ture.

16 Gal 3.7 I tēianei, nō te mea kua papa'u mai te Atua ki a Āberahāma nō tōna 'irinaki'anga, kua riro i reira tei papa'u'ia maira 'ei mea aro'a 'ua, tei 'akapāpū'ia nō te 'uānga kātoatoa; 'eia'a ē nō rātou anake 'ua tei 'ākono i te Ture ra, nō rātou katoa rā tei 'irinaki mei a Āberahāma ra, ko te metua 'oki nō tātou kātoatoa;

17Gen 17.5mei tei tātā'ia ra ē, “Kua 'akariro au i a koe 'ei metua nō te au 'iti tangata 'e mānganui.” Kua 'irinaki 'oki a Āberahāma i te Atua tei 'ōronga mai i te ora ki tei mate ra, ē tei karanga i te au mea kāre i vai ake, mei te mea ra ē, tē vai 'ua nei.

18Gen 15.5Ko Āberahāma 'oki tei 'irinaki ē, ka riro aia 'ei metua nō te au 'iti tangata 'e mānganui mei tei 'akakite'ia mai ē, “'e mānganui tō'ou na 'uānga mei te au 'ētū rāi.” Kua tatari aia, noa atu ē kāre 'e tumu toe nō te tatari'anga.

19Gen 17.17Kua kite 'oki aia ē, tē parukā 'ua nei tōna 'ua'orāi kōpapa; kua vaitata 'oki ōna mata'iti ki te ta'i 'ānere. Ē kua kite katoa aia ē, kua pā te kōpū o Sara. Kāre rā tōna 'irinaki'anga i paruparu.

20Kāre tēta'i 'ua atu 'irinakikore i tei papa'u'ia mai e te Atua i 'akatūrori mai i aia, kua 'akamāro'iro'i'ia rā aia e tōna 'irinaki'anga ma te 'akakakā i te Atua.

21Kua pāpū tikāi 'oki i aia ē, ka tika rāi i te Atua kia 'akatupu i tei papa'u'ia maira.

22Nō reira 'oki “i 'āriki'ia ai aia 'ei tangata tuatua tika.”

23Kāre rā nōna anake 'ua i tātā'ia ai ē, “kua 'āriki'ia aia 'ei tangata tuatua tika,”

24nō tātou katoa rā te ka 'āriki'ia mai, nō te mea, tē 'irinaki nei tātou i aia ko tei 'akatū i tō tātou 'Atu ra i a Iēsū mei te mate maira,

25Isa 53.4,5tei tukuna'ia mai kia mate aia nō tā tātou au 'ara, ē kua 'akatū'ia kia 'akatikatika'ia mai tātou nei.