2 Timōteo 2 - Cook Island Maori Revised New Testament(CIMRNT)

Te toa tikāi o Iēsū Mesia

1Ko koe rā, e taku tamaiti, kia māro'iro'i koe nā roto i te aro'a 'ua tei tae mai nō kō i te Mesia ra i a Iēsū.

2Ē te au mea tā'au i 'akarongo mei konei atu i āku nei i mua i te kātoatoa, e tuku atu i te reira ki te au tangata 'irinaki'ia tei tūkatau i te 'āpi'i atu i a ēta'i kē ra.

3E 'āriki katoa i te au mate mei te toa tikāi o te Mesia ra i a Iēsū.

4Ko tēta'i tangata tei tomo ki roto i te pupu va'e'au ra, kāre ia e tā'ī'ī i aia 'ua'orāi i te 'anga'anga o te ora'anga tangata nei mē ka 'inangaro aia kia mareka tōna pū i aia.

5Ē, ko tēta'i 'ua atu tangata e tā'emo'emo ra, kāre ia e 'akakorōna'ia, kia kore aia e tā'emo'emo ma te 'ākono i te au ture.

6Ko te tangata tanu kai tei 'anga'anga pakari, ka kai aia i te 'ua mua.

7E manako putuputu koe i tāku e tuatua nei. Ē nā te 'Atu 'oki e 'akapāpū mai ē, kia mārama koe i te au mea rava rāi.

8E 'akama'ara i a Iēsū Mesia, nō te 'uānga ia o Dāvida, kua 'akatū'ia mei te mate maira, mei tāku i 'akakite nā roto i te 'ēvangelia tāku i tūtū 'aere ana.

9Nō te reira 'oki i roko'ia mai ei au e te mate mei tēta'i tangata rave kino e tae rava mai te piri'anganaoa. Ko te tuatua rā a te Atua, kāre ia i tāpeka'ia.

10Nō reira, tē 'akakoromaki nei au i te au mea katoa nō te aronga 'iki'ia kia rauka katoa i a rātou te rāvenga ora ma tōna kakā mutukore, tei nā roto ia i te Mesia ra i a Iēsū.

11Ka rauka i te 'irinaki i tēia mānga tuatua:

“Mē kua mate tātou ma ia katoa,

ka ora rāi tātou ma ia katoa;

12 Māt 10.33; Luk 12.9 mē tē 'akakoromaki nei tātou,

ka 'aka'aere rāi tātou ma ia katoa;

mē ka 'u'una tātou i aia,

ka 'u'una katoa aia i a tātou;

13mē 'ākonokore tātou,

ko ia rā tē tāmou nei rāi i te 'ākono;

nō te mea, kāre e rauka i aia i te 'u'una i tōna 'ua'orāi tū.”

Te rave 'anga'anga e tau i te Atua

14E 'akama'ara koe i te tangata i tēia au mea ma te 'akamatakite atu i a rātou ki mua i te aroaro o te Atua ē, auraka rātou e taumārō nō runga i te au tuatua 'ua. Kāre 'oki ōna pu'apinga, māri rā i te tātipakē i te aronga tei 'akarongo i te reira.

15E umuumu pakari i te 'akariro i a koe ki mua i te Atua 'ei tangata tau meitaki, tei rave i te 'anga'anga ma te 'akamākore ē tei 'āpi'i ma te tika tikāi i te karere o te tuatua mou.

16E 'āriu kē mai i a koe mei te tuatua 'akanoa ē te pu'apingakore. Ka 'akama'ata 'oki te reira ē ka 'akama'ata 'ua atu i te tū 'ākonokore Atua.

17Ka toto'a tā rātou karere mei te maki kakai ra. Ko Humenaio rāua ko Phileto ēta'i o rātou.

18Kua 'akaruke 'oki rāua i te mataara o te tuatua mou ra nā roto i te 'akakite'anga ē, kua tae mai ana te tū'aka'ou'anga. Ē kua 'akatātīpoki rāua i te 'akarongo o tēta'i pāpāki ra.

19Num 16.5Kāreka rā, tē vai keukeukore nei rāi te tango i tuku'ia e te Atua ra, ē ko tēia te 'akairo ki runga a'o: “Kua kite te 'Atu i tōna 'ua'orāi au tangata,” ē pērā katoa, “Ko te tangata rava rāi e tā'iku i te ingoa o te 'Atu ra, e 'akaruke anake rātou i te tuatua tikakore.”

20I roto i tēta'i 'are ma'ata tē vai nei te au 'āriki 'auro ē te 'ārio, ē tē vai katoa nei te au mea rākau ē te karakaraea. Ko tēta'i pāpāki i 'akapu'apinga 'ua'ia nō te 'akakoro'anga mā ē te meitaki, ko tēta'i pāpāki rā i 'akapu'apinga'ia nō te 'akakoro'anga taukore ē te noa.

21Mē 'āriu kē mai tēta'i tangata i aia 'ua'orāi mei taua 'āpi'i'anga tārevakē ra, ka riro ia 'ei 'āriki meitaki ē te 'akatapu'ia; 'e mea pu'apinga tikāi nō tōna pū, nō te mea, tē vai te'ate'amamao nei ia nō te au 'anga'anga meitaki rava rāi.

22E kōpae koe i te au peu o te tū tangata 'ōu ra, e aruaru rā i te tuatua tika, te 'akarongo, te aro'a ē te 'au, ko koe ē te aronga katoa tei kāpiki atu ki te 'Atu ma te ngākau mā.

23Auraka e piri atu ki te au taumārō'anga nēneva ē te pu'apingakore. Kua kite 'oki koe ē, ka tupu mai te pekapeka nā roto mai i te reira.

24Kāre 'oki e tau i te tāvini o te 'Atu kia riro aia 'ei tumu nō te pekapeka, kia marū rā aia ki te au tangata kātoatoa, kia tūkatau i te 'āpi'i atu ē kia 'akakoromaki.

25Kia 'akatikatika aia ma te ngākau 'aka'aka i te aronga e pāto'i nei i tāna karere. Pēnei ake ka 'ōronga mai te Atua ki a rātou i te 'akatūkē'anga o te ngākau kia nakiro rātou i te tuatua mou.

26Ka 'oro kē rātou i reira i tā te Tiāporo 'ere'ere tei mou ana i a rātou kia rave 'ua i tōna 'inangaro.