2 Tesalōnia 1 - Cook Island Maori Revised New Testament(CIMRNT)

Te aro'a'anga

1 ē Tīmōteo ki tō Tēsālōnia 'ēkālēsia i roto i te Atua tō tātou Metua ē te 'Atu ra ko Iēsū Mesia.

2Kia 'ōronga 'ua mai te Atua tō tātou Metua ē te 'Atu ko Iēsū Mesia i te aro'a 'ua ē te 'au ki a kōtou.

Te 'akavā'anga kia tae mai te 'Atu

3E te au taeake, kia 'akameitaki mātou i te Atua nō kōtou e tikāi i te au 'ati'anga rava rāi. 'E tau kia 'akapērā mātou, nō te mea, tē tupu ruperupe nei tō kōtou 'akarongo. Ē tō kōtou aro'a tēta'i ki tēta'i, tē ma'ata 'aere 'ua nei ia i rotopū i a kōtou kātoatoa.

4Nō reira, nā mātou 'ua'orāi e 'akapa'apa'a i a kōtou i roto i te au 'ēkālēsia o te Atua. Kua tinamou 'oki tō kōtou māro'iro'i ē tō kōtou 'akarongo i roto i te au tākinga kino'anga'ia ē te au tūmatetenga tei tupu ki a kōtou na.

5Tē 'akaāri nei te reira ē, e tika te 'akavā'anga a te Atua. Kua manako'ia 'oki kōtou e te Atua ē, 'e aronga tau kōtou nō tōna bāsileia. Nō te reira 'oki kōtou i mate ei.

6'E tū tuatua tika tō te Atua, ē ka 'akatupu aia i te tūmatetenga ki te aronga tē tākinga kino mai nei i a kōtou.

7Ē ka 'ōronga mai rāi aia i tēta'i 'akangāro'i'anga ki a kōtou tē tākinga kino'ia mai nei, ē pērā katoa ki a mātou nei. Ka 'akapērā aia mē mama mai te 'Atu ra ko Iēsū mei te rangi mai ma tāna au 'āngela mana ra

8ma te a'i kā ra, kia 'akautunga aia i te aronga tei kore i 'inangaro i te kite i te Atua, ē tei kore i 'āriki mai i te tuatua meitaki nō runga i tō tātou 'Atu ra ko Iēsū.

9Isa 2.10Ko tō rātou utunga ko te mate mutukore ia, koia 'oki, ka 'akaātea'ia mai rātou mei te aroaro atu o te 'Atu ē te pāpānunui o tōna kakā.

10Ka tupu te reira i te rā ka tae mai ei aia kia 'akakakā'ia aia i rotopū i tōna aronga tapu ē kia 'akangāteitei'ia i rotopū i te aronga katoa tei 'irinaki i aia. Ko kōtou katoa rāi 'oki i rotopū i a rātou, nō te mea, kua 'āriki mai kōtou i tā mātou karere.

11Ko tēia 'oki te tumu e tāmou ei mātou i te pure nō kōtou, kāre e tīvata, kia 'āriki mai te Atua i a kōtou 'ei aronga tei tau i tōna kāpiki'anga. Tē pati katoa nei mātou ē, kia 'akamanuia aia nā roto i tōna mana i tō kōtou au 'akakoro'anga meitaki rava rāi ē te 'anga'anga tā kōtou e rave nei nō tō kōtou 'akarongo.

12I pērā ka 'akakakā'ia te ingoa o tō tātou 'Atu ra ko Iēsū nō kōtou 'oki, ē ko kōtou nō Iēsū rāi, mei tei tau ki te aro'a 'ua o tō tātou Atua ē tō te 'Atu ra ko Iēsū Mesia.