1Kua kite au i tēta'i 'āngela mana ririnui kē i te 'eke'anga mai mei runga mai i te rangi, i kāka'u'ia i te tiao rangi; tei runga a'o i tōna ūpoko te ānuanua. Tōna mata mei te rā rāi te tū ē tōna vaevae mei te pou a'i ra.
2Tei tōna rima tēta'i pōkaikai meangiti tei ma'eu 'ua ra. Kua tuku aia i tōna vaevae katau ki runga a'o i te tai, e tōna vaevae kaui ki runga a'o i te 'enua.
3Kua kāpiki aia ma te reo ma'ata mei te liona e ngunguru ra. Ē kia kāpiki aia ra, kua pa'u mai ngā māngūngū e 'itu.
4Kua 'akakoro au i te tātā i te tuatua'anga a taua ngā māngūngū e 'itu. Kua 'akarongo rā au i tēta'i reo nō te rangi mai, nā kō maira, “Mou muna i tā te au māngūngū i 'akakite mai, auraka e tātā.”
5 Exo 20.11; Deut 32.40; Dan 12.7; Amo 3.7 Ē te 'āngela tāku i kite i te tū'anga i runga a'o i te tai ē te 'enua, kua tāki i tōna rima katau ki te rangi,
6ē kua taputo'u ki tei ora e tuātatau rava atu, koia 'oki tei 'anga i te rangi ē te au mea katoa i roto, i te 'enua ē te au mea katoa i roto, ē i te tai ē te au mea katoa i roto, i te nā kō'anga ē, “Kāre 'oki 'e taime toe!
7I te au rā rā o te reo o te 'itu o ngā 'āngela, mē 'akatangi aia i tāna pū, ka tupu te tuatua ngaro o te Atua, mei tāna i 'akakite mai ki tōna au tāvini, te au peroveta.”
8 Ezek 2.8—3.3 E te reo tāku i 'akarongo ana mei te rangi maira, kua tuatua 'aka'ou mai ki āku, nā kō maira, “E 'aere, e rave i te pōkaikai e ma'eu 'ua ra i roto i te rima o te 'āngela tei tū ki runga a'o i te tai ē te 'enua.”
9Kua 'aere atura au ki te 'āngela, ē kua 'akakite au ki aia kia 'ō mai i te pōkaikai meangiti ki āku. Ē kua tuatua mai aia ki āku, “E rave koe ē e kai i tēia, ka 'akamaramara te reira i tō'ou kōpū, i roto rā i tō'ou va'a 'e venevene ia mei te meri.”
10Kua rave i'ora au i te pōkaikai meangiti mei roto mai i te rima o te 'āngela ē kua kai au, ē i roto i tōku va'a 'e venevene ia mei te meri rāi. Ē kia oti rā i āku i te kai, kua maramara tikāi tōku kōpū.
11Ē kua tuatua maira aia ki āku, “Kia toto'u 'aka'ou koe ki te au 'iti tangata, te au pā 'enua, te au reo ē te au bāsileia 'e mānganui e tikāi.”
Who We AreWhat We EelieveWhat We Do
2025 by iamachristian.org,Inc All rights reserved.
