1 Kōrīnētia 6 - Cook Island Maori Revised New Testament(CIMRNT)

Te 'oro'anga a te au taeake ki te 'akavā'anga

1Mē 'e tāpepe'anga tā tēta'i i ō kōtou na i tēta'i, kāre āina aia e mataku i te kave i te reira ki te 'akavā'anga ki mua i te aronga 'akarongokore, ē kāre ki mua i te aronga tapu ra?

2Kāre āina kōtou i nakiro ē, nā te aronga tapu ka 'akavā i tēianei ao? Mē riro mai 'oki tēianei ao ē nā kōtou e 'akavā, kāre āinei e rauka i a kōtou kia 'akavā i te au manamanatā meariki po'epo'e ra?

3Kāre āina kōtou i nakiro ē, nā tātou e 'akavā i te au 'āngela? Ka tanga atu ei kia 'akavā katoa tātou i te au mea kātoatoa i roto i tēianei ora'anga!

4Mē tei roto i ō kōtou na tēia au manamanatā o te ora'anga nei, ka 'akariro āina kōtou i te aronga tūrangakore i roto i te 'ēkālēsia 'ei au 'akavā nō kōtou?

5Tē tuatua atu nei au i tēia ki a kōtou kia 'akamā kōtou. Kāre āina 'e tangata pakari i ō kōtou na 'ei 'akataka i te tika i rotopū i tēta'i taeake ē tēta'i?

6Tē kave nei āinei tēta'i taeake i tēta'i ki te 'akavā'anga ki mua i te aronga 'akarongokore?

7Mē 'e 'oro'anga tēta'i i rotopū i a kōtou na, tē tākinokino tikāi ra te reira i te tūranga taeake. 'E a'a i reira kōtou i kore ei i 'āriki kia tākino'ia mai kōtou? 'E a'a kōtou i kore ei i 'āriki kia 'akangere'ia mai kōtou?

8Ko kōtou tikāi 'oki tei tākino atu ē tei 'akangere atu i tō kōtou 'ua'orāi taeake!

9Kāre āina kōtou i nakiro ē, kāre ā te aronga rave kino tu'anga i roto i te bāsileia o te Atua ra? Auraka e vāvare: kāre 'oki te kanga vi'ivi'i, te 'akamori 'ītoro, te 'akaturi, te tāne 'akava'ine, te sodoma,

10te keiā, te noinoi 'apinga, te konā kava, te 'akakino, te 'aru 'apinga, kāre ō rātou tu'anga i roto i te bāsileia o te Atua.

11Mei te reira 'oki tēta'i pāpāki o kōtou na. Kua 'ōrei'ia rā kōtou, kua 'akatapu'ia ē kua 'akatikatika'ia mai i roto i te ingoa o te 'Atu ra ko Iēsū Mesia, ē i roto i te Vaerua o tō tātou Atua.

E 'akakakā i te Atua i roto i tō kōtou kōpapa

12 1 Kōr 10.23 “'E tika te au mea rava rāi i āku!” Kāre rā te mea tātakita'i e tau i āku. 'E tika te au mea rava rāi i āku, auraka rā au kia 'akatuika'a'ia e tēta'i 'ua atu mea.

13“Ko te kai nō te kōpū ia, ē ko te kōpū nō te kai ia,” ka 'akakore rā te Atua i a rāua katoa. Ko te kōpapa, kāre ia i 'akariro'ia nō te kanga vi'ivi'i, nō te 'Atu rā, nō te mea, ko te 'Atu rāi nō te kōpapa ia.

14Kua 'akatū 'oki te Atua i te 'Atu ē ka 'akatū katoa rāi aia i a tātou nā roto i tōna mana.

15Kāre āina kōtou i nakiro ē, ko tō kōtou au kōpapa 'e au mero ia nō te Mesia? Ē e rave āinei au i te au mero o te Mesia ē ka 'akariro i a rātou 'ei au mero nō te va'ine 'akaturi? Auraka rava ia!

16Gen 2.24Kāre āina kōtou i nakiro ē, ko te tangata te ka tōpiri ki tēta'i va'ine 'akaturi, ka riro i a rāua 'ei kōpapa 'okota'i? Mei tei tātā'ia ra ē, “E riro rāua 'ei kōpapa 'okota'i.”

17Ko te tangata rā te ka tōpiri atu ki te 'Atu ra, ka riro i a rāua 'ei vaerua 'okota'i.

18E rere kē atu i te kanga vi'ivi'i. Ko te au 'ara rava rāi tei rave'ia e te tangata nei tei va'o ia i te kōpapa, kāreka te tangata kanga vi'ivi'i ra, kua 'ara ia i tōna 'ua'orāi kōpapa.

191 Kōr 3.16; 2 Kōr 6.16Kāre āina kōtou i nakiro ē, kō tō kōtou kōpapa 'e nao ia nō te Vaerua Tapu i roto i a kōtou na ko tei rauka mai i a kōtou nō kō mai i te Atua ra ē kāre kōtou ē nō kōtou 'ua'orāi?

20Kua 'oko'ia rā 'oki kōtou ki te 'oko. Ē nō reira, e 'akakakā i te Atua i roto i tō kōtou kōpapa.